Read Thado Chin 1 Timothy 6 Bible Online

1 Timothy 6 - Thado Chin bible

1 Timothy 6

¹Pathen min chule athuhil chu taitoma aum louna dingin, namkoljon poh noija um soh ho chengsen a-pakaite chengu chu jabolna changdinga lom ahiubang tah-in bulhing setnin jaboluhen.

²Chule atahsana pakai neihon amaho chu sopi ahi jeh chun nahsahmon boldao hen; chusangin hajen chehjohen, ajeh chu anatoh naova kon phatchomna muho chu atahsana le amaho dinga dei umtah ho ahiuve. Hitiho thuhi hil inlang tilkhouvin.

³Mi khattou thuhil chomdang hila auma, thupha kicheh, I-Pakaiyu Jesu Christa thu leh Pathen ngaisahna lam thuhilpha chu asan louleh;

⁴Ama chu ahoithojin, imachala ahejipoi; hettah sangin kinelna, thu nelkalna hivei aveijin, hia kon chun kithangset, kinah, kiseisetto, kiginmo, nelhatna asohjin ahi;

⁵chutobang miho lung chu sesohjia ahin, thutah neilou ahiuvin, Pathen ngaisahna hi sumlam phatchomnan angaito jiuve, hitobanga kon chun kikangsen.

⁶Ahin lunglhaisela Pathen ngaisah hi phatchomna tah chu ahi;

⁷Ajeh chu eihon vannoi'a hin imacha ihinpo lutpouve, chule atahbeh-in hichea kona jong imacha ipohdoh thei dingu ahipoi;

⁸Ahinla eihon anneh chule nihchen ponsil ineijule hichea chu ilunglhai jeng dingu ahi.

⁹Hao lung goho vang chu lhepna-a leh thangkola chule ngolna tintangle suhset nomna lam tamtah-a alha lutjiuvin, miho suhgamnale manthah na-a alhah lhumsah jiuve.

¹⁰Ajeh chu sum ngailut hi setna jouse bul ahi; hichu mu ding akihabolna lama mi kimkhat tahsana-a konin avah mangun, amahole amaho lunghemna tamtah-in akisun jiuve.

¹¹Ahin, Pathen mi, nangma vang hichenga kon chun jamin; chule chonphatna, Pathen ngaisahna, tahsan, ngailutna, thohhatna, nunnem na, hicheng chu delin.

¹²Tahsan kisehna pha-a kihaseh-in ponpanin, tonsot hin kemlou chu tuh jingin; hiche dinga chu kikou nahi; chule ahetoh tamtah ang sunga phondohna phatah chu naphondoh ahitai.

¹³ Imajouse hinsah Pathen leh Pontius Pilate ang sunga phondoh phatah phongdoh-ah Christa Jesu mitmu-a, hiche thupeh hi kapeh nahi,

¹⁴I-Pakaiyu Jesu Christa hung kilah kahsen, nangman thupeh hi boh beh louhelle seisetna um louhelin chingin.

¹⁵Thunei khatseh, lengho Leng leh pakaiho Pakai, pachat umtah chu aphatcha hung kilah ding ahi;

¹⁶Ama changsehbou chu thilouna neija ahin, nailut theihoi hilou vah-a chenga ahi; ama chu koiman mukha lou chule mu jong mu thei lou ahi, ama jenga chun choi-at le tonsot thilbol thei thahat chu umjing hen. Amen.

¹⁷Tu hinkho-a vannoi leiset thila haoho chu ahoitho louna dingun hilchah-in, kichetna bei suma kingai louvin, thil jouse imanchah dinga eipeuva Pathen joh-a kingaijuhen;

¹⁸Amahon thilpha boluhen, thilpha bola chun hao uhen; hop ding jong phaluhen, mi tonan jong thanomuhen;

¹⁹Tonsot hinna chu atuhchah theina dingun, khonung hinkho-a dinga bulpha neija akikhol theina dingun hilin.

²⁰Vo Timothy, nangma nakichin sah chengse hi hongphan; chule hou seisetna thumotsei amahon chihna atiu, alam loutah-a kinelna-a kon chun kihei mangin;

²¹Mi kimkhat hiche chihna chu ahoitho piuvin, tahsan nalama abidoiju akheltaove. Lungsetna chu nachunga umhen, Amen.