Read Thado Chin 2 Timothy 1 Bible Online

2 Timothy 1 - Thado Chin bible

2 Timothy 1

¹Christa Jesu'a um hinna thutep dungjuija Pathen lunggot tah-a kipansah Jesu Christa solchah, Paul'in,

² kacha ngaitah Timothy hengah; Pa Pathen le I-Pakaiyu Christa Jesu'a konin lungset, hepi chule lungmon nachungah umhen.

³Kapute kapatea kona sele pha hetna thenga kahou Pathen chu thangvah jia katao lai chana nangma geldoh jinga um kahi;

⁴Namit lhi lon chu kageldoh jingin, kipana kadim theina dinga, nangma mu noma asun ajana tao jing jeng kahi.

⁵ Tahsan kijentah nanga aum chu kageldoh jinge, masanga napi Lois lung sungle nanu Eunice lung sunga chenga chu, nang lung sunga jong achen kagingchai.

⁶Hijeh-a chu keima khut ngap vanga Pathen thilpeh nanga umchu nakonsah jing theina dinga, kahin geldohsah kit nahi.

⁷Ajeh chu Pathen'in eiho kichatsetna lhagao eipepouve, thilbolthei thahat le ngailut, chule lungthim themna lhagaobou eipeh-u ahi.

⁸Hijeh chun I-Pakaiyu thu hettohsah thulam dolle asohchang keima chungchang thudola jong jahcha hih helin; ahin Pathen thilbolthei thahat dungjuijin Kipana Thupha jala thoh hahsa hi neithohpin;

⁹Amatah chun eihuhhingu ahi, chule kouna thenga eikouvu ahi; eiho natoh dungjuija ahipoi, ama lunggotle amilungset dungjui-a bou ahi; hiche lungsetna chu tonsot tonsot masang peh-a Christa Jesu'a eiho eina pehsao ahi;

¹⁰Ahin tu-a vang Eihuh hinga Christa Jesu hung kilah-a kona kilangdoh ahitai, aman thina asubeijin Kipana Thupha-a hinna le thilouna chu vah-a ahinpoh ahi;

¹¹ Hiche Kipana Thupha lama chu keima chidang namdang te henga lhangsamle solchah chule houhila panga kahi.

¹²Hijeh-a chu hesoh genthei hichengpi hi kathoh ahi; ahinla kajahchapoi; ajeh chu katahsan chu keiman kahei; chule avop dinga akhutna kapehdoh chengse chu chuche nikho-a dinga chu voppha-a hongbit thei ahi, ti katahsan kichene.

¹³Keima-a kona najah thupha kichehho vettoh-a jui ding dol chengse chu Christa Jesu'a um ginchatnale ngailutna chun tuh jingin.

¹⁴Nangma kipe-a thilpha chu eihoa chenga Lhagao Theng chun hongphan.

¹⁵Phygellus le Hermogenes teho Asia gama um chengsen einung ngatsoh taove, hichu nangin nahenai.

¹⁶Onesiphorus insung mite chu Pakaiyin hepihen; ajeh chu aman kalung asuhal matchet jingjin ahi; chule kabulput jong ajachat pipoi;

¹⁷Ahin Rome kho-a ahungin jong gunchu tah-in eiholin eihung holdoh jengin ahi.

¹⁸Pakaiyin ama chu hiche phattheina hi pehen, hiche nikho ni chule Pakai koma hepina changhen; chule Ephesus kho-a alhacha natoh nasatje chu nangman nahenai.