Read Thado Chin 2 Thessalonica 2 Bible Online

2 Thessalonica 2 - Thado Chin bible

2 Thessalonica 2

¹ Sopiteho, I-Pakaiyu Jesu Christa hung dingle ama koma ikikhop dingu thudola hichea hi naheng uva kangeh ahi,

²lhagao khattou sei ahiloule, keiho sei hi ahi, tia thu kiseija konin hijongle, keiho sut hi ahi, tia kei lekhathot khattou ahima kon hijongle, lunglinglao loi hih-un; Christa nikho chu ahung lhunga ahitai ti gel loujenun; lung jong lunggim hihhelun.

³Koima imachan kilhep lhahsah hih-un; ajeh chu lhahmang na hung lhung masa ding, chule dan suse-a chonsepa, mangthah chapa chu, hung kiphongdoh ding,

⁴ ama chun dou apat ding, Pathen minpu jousele hou jouse chunga ama kichoi sanga, Pathen houin kisana jong hung touva hung ki pathen sah ding ahinalaije.

⁵Nakom uva kaum laija hiti thuho kasei jouse chu nageldoh lou uham?

⁶Chule ama chu ama phattah-a akiphondoh ding, ipin akham ahi nanghon naheuve.

⁷Ajeh chu dan suhsetna thuguh chun tu-a jong hi na atoh jingsa ahi; lahmanga aum kahse-a hi atuhtanga khat uma ahibouve.

⁸ Chule hiche teng chule dan suse-a chu hung kiphongdoh ding ahi; ahinla Pakai kama kon lhagao chun ahalvam ma chule ama hung kilah-a chu asuhmang ding ahi.

⁹ Hichepa hung chu Satan natoh dungjuija thilbolthei thahat le melchihna chule jouthil kidang bol chengsetoh hung kitho ding ahi,

¹⁰chule amangthahho chengse chu chonphat louna jouse-a doha lhep lhah-a um ahiuve; hichu amahon huhhing-a aumna dinguva, ngailutna thutah chu alah lou jeh-u ahi.

¹¹Chule hichena dinga hi Pathen'in amaho chunga chu suhkhel lamvaina natoh alhunsah ahi; chutia chu amahon thujou chu atahsan dingu;

¹²thutah tahsan louva chonset alunglam hijoho jouse thu kitan ding ahi.

¹³Amavang, Pakai ngailut sopiteho, nangho chungchanga imatihchana Pathen thangvah hi kakinu kabol ding dolu ahi; ajeh chu Lhagaova kona thenna-a chule thutah chu tahsan vanga atil abula pat Pathen'in huhhing-a umdinga nangho nalhenu ahi;

¹⁴Chule chuche lung ngaito-a chu I-Pakaiyu Jesu Christa loupina chu chang thei dinga kathuhil-u Kipana Thupha-a nakouvu ahi.

¹⁵Hijeh chun, sopiteho, pangdet jingun, kathuseiju hijongle, lekha thot hijongle, kahilna chengseu hi abonchan tuhdet jingun.

¹⁶Tun I-Pakaiyu Jesu Christa amatah-in, chule eingailua tonsot lungmonnale kinepna phatah lungset tah-a eipe-a, Pa Pathen chun nalungu monsah hen,

¹⁷chule thilpha bolna lam jouse-ale thupha seijah nalungu chu phutdet jingun.