Read Thado Chin Joshua 7 Bible Online

Joshua 7 - Thado Chin bible

Joshua 7

¹Ahin Israel chaten sapsetna thil chungah asukhel taove. Ajehchu Judah phunga Zerah chapa Zabdi chapa Karmi chapa Achan'in sapsetna thilchu alan ahi. Chuin Israel chate chunga Pakai lunghana chu akoudoh jahtan ahi.

²Chuin Joshua'n Jericho akonin Bethel solam Bethaven koma um Ai kho-a mi asolin, ajah uvah, chetou vunlang gamchu gaveovin tin aseijin ahi. Chuin miho chu acheuvin Ai khochu agave taove.

³Chuin amaho chu Joshua henga ahung kilekitnun, ajah-a, mijouse kontousah datan, ahinla sangni sangthum tou kontouvu henlang Ai khochu nokhumu hen, mijouse suhthachol datan, ajeh chu lhomcha bou ahiuve, atiuvin ahi.

⁴Hichun mipi ho lah-a mi sangthum tobang akontou taove. Ahin amaho Ai miho masanga ajamtaovin ahi.

⁵Chuin Ai miten amaho mi somthumlegup tobang athatnun ahi. Ajehchu kotpi-a kona Shebarim geipeh a ahindelsuh uva, ajamsuh nalam uva athao ahi. Hijeh chun miho lung chu alhoplhatan, twibang ahijengtai.

⁶Chuin Joshua'n avonho abottelin Pakai thulhun thingkhong masanga chun nilhah geijin aboh khupmin, tolla amai asulutnin, amale Israel upaho chun, aluchung uva leivui akinutaove.

⁷Chuin Joshua'n, vo Pakai Pathen, ipidinga hiche mipihohi Amor mite khutna napeh doh-a thagam dingbepma Jordan napui galkai mongham? Jordan gal langkhatna lungmonga kanaum hitaleh!

⁸Vo Pakai, Israelte hi amelmate masanga kinungchon jing tale ipi seitang em?

⁹Ajehchu Kanaan mihole hiche gama cheng jousehin hichu jaovintin, eium kimvel untin kaminuhi leisetna kona asuhmang diu ahitai. Chutengle Namin loupitah hi inaloding hitam? ati.

¹⁰Chuin Pakaiyin Joshua jah-a, thoudoh-in, ipi dinga hiti achu nabohkhupma nalup ham? ati.

¹¹Israel achonvaltan, kathupeh kathulhun jong eisuhkeh peh-un, amahon sapsetna thil jengjong alauvin, aguvin, aselguvin, athilkeo lah uva aselun ahi.

¹²Hiche jeh-a chu Israel chate amelmateu masanga ding joulouva galte masanga nungjam joh ahiuve. Ajehchu amaho chu sapset changa ahitaovin, nalah uva kona sapset thilchu nasuhmang lou uleh kaumpi louding nahitaove.

¹³Kipat in mipi ho sutheng inlang ajah uva, jing nikho-a dingin kisuthengun; ajehchu Pakai Israel Pathen'in hitin ati, Israel nalah uva kona sapsetsa thilchu nasuhmang kahseuva namelma teu masanga nadin jouloudiu ahi, tin seipeh-in.

¹⁴Hiche jehchun jingkah tengle naphungu dungjuija naki khopdiu, chule hitiding ahi. Pakaiyin alhendoh phung chu abom dungjuija hungdiu ahi. Chule Pakaiyin alhendoh bom chu a-insung dungjuija hungdiu, chule Pakaiyin alhendoh dungjuija amichangcheh hungdiu ahi.

¹⁵Chule hitiding ahi, sapset thiltoh kimattha pen penchu amale aneijouse meija kigouvam ding ahi. Ajehchu aman Pakai thulhun asukhelin, Israel lah-a chonval tah-in thil abole, ati.

¹⁶Chuin Joshua jingpitah-in athouvin, Israelte chu aphung phungin ahinpuijin ahile Judah phungchu alheng dohtai.

¹⁷Chuin aman Judah sunga abom bomin ahinpuijin, Zarhi bom chu alhengdoh-in ahi. Chuin Zarhi bom chu mikhat khatnin ahinpuijin ahile Zabdi chu alheng dohtan ahi.

¹⁸Chuin a-inkouvin mikhat khatnin ahinpuijin ahile Judah phunga Zarah chapa Zabdi chapa Karmi chapa Achan chu amandohtan ahi.

¹⁹Chuin Joshua'n Achan jah-a, kangeh nahi, kachapa Pakai Israel Pathen chu loupi chamkim jana penlang nachonsetna phongin, chule ipi nanabol tun imlouvin kakoma seijin, ati.

²⁰Chuin Achan'in Joshua chu adonbutnin, ajah-a, tahbeh mongin Pakai Israel Pathen dounan kana chonsetan, hitihin kanaboltai.

²¹Keiman thil kichomho lah-a chun Babylon von hoitah khatle dangka shekel jani, chule shekel somnga-a gih sana lhon khat kamun ahile, kavejou tahih-in, kakilahtan ahi. Chule vetan, hicheho chu kaponbuh lailung leinoi'a kaselin, dangka chu anoija aume, atin ahi.

²²Chuin Joshua'n mi asolin, amaho chu ponbuh lama alhaijun, chule vetan, hichu aponbuh sunga anaselin, dangka anoinunga anaume.

²³Chuin amahon ponbuh a konin hicheho chu aladoh-un, Joshua le Israel chate jouse henga ahinchoijun Pakai angsunga akoitaove.

²⁴Chuin Joshua le aumpi Israel pumpin Zarah chapa Achan dangka, von, sana lhon, achapate le achanute, abongchalho, asanganho le akelngoiho, aponbuh chule aneijouse ahintolun Achor phaicham ahinlhut taove.

²⁵Chuin Joshua'n ibola neisuh lunggimu ham? Pakaiyin tunia nangjong nasuh lunggim ding ahitai, ati. Chuin Israel mipin amale aumpi jousen songin asepmun, asejou phatnun meijin ahalvam taove.

²⁶Chuin amahon achunga chun songlhuh lentah atungdoh-un, hichu tunigei hin aumjing nalaije. Hitichun alungset tijat umtah-a konin Pakai akileheitai. Hijeh chun hiche munchu tunigeijin Achor phaicham akisahtai.