Read Thado Chin Joshua 23 Bible Online

Joshua 23 - Thado Chin bible

Joshua 23

¹Chule Israelte avelluva adou miho-a kona Pakaiyin choldona apehjou nungpeh-in, Joshua chu ateh lhehtan, chule akum atamin avoilhatan ahi.

²Chuin Joshua'n Israel jouse, a-upahou, aluchanghou, avaipohou, akouvin amaho henga keima katehtan, kakum jong atamtan ahi, ati.

³Chule Pakai na Pathen'un nangho jeh-a hiche namho jouse chunga abol hojouse hi namuvin ahi. Ajehchu Pakai na Pathen'u chu gal nasatpehpao chu ahi.

⁴Veovin, keiman twipilen lhumlam gei jenga jong Jordan'a kona naphung houvin alotheina dinguva, keiman nam jouse kasuhmanga, hiche nam amoh ho chu vangvet na-a kahop peh-u nahi, ati.

⁵Chule Pakai na Pathen'un na masang uva kona amaho anomanga, namitmuva kona akaidoh-a; Pakai na Pathen'u naheng uva akitepna banga chu nanghon agamu chu nalo dingu ahi.

⁶Hiche jeh-a chu nangho jetlam ahiloule veilama nakiheile louna dinguva, lekha-a kisun Mosi danthu jouse jui dingle tongdoh dingin hangsanun.

⁷Chule nangho lah-a umden namho lah-a chehih-un, a-pathen'u minjong pan hih-un; amaho mina kihahsel hih-un, jen jong jen hih-un, a-angsung uva jong bohkhup hih-un.

⁸Ahinla tuni chana nabol bangun Pakai na Pathen'u chu kolchah jingun.

⁹Ajehchu Pakaiyin namlenle namhat ho namasanguva adeldohtai. Ahin nangho dingin tunigeijin namasanguva koimacha adingjou pon,

¹⁰ nalah uva mikhatnin mi sangkhat adelthei ahi. Ajehchu Pakai na Pathen'un, nangho dinga ama kitepna banga gal nabolpeh-u ahi.

¹¹Pakai na Pathen'u nangailut nadingun nangho nasatah-in kigingphaovin lang hiuvin.

¹²Ahiloule nangho nakinung leuva, akidalha namho nalah uva cheng nalaiho hi nakivop piuva, amahotoh jilecha-a nakilah taouva, amahotoh nakiloi uva, amahon jong nakivop piuva ahile,

¹³Pakai na Pathen'un leiset phatah napeh-u, hiche munna hi namanthah tokah seova amahochu nangho dinga thangle pel hiding, chule napangteni-a dinga kivohna mol, chule namit dinguva ling hunghijo ding ahi. Hijeh chun kihetchen uvin.

¹⁴Chule veuvin, tunia keima leiset mijouse lampia chemang ding kahi, chule nalungsungu le nalhagao uvin naheuve. Pakai na-Pathen'un nangho chunga asei thilho chu thil khatjong athon aumpon ahi.

¹⁵Hijeh-a chu hung hitiding ahi, Pakai na Pathen'un nateppeh dungjui uva, thil jouse chu nangho dinga apha ahunglhun banga, Pakai na Pathen'un leiset phatah napehna uva kona nasuh manghel kahseuva Pakai na Pathen'un thilphalou jouse nachunga ahinlhun sah ding ahi.

¹⁶Aman nahenga nathupeh Pakai na Pathen thulhun, chu chonval tah-a nasuhkeh uva, nacheuva pathen dang naga jenuva, chule amaho anga nagabokhup-uleh, Pakai lunghanna chu hungkong jalintin, aman napeh-u gampha-a chu mangang tah-a namanthah dingu ahi.