Read Thado Chin Joshua 6 Bible Online

Joshua 6 - Thado Chin bible

Joshua 6

¹Tun Jericho chu Israel chate jehchun akikhahchahtan, koimacha alutle apotle aumtapoi.

²Chuin Pakaiyin Joshua jah-a, vetan, Jericho le alengpau chule mihat mihangsan tamtah hohi nakhutna kapeh ahitai.

³Chule nangho galmi jousen khopihi naum uva, hitia chu khatvei navelsoh diu ahi. Chule chutobangma chu nigup sunga naboldingu ahi.

⁴Chule thempu sagin kelngoichal ki-a kisem sumkon sagi kitepna thulhun thingkhong masanga achoijuva, chule anisagi ni-a chu khopi chu vel sagivei navelsoh dingu, chuteng thempuhon sumkon ho chu amutdiu ahi.

⁵Chule hung hitiding ahi. Amahon kelngoichal ki-a kisem sumkon chu amut huilhung jenjunu gin najah tenguleh mipi chun ha-aova na-aodiu, chutahle khopi kulchu chimlhading ahi. Chule mipi chu ama ama majon cheh a jangjela kaltou dingu ahi, ati.

⁶Chuin Nun chapa Joshua'n thempuho chu akouvin, ajah uvah, thulhun thingkhong hi jong unlang, thempu sagin Pakai kitepna thingkhong masang lama chun kelngoichal ki-a kisem sumkon sagi choijuhen ati.

⁷Chuin aman mipi jah-a, chepeh unlang khopi chu velkolun lang, chule galvona kivonta pouchu Pakai kitepna thingkhong masanga chun cheohen, ati.

⁸Chuin ahitin ahi. Joshua'n mipi henga thu aseijou phatnin, kelngoichal ki-a kisem sumkon sagi choija thempuho chun Pakai masanga achoiju sumkon ho chu amut taovin, chule Pakai thulhun thingkhong chun anungu ajuitan ahi.

⁹Chule galvon kivon hochu sumkon ho mut thempuho masanga chun acheuvin, chule anungthop ho chu thulhun thingkhong nunga ahungun, thempuho chun ache pumu chun sumkon ho chu amutnun ahi.

¹⁰Chuin Joshua'n na aona dinguva thu kapeh ding nikho alhin tokahse-a, na ao-loudingu, chule nahusat loudingu ahi. Chule thujong nasei loudingu, thu kapeh tenglebou na aodiu ahi, tin mipi chu thu apetan, ahi.

¹¹Chutichun Pakai thulhun thingkhong chu khopi chu khatvei avelsah un, chule gebuh a ahung kilekitnun, agehjiuve.

¹²Chule Joshua jingpitah-in athouvin, thempuho chun Pakai thulhun thingkhong chu apuve.

¹³Chuin Pakai thingkhong masanga kelngoichal ki-a kisem sumkon ho choija thempu sagiho chu tanglouvin acheuvin ahi. Chule galvona kivonho chu amasanguva acheuve. Ahinla anungthop ho chu Pakai thulhun thingkhong nunga ahungun, thempuho chun chepumin sumkon ho amut jingun ahi.

¹⁴Chuin anini channin khopi chu velkhat avellun gebuh a ahungkile uvin ahi. Chutichun nigup abolluve.

¹⁵Chuin anisagi channin ahitin ahi, khovah then thenin athouvun, abol ngaima bangun khopi chu vel sagi avelun ahi. Hichenia bou chu khopi chu vel sagivei avelu ahi.

¹⁶Chuin avel sagi chana-in ahitin ahi, thempuhon sumkon ho amut phatnun Joshua'n mipi jah-a hatah-in aovun ajehchu Pakaiyin khopihi nangho napeh-u ahitai atin, ahi.

¹⁷Chule khopile asunga umjouse ngeichu sapsetna dinga Pakaiya kipedoh ahitai. Rahab noti le a-insunga aumpi chengse bouchu sohcha ding ahi. Ajehchu amanun imisolte niu anaselin ahi.

¹⁸Chule sapset thilho-a konin kikang seuvin. Achutiloule sapset thilho chu lakhaovin natin, sapset changkhaovin nate. Chule Israel gebuh a jong sapsetna lhungintin, boina umgetninte.

¹⁹Ahinla sana dangka, thihle sum-eng bel jouse Pakai dinga kisuthenga ahi. Hicheho chu Pakai goukhol na-a kikoiding ahi, ati.

²⁰Chutichun thempuhon sumkon ho amutphatnun ahitin ahi. Mipin sumkon ho gin ajah phatnun ha aovin a-aovun ahileh, kulpi chu achimlhatan, chuphatnin mipi chu amaho doncheh a jangjelin alhai touvun khopi chu alataove.

²¹Chuin amahon khopi sunga um numeile pasal nungah le gollhang abonin, ateh akhang chule bongchal le kelngoi, chule sangan abonchan chemjamin athat gamhel taovin ahi.

²²Ahinla Joshua'n gamvelhi teni jah-a, notinu in'a chun lut lhonin lang amanule aneijouse chu ahenga nana kihahselna lhon bang chun gapuidoh lhonin, ati.

²³Chuin gollhang gamvelhi teni chu ahunglhonin, Rahab, anule apa, asopiho chule aneijouse toh apuidoh lhontan, ahi. Chule amanin a inkote jouse apuidoh lhonin Israel gebuh pama adalha lhontan, ahi.

²⁴Chuin amahon khopi chu asunga thil umjouse toh meijin ahalvamun, sana dangka, thihle sum-eng belho bouchu Pakai in'a gou kholna-a akoitaovin, ahi.

²⁵ Chuin Joshua'n Rahab notinu le aneijouse, chule apa insung ahuhhingin ahi. Chule amanu tuni geijin Israelte lah-a acheng nalaije. Ajehchu amanun Joshua'n Jericho gavelhi dinga asolteni chu ana selin, ahi.

²⁶ Chuti chun Joshua'n amaho chu ahahselin, hitin aseije: hiche Jericho khopi hintungdoh kitna chu Pakai masanga sapset chenghen. Abul phutna chun achapa lenpen achan ding, chule akotpiho atundoh tengle achapa lhumpen achan ding ahi,

²⁷Hitichun Pakaiyin Joshua aumpin, gam jouse-a amin chu akithangtan ahi.