Read Thado Chin 2 Thessalonica 3 Bible Online

2 Thessalonica 3 - Thado Chin bible

2 Thessalonica 3

¹Ajona-in, sopiteho, nangho lah-a banga chu Pathen thu gangtah-a achala aloupidohna dingin,

²michonsehole migilouho khutna kona kasochat theina dingun, keiho dingin neitaopeh jiuvin; ajeh chu koijakai jousen tahsan na aneipoi.

³Ahivangin Pakai chu tahsan umtah ahi; amatah chun naphudet dingu chule agilouva kona chu nahuhdoh dingu ahi.

⁴Chule kathupeh chengseu chu nanit jingui, chule nit jong nit jingunate, ti Pakaiyah nangho thudol ginchat kaneijui.

⁵Chule Pakai chun nalungu Pathen ngailutna lamale Christa thohhatna lama kaihoihen.

⁶Sopite, I-Pakaiyu Jesu Christa mina nangho hiche thuhi kapeh nahiuve, sopi koi hile dan ngailouva chona, chule keiho-a kona nakihilnao banga chon lou chu kivoppi hih-un.

⁷Nanghon keiho umchan natho dingu adol ahi chu nanghon nakihet naove; ajeh chu keiho nangho lah-a dan ngailouvin kachonpouve;

⁸Chule aman beijin koimacha an kanepouvin ahi; ahin nangho koima chunga poh gih pohsah louna dingin, sunle jan-in katong gimun pontho tah-in na katongun ahi;

⁹Hichu kahi thei lou jeh-u ahipoi; nanghon keiho umchan nathona dingu, nangho anga vettoh-a tho dinga kachuti chonu ahi.

¹⁰Natong nom lou chun an jong nehdahen, tia nalah uva kaum laija nangho thu kapehsa nahiuve.

¹¹Ajeh chu nangho lah-a abang khat dan ngailouvin achonun, natong louvin mi natoh sinmon avahlen ahi, ti kajauve.

¹²Hitobang mi chu Pakai Jesu Christa mina thu kapeh-a katil nahiuve, thipkhen chan na tonghen lang ama an kinehhen.

¹³Sopiteho, nangho vang thilpha bol chimtih nei hih-un.

¹⁴Chule hiche kalekha thot sunga kisun keiho thu ngailou chu nanghon ama chu melgelun, ama chu kivoppi, kiloipi daovin, ajachatna dingin;

¹⁵ahivangin melmah lungin gel hih-un; sopi tin tilkhoujovin.

¹⁶Tun chamle lungmon kona Pakai amatah-in imajousea nangho chamle lungmon pe jingun. Pakai chun nabonchaovin umpi jingun.

¹⁷Kasalamna hiche lekha hi keima Paul'in kakhut tah-a kasut ahi; lekha thot jouse amelchihna ahi, hitia hi kasutji ahi.

¹⁸I-Pakaiyu Jesu Christa milungset chun nabonchaovin umpi jingun, Amen.