Read Thado Chin Joshua 21 Bible Online

Joshua 21 - Thado Chin bible

Joshua 21

¹Chujouvin Levi pateho luchangho chu Eleazar thempu heng, Nun chapa Joshua heng, Israel chate phung luchangho henga ahungun,

² chule amahon Kanaan gamsunga um Shiloh a amaho henga kachena dingun khopi lenho chule kagancha ho dingun akhovelho eipehtha dinguva Mosi henga Pakaiyin thu anapehsa ahitai atiuve.

³Chuin Pakai thupeh bangchun akhopilen houle akhoveluva ho jouse chu Israel chaten agoulouva konin Levi mite chandingin apeovin ahi.

⁴Chule Kohath te insung midingin vangvetna ahungdoh in, chule Aaron thempu chate amaho chu Levi mite ahiuvin, Judah phunga konle Simeon phunga konin chule Benjamin phunga konin khopilen somlethum vangvet na-a konin achangun ahi.

⁵Chule Kohath chate amoh chengse chun Ephraim phung insungho-a konle, Dan phunga konin chule Manasseh phung kehkhatna konin khopilen som vangvet na-a konin achang taovin ahi.

⁶Chule Gershon chateho chun vangvet na-a konin Issachar phung insungho-a kon, Asher phunga kon, Naphtali phunga kon, chule Bashan'a um Manasseh phung akehkhatna konin khopilen somlethum achangun ahi.

⁷Merari chaten a-insungu dungjuijin Reuben phunga kon, Gad phunga kon chule Zebulun phunga konin khopi somleni achangun ahi.

⁸Chule Pakaiyin Mosi athupeh dungjuijin khopilen hole akhovelho chu Israel chaten vangvet na-a konin Levi mite apetaovin ahi.

⁹Chule amahon hichea amin kisei khopilenho hi Judah chate phunga konin Simeon chate phunga konin apedoh-un;

¹⁰Hichu Levi chate lah-a, Kohath Insunga kon Aaron chate chan chu ahi. Ajeh chu amaho chu vangvetna masapen changa ahiuve.

¹¹Chule amahon Judah thinglhang gama akhopi Hebron chu akimvela akhovelho pumin Anak pa Arba chu apetaovin ahi.

¹²Ahin khopilen loujaohole khoho vangchu Jephunneh chapa Kaleb lodingin apetaovin ahi.

¹³Hitichun amahon Aaron thempupa chate chu mithat ho kisellutna khopilen hidingin, Hebron le akhovelho chule Libnah le akhovelho pumin,

¹⁴chule Jattir le akhovelho pumin Eshtemoa le akhoheng pumin,

¹⁵chule Holon le akhovelho pumin, Debir le akhovelho pumin,

¹⁶chule a-in le akhovelho pumin, Juttah le akhovelho pumin, Beth-shemesh le akhovelho pumin, phungnia konchun khopilen ko apetaovin ahi.

¹⁷Chule Benjamin phunga konin Gibeon le akhovelho, Geba le akhovel ho,

¹⁸Anathoth le akhovelho chule Almon le akhovel hotoh khopilen li ahi.

¹⁹Aaron thempu chate khopilen abonin akhovelho pumin somlethum ahi.

²⁰Chule Kohath chate insungho, Kohath chate amoh Levi ho chun, Ephraim phunga kona avang vetnuva kon amu-u khopilenho chu aneijun ahi.

²¹Ajehchu amahon Ephraim lhanga Shechem le akhovelho pumpin, mitha-a kona hoidohna khopilen hidingin Gezer jong akhovelho pumin,

²²Chule Kibzaim le akhovelho pumin, Beth-horon le akhovelho pumin, khopilen li amaho apeovin ahi.

²³Chule Dan phunga kon Eltekeh le akhovelho pumin, Gibethon le akhovelho pumin,

²⁴Aijalon le akhovelho pumin, Gathrimmon le akhovel ho pumin khopilen li ahi.

²⁵Chule Manasseh phung kehkhatna kon Tanach le akhovel ho, chule Gathrimmon le akhovel ho pumin khopilen ni ahi.

²⁶Hiche kho jousele akhovelho jouse-a chenghi Kohath chate insung miho amohho dingchu khosom ahi.

²⁷Chule Gershon chateho Levi phungho chu Manasseh phung kehkhat ho channa-a kon, mithat ho kisellutna khopi Bashan gama Golan chu akhovel hotoh Beesh-terah khole akhovel hotoh, khopilen ni apetaovin ahi.

²⁸Chule Issachar phunga konin Kishon le akhovel hotoh, Dabareth le akhovel hotoh,

²⁹Jarmuth le akhovel hotoh, Engannim le akhovel hotoh, khopi li ahi.

³⁰Chule Asher phunga kon Mishal le akhovel hotoh, Abdon le akhovel hotoh,

³¹Helkath le akhovel hotoh, Rahob le akhovel hotoh khopilen li ahi.

³²Chule Naphtali phunga konin Galilee sunga um Kedesh le akhovelho pumin, mithat ho kisellutna khopilen hidingin; chule Hammoth-dor le akhovelho pumin, Kartan le akhovelho pumin khopilen thum ahi.

³³Gershon mite insungho khopilen jousele akhovelho pumin, khopilen somlethum ahi.

³⁴Chule Zebulun phunga kon, Levi mite amohse Merari chate insungho henga Jokneam le akhovel hotoh, Kartah le akhovel hotoh,

³⁵Dimnah le akhovelho pumin, Nahalal le akhovelho pumin khopilen li ahi.

³⁶Chule Reuben phunga konin Bezer le akhovel hotoh, Zehazag le akhovel hotoh,

³⁷Kedemoth le akhovel hotoh, Mephaath le akhovel hotoh khopilen lima ahi.

³⁸Chule Gad phunga kon mithat ho hoidohna khopi Gilead gama Ramoth le akhovelho toh Mahanaim khole akhovel hotoh,

³⁹Heshbon le akhovel hotoh, Jazer akhovel hotoh abona khopilen li ahi.

⁴⁰Chutichun Levi insungmi amohse Merari chate insung mihon vangvet na-a kona amu khopilen jouse chu somleni ahi.

⁴¹Israel chaten alo sunga um Levi mite khopilen jouse chu akhovelho hop pummin somlileget ahi.

⁴²Hiche khopilenho hin akimvel aneisoh keijun; hiche khopi jouse chu chutabanga chu umcheh ahi.

⁴³Chuin Pakaiyin apateo henga ana kihahsel nasa gamjouse chu Israel henga apetan, chuin amahon alovin chua acheng taovin ahi.

⁴⁴Chule Pakaiyin apateo henga akihahsel dungjuijin, amaho akicholdosah tai. Chule amaho masanga amelmateu jouse apedohtai.

⁴⁵Pakaiyin Israel insung henga thupha aseichan chu athonna um umlouvin, aguilhung sohkeijin ahi.