Read Thado Chin 1 Timothy 1 Bible Online

1 Timothy 1 - Thado Chin bible

1 Timothy 1

¹Eihuh hinguva Pathen le kinepna Pakai Christa Jesu thupeh dungjuija, Christa Jesu solchah, Paul'in,

² tahsana kachapa tahbeh Timothy hengah, i-Pau Pathen le Christa Jesu'a konin lungsetle khotona chule lungmon nachunga umhen.

³Macedonia gama kache kona, mi abang khatnin thuhil lamdang ahil louna dingule, moh thusim chule tan thei lou khanggui thu, hichun tahsanna Pathen gou chinna lama phatchomsah tahsih-a kinelna akonsahjoh ahi.

⁴Angaisah louna dinguva, nahilchah theina dinga, Ephesus kho-a umin, tia kangeh banga chu, tu-a jong kati ahi.

⁵Ahivangin thu kipeh lona pen chu lungthengle ase apha hetna pha chule tahsan kichen tah-a kon ngailut chu anei theina dinguva ahi.

⁶Hichenga kon chun mi kimkhat akihei mangin moh houlimna lama avah koitaove.

⁷Athuseijula adih ahimonge tia atahtinao jong chu he louhelin, danthuhil ahi nomui.

⁸Ahin dan hi adoltah-a nitpa ding chun aphai ti iheuve;

⁹Ahinla dan hi michonpha dinga hilouva, dan sukeh thua nunglou, Pathen ngaisahlou chonseho, abohho athenglou, pathat, nuthat, mithat;

¹⁰mijong, palepa kikoi, mihem gu, mijou, chule jouva kihahsel; hiteho chengse dinga chule adang thuhilpha kicheh kaleh-a chon aumle, amaho chengse dinga chu kiphut ahi;

¹¹Hiche hi pachat umtah Pathen loupina Kipana Thupha keima eikivopsah dungjuija ahi.

¹²Keima thahat eipe-a I-Pakaiyu Jesu Christa chu kathangvah jinge, ajeh chu Aman keima ginchat uma eingaitoa, alhacha-a eipansah ahitai;

¹³ Tu masanga hou taitom kanahia, abolsea kanapana, susehat kanahi ahin: hinla tahsanlou jeh-a hettoh louva kanabol ahi jeh chun hepina kamutan ahi.

¹⁴Chule Christa Jesu'a tahsanna le ngailuttoh kitho-a I-Pakaiyu milungset chu hadima dimlet ahitai.

¹⁵Michonseho huhhing-a Jesu Christa vannoi leisetna hunga ahi, ti tahsan umtah hi mi jousen san cheh ding doltah ahi; hicheho lah-a chu keima apipen kahi;

¹⁶Ahin tonsotna hinna dinga Ama hintahsan dingho chun avettoh-a ajom dinguva, Jesu Christa'n athohhatna chengse chu apipen keija hi alahdoh theina dinga eihepi ahi.

¹⁷Tun tonsot Leng kem theilou, mu theilou, chule Pathen chingtah khatseh, ginnale jana chule aloupina chu atonsot atonsot khangin umjinghen. Amen.

¹⁸Kachapa Timothy, nangma tahsan neitahle ase apha hetna phatah neija, nangma umchan ding thudol masanga kiseisa chengse chu, hiche dungjuija chu phatah-a gal nasat theina dinga, hiche thupeh chu nangma kapeh nahi;

¹⁹Abang bangin chuche tahsan leh ase apha hetna chu apailhah jeh-un atahsan kong-u akehgamtai.

²⁰Amaho lah-a Hymenaeus le Alexander chu taitomna akisin lhon louna dinga, keiman Satan khutna kapehdoh ahitai.