Read Thado Chin 2 Timothy 2 Bible Online

2 Timothy 2 - Thado Chin bible

2 Timothy 2

¹Chuti ahi jeh chun, kacha, nangma Christa Jesu'a uma lungsetna-a chun thilboltheina thahat neijin umin.

²Chule ahetoh tamtah ang sunga keima-a kona najah chengse chu ginchat um miho chu pedoh-in, amaho jong chun midangho ahil thei dingu ahi.

³Nangman Christa Jesu sepai phatah bangin ahahsa kathohgim hi neithohpin.

⁴Sepai galsat pet koima tu hinkho-a khankho ding gelnan akisunoh jipoi, pha sa-a sepaija apansahpa lunglhaisah dingbou alung ahi.

⁵Chule golseh kitetna jenga jong khattouvin gol jona dingin kihabol nama jeng jongle, dan ngaitah-a abol loule, lal lukhuh akhuhjipoi.

⁶Loubol mi natongima chu agam ga chang masapen dingdol ahi.

⁷Kasei hi ipi ahi geltohin; ajeh chu Pakaiyin imalam jouse-a lungthim napeh ding ahi.

⁸Kathuhil Kipana Thupha dungjuija, athi lah-a kona thoudoh kit, David chilhah Jesu Christa chu geldoh jing jengin;

⁹Hiche Kipana Thupha jeh-a chu keima akhanggilou banga bulput geija hesoh genthei kathoh ahi; ahivangin Pathen thu chu akihentang dehpoi.

¹⁰Hijeh-a chu keiman lhenchom ho dinga, amaho Christa Jesu'a um huhhingna chu achan theijuva tonsot loupina chutoh anei theina dinguva, hichengpi hi kathohgim ahi.

¹¹Hiche kisei hi ginchat umtah kisei ahi, Athina-a ithiule ahinna-a jong ihin dingu;

¹² Athoh chu ithohpiule avaipoh jong ipohpi dingu ahi; eihon ama seilepleu hen, aman jong eiseilep dingu ahi;

¹³Eiho ginchatna bei ihiule, ama chu ginchat umtah hijing ahi; ajeh chu ama kiseilep thei lou ahi.

¹⁴Nangman thu hicheng hi geldohsah jingin; phatchomna bei moh thu pouva akinel baotam louna dingun, Pakai anga hilchahjin; amaho dinga mansuhna ahibouve.

¹⁵Nangma kipatep themchang banga Pathen'a kipehna dingin, gunchun ponpanin, jachatna beihel natong mi hin, thutah thu chu jangkeichan homjallin.

¹⁶Amavang Pathen jalouna, hou seisetna, moh thu mai maija konin kihei mangin; ajeh chu chutobang deiho chu Pathen ngaisahmo na lama chal tou cheh cheh ding ahiuve;

¹⁷Chule athu-u jong chun masemon nehkem banga aneh dingu ahi: alah uva lha-a chu Hymenaeus le Philetus ahilhone;

¹⁸Amaho chu thutah lampia kona petmanga ahiuvin, amahon Thokitna chu kichaisa ahitai atiuvin, mi kimkhat tahsanna alehei taove.

¹⁹ Ahinla Pathen khombul phu dettah chu ading jingnai; achunga hiche thuhi Kinama ahin, koi koi ama-a ahi Pakaiyin ahenai. Chule, koi hile Christa min pana chu chonphat louva konin kikhin manghen.

²⁰Amavang inpi sunga khun sanale dangka bel jeng uma ahipoi, thingle leibel jong aumin, hicheho chu abang sahlut dol aumin, abang sahlut lou dol aume.

²¹Hichenga kona kithensodoh chu ama chu sahlut doltah ahi, akisutheng ahin, Pakai natonga lomtah ahin, chule thilpha bolna lam jouse-a dinga kigosa ahi.

²²Nangma vang gollhanlai lungtup lungngaija konin jamin; chule chonphatna, tahsan, ngailut, lungmon, chule lungthengsela Pakai henga taoho toh pumkhat hina hicheng chu hadelin,

²³Ahin ngolkaile lungthimbeiho kinelna-a lhah ding nom hihhelin; hichea kon chun kinahna asohjin ahi, nahei.

²⁴Pakai soh chun doubol angai ahipoi; chusanga chu mi jouse dinga nunnema, mihil thema, lungdehat ding,

²⁵Chule lungnema adouho chu apuijang dingjoh ahibouve; chutia chu Pathen'in ijem tia thutah hetna lama lungheina apeh khatle;

²⁶Ama lunggot lama Diabol'in gal hinga amatnao thangkola kon chun kiteldoh thei khat nunte.