Read Thado Chin Titus 2 Bible Online

Titus 2 - Thado Chin bible

Titus 2

¹Nangma vangin thuhilpha kicheh chutoh kitoh thu seijin;

²Upaho chu kitim thei, ja umtah, lunglimtah, chule ngailutna le ginchat, chule lungdehat kichehtah mi ahi theina dingun, hilin;

³Chutima chun nupi tehse ho jong chu mi ja um gingkhen hiuhen, mi hehsehat le lengpitwi tamtah sohnu hilouva, thilpha lama mihil hiuhen;

⁴Chutia chu amaho chun nutil khangdongho chu a-inneipute chengu ngailutle achateu ngailutje kisinsah uhen;

⁵Alung limgeh, chon thengtah, inmun natong mi ahiuva, mihepi them ahiuva, a-inneipute chengu thu amanuva, chutia chu Pathen thu chu taitoma aum louna dingin, hilin.

⁶Chutobangma chun gollhangho chu lunglim gehcha aumna dingun tilkhouvin;

⁷Imalam jouse-a amahon thilpha bolna lama avettoh-a ajui dingun umin; nathuhila chun bohbehlou nahidan, nabukim dan, nakitahje dan musah-in,

⁸Seiset oimo-a aum louna dingin, chutia chu akaleh lama panga chu ichunguva thuse sei ding nei louva ajachat theina dingin.

⁹Soh ho chu a-pakai ho chengu thu noija aumna dingule imalam jouse-a amaho lunglhaina lama aumna dingun tilkhouvin; nelkal louhel hiuhen;

¹⁰Imacha kiseldoh nei louvin tahsanpha kichehtah musah hiuhen; chutia chu imalam jouse-a Eihuh hinguva Pathen thuhil chu ajephoi theina dingun.

¹¹Ajeh chu Pathen milungset hung kilah-a mi jouse huhhingna chu ahinlhut ahitai;

¹²Hitia chu eiho, Pathen ngaisah lounale vannoi leiset lung ngaichat jouse pumpaija, lunglima chondih-a chule Pathen ngaisahna neija tu khanga hi ikhosah dingu ahi,

¹³Chule kinepna thanop um tah chule Pathen loupi chungnungle Eihuh hinguva Jesu Christa loupina hung kilah dinga chu kat jinga i-um dingu ahi chu, eihilu ahitai;

¹⁴ Chonphat louna jouse-a kona aman apeh-a eiho eilhatdoh theina dingule, ama-a hi dinga thilpha bola tompan mi vai khat ama dinga akisuhtheng theina dinga, ama chu eiho dinga kipedoh ahitai.

¹⁵Nangman thu hicheng hi seijin, thunei kimkei tah-in tilkhouvin, phohsalin; koimacha kinahsahmosah hihhelin.