Read Thado Chin Joshua 3 Bible Online

Joshua 3 - Thado Chin bible

Joshua 3

¹Chuin Joshua jingpitah in athouvin, chule Shittim'a konin akipat doh-un, Jordan lui ahunglhung taove. Amale Israel chate jouse agalkai masangun chua chun ageh taove.

²Chuin ahitin ahi. Nithum jouvin lamkaiho chu gebuh lah-a chun acheuvin;

³Chule amahon mipi ho chu Pakai na Pathen thulhun thingkhong chu Levi thempuhon aput namu phat tengule naum naova konin kichon unlang chuche nungchu najuidingu ahi, tin thu apeuve.

⁴Ahinla nanghole hiche kikah chu tong sangni tobanga nakigamlat diu, nachenadiu lampi nahet theina dingun, nai hihhelun. Ajehchu tumasangin hiche lampia hin nanache khapouve.

⁵Chule Joshua'n mipi jah-a, nangho kisuthengun ajehchu Pakaiyin jingleh nalah uva thilkidang abolding ahi, ati.

⁶Chuin Joshua'n thempuho jah-a, thulhun thingkhong chu puvinlang mipi masanga chun cheovin, ati. Chuin amahon thulhun thingkhong chu apuvin mipi masanga chun achetauve.

⁷Chule Pakaiyin Joshua jah-a, keiman Mosi kana umpi bang banga nangma jong kaumpi ding nahi, ti amahon ahetheina dingun tunia hi Israel pumpi mitmu-a kachoi sang panding nahi, ati.

⁸Chule nangman thulhun thingkhong pu-a pang thempuho jah-a, Jordan vapam chin nagei phat nule Jordan'a nadindendiu ahi, tin thu pen, ati.

⁹Hitichun Joshua'n Israel chate jah-a, hilama hungun lang Pakai na Pathen'u thuhi ngaijun, ati.

¹⁰Chule Joshua'n hia konahi hingjing Pathen nalah uva aume ti nahet dingu ahi. Chule aman Kanaan mihole Hit miho, Hiv miho Perizz miho, chule Girgash mihole Amor miho chule Jebus miho thonlou hela namasanguva adeldoh ding ahi, ati.

¹¹Veovin, leiset pumpi Pakai thulhun thingkhong chu namasanguva Jordan lui galkai ding ahi.

¹²Hijeh chun tun phung khatna mikhatcheh Israel phungho-a konin somleni lhengdoh-un.

¹³Chule hung hitiding ahi. Pakai leiset pumpi Pakai thulhun thingkhong pu-a thempuho kengin achot chot nuleh Jordan twipi chu kiting tanding sahlama kona hunglong twipia kona chu kikhendoh ding, chule hichu aloma kiting dending ahi.

¹⁴Chuin ahitin ahi, mipihole mipi masanga thulhun thingkhong pu-a thempuho Jordan galkai nadinga aponbuh uva kona akipatdoh phatnun,

¹⁵Chule thingkhong puho Jordan lui aga lhunuva, thingkhong pu thempuho keng chun twi agahchot lutnule, (ajehchu chang atlai sungsele Jordan luihi longletji ahi).

¹⁶Sahlama kona hunglong suh twi chu akiting denin, Zarethan koma um Adam khopi geijin gamlatah-in akidilin ahi. Chule phaicham gamlatah twipi lamsanga chi twipi lama longsuh laichu atantan, hitichun mipi ho chu Jericho khopi dontah-a chun agalkai taove.

¹⁷Pakai thulhun thingkhong pu-a thempuho chu Jordan lui mipi ho chu agalkaisoh kahseovin, Jordan lailunga tolgoa chun ading detnun, chule Israelte jouse chu tolgoa agalkai taovin ahi.