Read Thado Chin Joshua 8 Bible Online

Joshua 8 - Thado Chin bible

Joshua 8

¹Chuin Pakaiyin Joshua jah-a, kicha hih-in, lungjong lunglha hih-in, galmi jouse puijin kipat inlang Ai kho-a chetouvin, ven, Ai lengpa le amite chule akhopile agam nakhutna kapeh nahitai.

²Chule Jericho le alengpa chunga nabol banga Ai le alengpa chunga jong nabolding ahi. Chule thilkichomhole ganchaho chu nangho ding ahin, khopi nunglama chu achanglhi nakoiding ahi, ati.

³Chutichun Joshua le galmiho jouse Ai satna chedin akipat doh-un ahi. Chuin Joshua'n mihat, mihang sangsomthum alhengdoh-in, jannin asoldohtan, ahi.

⁴Chuin amaho chu thu apen, veuvin, khopi nunglama nachanlhih diu ahi. Khopi-a kona chegamla behseh louva, kigosa dema naum johdiu ahi.

⁵Chule keimale kaumpi chengse chun khopi chu hinnai lutnung kating, chule hung hitiding ahi. Keiho doudinga ahungdoh tengule, amasa bangchun keiho amasanguvah jamung ting,

⁶(ajehchu amaho keiho nunga hungdoh ding,) amaho khopisunga kapuidoh kahseovin, ajehchu amahon amasa-a bangin, amaho amasanguvah ajamtaove atidiu ahin, hijeh-a chu amasanguva kajamdiu ahi.

⁷Chuteng nanghon nachanlhih naova kona nakipat doh uva, khopi chu nalahdiu ahi. Ajehchu Pakai Pathen'in nakhut uva apehding ahi.

⁸Chule hitiding ahi, nanghon khopi chu nalah tengule nahal dingu ahi. Pakai thupeh dungjuija nabol dingu ahi. Veovin, thu kapeh nahiuve, ati.

⁹Hichun Joshua chun amaho chu asoldoh-in, chule amaho changpang dingin acheuvin, Ai khole Bethel kikah Ai lhumlama chun aga umun, Joshua vang hiche janchun mipi lah-a agehtan, ahi.

¹⁰Chuin Joshua jingpitah-in athouvin, mihochu asimin, amale Israel upaho mipi masanga chun Ai kho jonin akitoltou taove.

¹¹Chuin mipi jouse ahenga amatoh umkhom galmiho jouse chu chetouvun, chule ahin naijun khopi masanga ahunglhung uvin, Ai khopi sahlama chun ponbuh asonguve. Tun amahole Ai kikah-a chu phaicham khat umah ahi.

¹²Chuin aman mi sangnga tobang apuijin, khopi lhumlam sang Bethel le Ai kikah-a chun changlhi-a kisel dingin akoitan ahi.

¹³Chuin amahon khopi sahlama um mipi janel, chule khopi lhumlama changpangho geija agontohsoh phatnin, hiche janchun Joshua phaicham lailunga achetan ahi.

¹⁴Chuin ahitin ahi, Ai lengpan hichu amuphat chun, kinotah-in ama athouvin, khopi miho, amale amite jouse chu phaichama chun Israelte satdingin ahung kondoh taove. Ahinla khopi nunglama asat ding achanglhi aume tichu ahepouvin, ahi.

¹⁵Chuin Joshua le Israel mijouse chu gallel bangin amaho masanga chun gamthip lama chun ajamtaove.

¹⁶Chuin Ai kho-a um mijouse chu amaho nungdel dingin akikoukhomun, Joshua nung adelun khopi-a konin akitolmang taove.

¹⁷Chuin Ai khole Bethel kho-a chun Israelte nungdela chelou khatchabeh aumpouve. Chule khopi kot chu honsan adalhaovin Israelte chu adeltaove.

