Read Thado Chin 2 Timothy 4 Bible Online

2 Timothy 4 - Thado Chin bible

2 Timothy 4

¹Hijeh-a chu keiman Pathen anga ahingle athiho thu tan dinga Pakai Jesu Christa anga, ama hung kilahna le alenggam chu pana guntah-a kahilchah nahi;

²Thu chu hil lhanglen; aphatle aphat louva jong kigosan umjing jengin; lungnengin hiltoh thonlang, athemo nao hetsahjinlang, sosaljin chule tilkhoujin.

³Ajeh chu hitobang phat hi hung lhung ding ahi, mihon thuhilpha kicheh chu angai thei lou ding, akolu thah tuntuna ama ama lung ngaichat dungjuija, mihil akikhop khom dingu ahi;

⁴Chule thutah-a kona anau ahei manguva, moh thusim lama lamvai dingu ahi.

⁵Ahin nangma vang imalam jouse-a limgehchan um jingin; thohhahsa thoh-in, evangelist na chu tongin; nalhacha natoh chu bulhit molson.

⁶Ajeh chu tu-a hi keima eikipedohsa ahitai, kapotdoh phat hung lhunga ahitai.

⁷Golseh phatah chu kaseh joutai, kalhaitetna kachaitai, tahsan chu kamolsoi,

⁸tu-a kipat hi keima dinga chonphatna lal lukhuh chu koisa uma ahitai; chondih-a thutan Pakai chun hiche nikho ni chule eipeh ding ahi; keima chang jenggoh hilouva, ama hung kilah ngailu chengse jong chu apeh ding ahi.

⁹Kaheng lama hungvahna dingin hung kihabolin;

¹⁰ Demas'in tulai vannoi leiset angailut jeh-in, keima eidalhan Thessalonica'a achetai; Crescen Galatia lama achen, chule Titus Dalmatia lama achei;

¹¹ Luke changseh keimatoh kaume. Mark hinpuijin hung lhonin; ama chu lhacha natohna-a kadinga phachom tah ahi.

¹² Tychicus vang Ephesus lama kasoltai.

¹³ Troas khopi-a Carpus khutna kasangkhol len kadalhah chule lekhabu ho, ahideh-a savun lekhabu ho chu, nahung tengle hinpon.

¹⁴ Alexander sumsan kheng chu kachunga akhang gilou lheh jenge; athilbol dungjuijin Pakaiyin lethuh nante.

¹⁵Nangjong ama lama chun hung kihongphan; ama chun ithu-u hi hadouvin adoudalin ahi.

¹⁶Keima kakihona thu kasei masahpen chun koimacha eipanpi aumpon, mijousen eidalha sohkeijun ahi; hichu amaho themon kisim hihhen tia Pathen henga katao ahi.

¹⁷Achuti vangin keima vanga thu chu hillhanga aum sohkeija, chidang namdangho jousen ahet theina dingun, Pakai chun eidinpin eihat sahtai; hichun keipi kam sunga kon chun kasohchatan ahi.

¹⁸Pakai chun gitlou thilbol jouse-a konin eihuh doh-intin, avan gama dingin eihuhhing nante; Minlet loupi chu tonsot tonsot geijin ama-a hi jinghen. Amen.

¹⁹ Priscilla le Aquila chule Onesiphorus insung mite chu salam'in.

²⁰ Erastus Corinth-a aumdentai; Trophimus vang anat jeh-in Miletus-a kadalhatai.

²¹Nangma phalbi kah-a hung dingin hung kihabolin. Eubulus teho, Puden teho, Linus teho, chule sopite jousen nasalamui.

²²Pakai Jesu Christa'n nalhagao umpihen. Nabonchao chunga Pathen lungsetna umhen, Amen.