Read Thado Chin 2 Timothy 3 Bible Online

2 Timothy 3 - Thado Chin bible

2 Timothy 3

¹Amavang hiche hi heuvin, ni nunung lamle phat hahsa khohtah hung lhung ding ahi.

²Hiche teng chule mi amachangmai kingailua, sum ngailut, nomham, huset le hoitho, taitomhat, nu thu pa thu ngailou, phatna ngaisah lou, then louna,

³Lungsetna neilou, kihou champi mohel, hehset hat, ti kitimlou, kichat um, phatna ho-a,

⁴Tahsan pailha, kichamsah,kiletsah, chule Pathen ngailut sanga nopsah ngailut johna;

⁵Pathen ngaisah lhem-a athahat athilbol thei janom lou, hicheng chu hung umding ahi; hichenga kon jong chun kihei mangin.

⁶Amaho lah-a kimkhat doha lungthimin mi ina alutjiuvin, chonset pohgih po-a, lung ngaichat tamtah puilonle,

⁷Chule akihil jing vanga thutah hetheilou numei lungthimbeiho chu alhem lhaovin, gal hingin amanjiovin ahi.

⁸ Chule Jannes le Jambres in Mosi adoudal lhon bang banga chu hiteho jong hin thutah chu adoudalu ahi; lungput sesa, tahsan lam thua Pathen deimo mi ahiuve.

⁹Ahivangin amaho chu gamlatah mason lou ding ahiuve; khatteni banga chu amaho jong angolnao chu mi jouse jah-a kisei phongle ding ahi.

¹⁰Nangma vang kathuhil, kanun kakhan, kalunggot, tahsan, thohhat, ngailut, lungdehat, bolsetna tintangle, hesoh genthei kathoh nungjuija nahi tai.

¹¹ Antioch kho-a, Iconium'a chule Lystra kho chengsea kachunga itobang thu sohtam, bolsetna ijat kathoh hitam, ahin Pakaiyin chutiho jouse-a kon chun eihuhdoh tai.

¹²Chule koi hile Pathen ngaisah kijentah-a Christa Jesu'a hinding lung go chan chun bolsetna athoh ding ahi.

¹³Ahin migilouho chule milhemlhaho vang chu setna lama khangtou cheh cheh ding ahiuve; amaho doha kilhemlha ahiuvin, doha alheplhah dingu ahi.

¹⁴Ahin nangma vang nakihilsa chengsele naphotchensa chengsea chun dingdet jingin; koi koija kona kihila nahi nangman nahenai.

¹⁵Chule huhhing-a umna dinga nachihsah thei Pathen lekhabu theng chu nachapan laija patna nahin hetsapeh ahitai.

¹⁶Pathen'in ahaikhum Pathen lekhabua thu kisun chengse chu kihilna-a, kiphona-a, kipuijangna-a, chonphat kisinsahna dinga phatah ahi;

¹⁷chutia chu Pathen mi chu pha chamkim keija, thilpha bolna lama chamkim keija kigosa dema um thei ding ahi.