Read Thado Chin Joshua 24 Bible Online

Joshua 24 - Thado Chin bible

Joshua 24

¹Chuin Joshua'n Israel phung jouse Shechem'a akhomin, Israel upaho jouse phung bulpiho athutanhou, avaipohou jouse akouvin chule amaho Pathen anga akipelut taovin ahi.

² Chuin Joshua'n mipi ho henga hitin aseije, Israelte Pakai Pathen'in hitin aseije, nidang laijin napateu chu vadunglen gal langkhatna ana chengun, Abraham pa le, Nahor pa Terah tah-in jong, abonun pathen dang ana jenun, ahi.

³ Chuin keiman napau Abraham chu vadunglen gal langkhatna kapuidoh-in, Kanaan gamsung pumpi-a kapuijin, achilhah kapunsah-in chule Isaac kapen ahi.

⁴ Chule keiman Isaac chu Jacob le Esau kapen, chule alodingin Esau chu Seir mol kapen ahinla Jacob le achate vang Egypt'a achesuh taovin ahi.

⁵ Keiman Mosi le Aaron kasollin, Egypt gama chun alah uva thil kidang kabolin hise kalansah in chule hiche jouchun kapuidoh in ahi.

⁶ Chule keiman napateu chu Egypt'a konin kahin puidoh-in, chule nangho twipi lama nahungun, chule Egypt miho chun twipisan geijin napateu chu kangtalai le sakol in ahin nungdelun ahi.

⁷Chule amaho Pakai henga akau le nangho le Egypt miho kikah-a aman muthim ajinsah-in, twipi chu achunguva alonsah-in, amaho akhukhumin, chule Egypt mite chunga ipi katoh ham tichu namitnun naveovin ahi. Chule nangho phat sottah gamthipma naum taovin ahi.

⁸ Chuin Jordan gal langa um Amor mite gama kapuilutnun, amahon nangho nakisat piuvin, chuin agamu chu nalotheina dingun amahochu nakhut uva kapen, chuin nangho masanga kasumangin ahi.

⁹ Hichun Moab lengpa Zippor chapa Balak akipatnin Israel asatnin, chuin Beor chapa Balaam chu nagaosap dingun akousah-in,

¹⁰ahivangin ken Balaam thu kangaipon, hichejeh chun aman nang phatthei naboh jingin, hitia chu ama-a kona kahuhdoh nahi.

¹¹ Chuin nangho Jordan galla nacheovin, Jericho'a nahungun, Amor mi Perizz mi, Kanaan mi, Hit mi, Girgash mi, Hiv mi, Jebus miho chule Jericho hon nasatnun, ahin ken amaho, nangho khutna kapen ahi.

¹² Chuin nangho masanga amaho delmang dingin khoingal ho kasolin; Amor lengteni chunga jong, hichu nangho chemjamle thal'a kon ahipon ahi.

¹³ Chule nangho ngaito hilouhelin ken nangho gam kapen, chule nasah louhelu khopi-a nacheng uvin, chule naphu louhelu lengpi theile Olive thei naneovin ahi.

¹⁴Hiche jehchun tun, Pakai ginguvin, lunglut tahle dihtah-in jen'uvin, napa teovin vadunglen gal langkhat le Egypt gama anahouvu pathen dangho chu paimangun chule Pakai jen'uvin.

¹⁵Chule nangho dinga Pakai jen chu aphalou abahle, tunin najen ding chu nangman lhengdoh-in, Vadunglen gal lama napateovin anajen a-pathen hou chu najendingu ham? Ahiloule agama nana chennu Amor miho pathen chu najen dingu ham? Amavang keile ka-insung mite vangin Pakai kajen dingu ahi.

¹⁶Chuin mihochun adonbutnun, Pakai Pathen'in ajahda keihon pathen dang iti nama jongle jenpou vinge atiuve.

¹⁷Ajehchu Egypt gama keiho le kapateu soh in'a kona eipuidoh uva chu Pakai Ka Pathen'u ahin, kamit mutah uva melchihna loupitah tah abolin, chuleh kachena chanule kajotpanao miho-a konin eihuhdoh-uve.

¹⁸Chule Pakaiyin mijouse, agama cheng Amor mite jengjong, kama sang uva adeldoh-in; hiche jeh-a chun keihon Pakai kajen dingu ahi, ajehchu Amachu ka Pathen'u ahi.

¹⁹Chuin Joshua'n miho henga chun Pakai chu najen theilou dingu ahi, ajehchu ama Pathen theng ahin, thangthip Pathen ahin, nagolkeh naole nachonset nahou angaidam louding ahi ati.

²⁰Nanghon Pakai chu nadalhah uva gamdang pathen najen uva ahile, nangho dinga thilpha abolnunga, nachunga khansetna ahinlhun sah jeng ding ahi.

²¹Chuin mipihon Joshua henga, ahipoi, keihon Pakai bou kajendingu ahi, atiuve.

²²Chuin Joshua'n mipi ho henga, nanghon Pakai jending joh tunin nakilhen taovin ahi, ti hettohsah chu nanghotah nahiuve atile amahon keihotah ahettohsah kahitaove, atiuvin ahi.

²³Hichejeh chun tun nalah uva um gamdang pathenho chu paidoh-un, chule Pakai Israel Pathen henga nalungu koijun, ati.

²⁴Chuin mipihon Joshua henga, Pakai ka Pathen'u chu jenung kating, ama thu jengbou kangai dingu ahi atiuve.

²⁵Hicheni chun Joshua'n mipitoh thulhun asemin, chule kitepnadan kisun khatle chondan khat Shechem'a aphutdoh-in ahi.

²⁶Chuin Joshua'n hiche thuho chu Pathen dan lekhabua ajihlutnin, chuin song lenpitah khat alan, gangpi phungnoi khatna atungin, hiche chu Pakai muntheng kom ahi.

²⁷Chuin Joshua'n mipi ho henga, veuvin, hiche songhi eiho kah-a hettohsah chu ahi. Pakaiyin ihenguva aseijouse chu hiche hin ajatan ahi; hijeh-a chu hichehi nangho dinga hettohsah hiding, achutiloule na Pathen chu nuse khagetnun nate, ati.

²⁸Hitichun Joshua'n mipi ho chu a-inuva kilecheh dingin akikhensahtan ahi.

²⁹Chule ahung hitin ahi, hiche jouchun Nun chapa Joshua Pakai soh chu kum jakhat le kumsom ahin athitan ahi.

³⁰ Gaash lhang sahlam sanga, Ephraim molla um Timnath-serah sunga ama chandinga kisem gamgi chinna chun avuitaovin ahi.

³¹Chuin Joshua hinsungsen chule upaho, Joshua sanga upajoho Pakaiyin Israelte dinga anatoh jouse anaheho adam sungu chun Israel mipi ho chun Pakai anajui sohkeijun ahi.

³² Chule Israel chaten Egypt'a kona Joseph guho apoh touvu chu, Shechem pa Hamor chate-a kona Jacob'in dangka jakhatna anachoh achun avuijun, chule hichu Joseph chate lonamun ahitan ahi.

³³Chuin Aaron chapa Eleazar athitan, chuin amahon Ephraim lhanga achapa Phinehas anapehnao agamsung lhanga chun avuitaovin ahi.