Read Thado Chin Joshua 4 Bible Online

Joshua 4 - Thado Chin bible

Joshua 4

¹Chuin ahitin ahi. Mipi jouse Jordan agalkai sohkei phatnun, Pakaiyin Joshua henga,

²Phung khatna konin Pasal khat cheh, mipi lah-a pasal somleni lhengdoh-in,

³Chule ajah uva, thempuho dettah a adinnau mun Jordan lailunga konchun song somleni laovin. Chule hicheho chu pogalkai junlang tujana nagenadiu munachun koijun, tin thu pen, tin aseipeh-in ahi.

⁴Chuin Joshua'n Israel chate lah-a phung khatna kon mikhat cheh analhendoh mi somleni chu akouvin,

⁵Chule Joshua'n ajah uva, Jordan lailung Pakai na Pathen'u thulhun thingkhong masanga chun gacheuvin lang Israel chate phungjat dungjuijin nangho mikhatnin, song khat cheh nalenguva hinpuvin, ati.

⁶Hiti achu hichehi nalah uva melchihna hunghia, khonung tengle, nachateovin apateu henga hiche songhohi ipi kihetna ham? tia nadoh tengule

⁷Nanghon Pakai thulhun thingkhong masanga Jordan lui alonglai adinjeh ahi. Jordan agalkai laijun Jordan twi chu akangtanin, chujeh-in hiche songhohi Israel chate dinga a-itih a dinga hetjingna hiding ahi, tia amahochu nadonbut diu, ahi ati.

⁸Chule Israel chaten Joshua thupeh bangin abollun, Pakaiyin Joshua jah-a anasei bangin, Israelte phungjat dungjuijin alauvin, agenao mun geijin apogal kaijun, chuachun akoitauvin ahi.

⁹Chule Joshua'n thulhun thingkhong pu-a thempuho dinna Jordan lailunga chun song somleni aphutnin, hihochu tunichanin aumjinge.

¹⁰Ajehchu tulhun thingkhong pu-a thempuho chu Mosi'n Joshua henga thu anapeh jouse dungjuijin mipi henga seipehdin Pakaiyin Joshua jah-a thu anapeh chu akichai kahsen Jordan lailunga chun adingdenun ahi. Chuin mipi chu kinotah-in agalkai taovin ahi.

¹¹Chule ahitin ahi, mipi ho chu agalkai sohkei phatnun Pakai thulhun thingkhong le thempuho chu mipi mitmun agalkai taove.

¹²Chule Reuben chate, Gad chate chule Manasseh phung kehkhat gal manchah pumin, Mosi'n ahenguva aseipeh bangin Israel chate masanga anagalkaijun ahi.

¹³Galvona kivonjousadem mi sangsomli tobang gal satdingin Jericho phaicham ho-a Pakai masanga akitolun, ahi.

¹⁴Hicheni chun Pakaiyin Israel pumpi mitmu-a chun Joshua achoisangin ahi. Chuin amahon Mosi agin bangun amachu ahinlai sungsen agingun ahi.

¹⁵Chule Pakaiyin Joshua henga aseijin,

¹⁶Hettohsahna thingkhong pu-a thempuho chu Jordan'a kona ahungdoh nadiuvin thu pen, ati.

¹⁷Hijeh chun Joshua'n Jordan'a konin hungdoh taovin, tin thempuho thu apetan ahi.

¹⁸Chule ahitin ahi, Pakai thulhun thingkhong pu-a thempuho chu Jordan lailunga kona ahungdoh uva, chule tolgo akaidoh phatnun angai bang bangin Jordan luichu alongkittan, vadung pangho chu aletkittan, ahi.

¹⁹Chuin mipi chu lha masapen nisom channin Jordan luija konin ahungdoh un, Jericho gam solamsang Gilgal'a chun gebuh asong taovin ahi.

²⁰Chule song somleni Jordan luija kona alahdoh uchu Gilgal'a chun Joshua'n aphuttan ahi.

²¹Chule aman Israel chate jah-a, khonung tengle nachateovin apateu henga, hiche songhohi ipi kihetna ham? tia nadoh tenguleh,

²²Nanghon nachateo henga, Israel chu hiche Jordan'a hin tolgon anagalkaijun ahi, ti nahetsah dingu ahi.

²³Ajehchu Pakai na Pathen'un twipisan kagalkai kahseuva kamasanguva agotsah bangchun, Pakai na Pathen'un Jordan twi chu nagalkai kahseovin akansah-in, ahi.

²⁴Hiti achu leiset mite jousen Pakai khut chu hattah ahi, ti ahetheijuva, nanghon Pakai na Pathen'u chu a-imatih chana nagin theina dingu ahi tin aseipeh-in ahi.