Read Thado Chin 1 Timothy 3 Bible Online

1 Timothy 3 - Thado Chin bible

1 Timothy 3

¹Koi hile houbung lam kaija pan nom chun natoh pha alunggot ahi, tia kisei hi thudih tah ahi.

² Hijeh-a chu houbung lamkai chu nolna bei, numei khat ji-a nei, kitimthei, lunglimtah, kituptah, jindot them, mi hil them,

³Juheh lou, miden mang lou; alamlouva phatchomna ding ngaito-a kilose mi hilou, mi nunnem hi ding, dou hollou, sum ngailu lou;

⁴Ama insung phatecha potup thei, jana neitah-a achate athua nunsah thei mi hi ding ahi.

⁵(Ama insung chunga vaipohje he lou chun Pathen houbung ho chu iti avetsuija akaitup thei dingham?)

⁶Atahsan thah hilou ding ahi, ajole kiletsah hoithontin Diabol themmo sahna-a chu getninte;

⁷Chulou jong chu, polama mite seiphat jong hiding ahi; achuti loule seisetnin umintin Diabol thangah oh khante.

⁸Chutobangma chu houbung lhacha-a pang ding jong chu migun ja-umtah hiding, mi kamtam hilou ding, ju-a lop hilou ding, alam louva sum veikan lung go mi hilou ding;

⁹Chule sele pha hetna thenga tahsanna thuguh tuh mi hi ding ahi.

¹⁰Amaho chu kipatep masahen, chujoule nolna bei ahiu lebou, lhacha na tonguhen.

¹¹Chutobangma chu aji teo jong migun ja umtah, mihehse hatlou, kitim them, chule ijakaija tahsan um hiding ahi.

¹²Lhachaho chu numei khatseh ji hicheh hen, achate chengule a-insungu phatecha potup them cheh hiuhen.

¹³Ajeh chu houbung lhacha na phatecha tongho chun amaho dinga Christa Jesu'a um tahsan na-a chun dinmun pha le hansana nasatah akilodoh jiuvin ahi.

¹⁴Chomkhat joule naheng lama hung ding kinema, hiche hi kahinsut ahi;

¹⁵Ahinla kahung gei khatle, thutah khom le abul Pathen hing houbung, Pathen insunga chu mi itobanga iti umchan dingdol ahi nahetna dinga kahin sut ahi.

¹⁶Pathen ngaisahna thuguh chu nelkalna beihela lena ahi; Pathen chu tahsa-a ahung kiphongin, Lhagaova them changin, Vantil ten amuvin, Chidang namdang lah-a seiphongin aumin, Vannoi'a tahsanin aumin, Loupia lahtouvin aumtan ahi.