¹⁸Chuin Pakaiyin Joshua jah-a, Ai kholam ngan nakhutna tengcha chu gah lhandoh-in, ajehchu hichu nakhutna kapeh ding ahi, ati. Chuin Joshua'n akhutna um tengcha chu khopi lam ngan alhang dohtan ahi.

¹⁹Chuin changpangho chu aumna mun uva konin akipatdoh loijun, akhut alhandoh doh chun alhaijun, khopi-a chun alutnun hichun alauvin gangtah-in ahallha taove.

²⁰Chuin Ai kho miho chu akiheijun anung lamu agah vetnule, veuvin, khopi meikhu van'a akitungdoh amuvin, hoilampena jamding ham ahetapouve. Chuin gamthip lama jam mipi ho chu ahung kilekitnun, anungdelhou chunga chun achutaove.

²¹Chuin Joshua le Israel pumpi, achanglhi hon khopi alah-u chule khopi meikhu kitungdoh chu amuphatnun akiheijun Ai kho miho chu athatgam taove.

²²Chuin adangho chu amaho satdin khopi-a konin ahung kitoldoh-un, hitichun amaho alang alanga Israelte lailung tah-a aumtaove. Chuin akihinghoile ajamdoh khatcha aumsah tapouve.

²³Chuin Ai khopi lengpa chu ahingin amanun, Joshua henga ahinkai taovin ahi.

²⁴Chuin ahitin ahi, Israel ten gamlah le anungdel nao gamthipma Ai kho mijouse chemjam'a akitha-a akisuh gamhel phatchun, Israelte jouse Ai kho-a akileuvin chemjamin asumang taovin ahi.

²⁵Chule hiche nikho-a Ai khopi-a thijouse chu anumei apasal'in sangsom le sangni ahiuve.

²⁶Joshua'n ateng alhandoh chu Ai kho-a miho athajou tokahseochun akhut alha lhapon ahi.

²⁷Pakaiyin Joshua henga athupeh bangin hiche khopi-a ganchaho le thil kichomho bou chu Israel ten ama ama chanding dola akilah-u ahi.

²⁸Chuin Joshua Ai kho chu ahalin, a-itih-a dingin alhuh-in asemin, tunichan hin ahomkeo ahijinge.

²⁹Chule Ai kho lengpa chu nilhah geijin thingleh-a akhaijin, chule nilhum ding konin Joshua'n thu apen, thilong chu thingleh-a konin alalhauvin khopi lamlen lutna bulla apaijun achunga song atungdoh-un tunichanhin aum nalaije.

³⁰ Chujouvin Joshua'n Ebal lhanga Israel Pakai Pathen dingin maicham asemin ahi.

³¹ Mosi dan lekhabua kisun bangin Pakai soh Mosi'n Israel chilhah ho thu anapeh bangchun, hiche maicham chu songa kisem ahin, koiman achunga thih alhahkhum loulaiju ahi. Hichea chun Pakai dingin govam thilto le chamna thiltoho atoh-in ahi.

³²Chuin aman hiche songa chun Mosi danho chu Israel chate mitmun asunin ahi.

³³ Chule Israelte jouse, a-upahou, thutan vaihomho, Levi te thempuho chu Pakai thingkhong jongho masanga, thulhun thingkhong sihtoa chun phung chomho le chuche gama pengho jouse jongchu ading khom sohkeijun, akehkhat Gerezim molpangah adingun, Pakai soh Mosi'n Israelte chu vang aboh tahdi ding ahi tia thu anapeh bangchun, akeh khat chu Ebal jonna aumun ahi.

³⁴Chule chujouchun danthua thujouse danthu bu-a kisun jouse dungjuijin vangbohna le sapsetna thuho chu asimdoh-in ahi.

³⁵Mosi thupeh jouse chu Israelte houkhom ho jousele, numei ho le chapang neocha cha hole amaho lah-a chidang namdang chengho hetnin Joshua'n simlou khatchabeh aneipon ahi.