Read Thado Chin Titus 3 Bible Online

Titus 3 - Thado Chin bible

Titus 3

¹Nangman amaho chu vaipoho le thunei ho thu noija umdingin, sei ngaija thua nung dingin, thilpha bol lam jouse-a kigosa dema umdingin,

²chule mi koima seise louhela, mi koima setna hol louva, chonnema, mi jouse chunga nunnema chon dingin jong hilphan.

³Ajeh chu eiho jong masanga chu lungthimbei, sei ngailou, thua nunglou, lheplhah, lungngai chatle nomsahna tamtah soh anahia, kimitthiple kithangset to-a uma, hot hattah-a khatle khat kihoto-a inahiu ahi.

⁴Ahinla Eihuh hinguva Pathen mihepile mihem angailutna ahung kilahdoh phat hin,

⁵Eihon eiho chama ibolu chonphat thilbol vanga hilouva, aman amilungset dungjuija eihuhdoh uva, penthahna-a asila, lhagao thenga athah sema;

⁶Eihuh hinguva Jesu Christa-a kona ichunguva letset tah-a asunlhah-a eihuhhingu ahi;

⁷Hichu amilungset vanga themchanga i-um uva, tonsot hin kemlou kinepna dungjuija gouloa eikisem theina dingu ahi.

⁸Hiche thu kiseija hi ginchat umtah ahi; chule nangman hiti thu dola hin thu akichetje chu seijin; Pathen tahsan ho chun thilpha bol jing leu kalung ahi. Hitiho hi miho dinga aphale phatchomna ahi.

⁹Amavang ngolhoi thudohhole khanggui thu kinel baotam, danthu dola kinah, hichenga kon chun nangma kiheimangin; hicheng chu phatchomna ahipoi, mohseh ahibouve.

¹⁰Loitumbol mi chu khatvei nivei nahilchah kalin lata hih-in;

¹¹Hitobang mi chu lamvaija chule chonsejia ahi ti nahei, amale ama themlou kichan ahi.

¹² Keiman naheng lama Artimas ahiloule Tychicus kahinsola ahile, Nicopolis'a kahenga hung dingin hung kihabolin; chukoma chu phalbi sungse-a umding kagel lhuh ahitai;

¹³ Dan thusun Zenas le Apollos ima alhahsam lhon louna dingin, lungthim themtah-in hinlha doh-in.

¹⁴Imiteu jong chu aboithei louna dingle thil ngaichat lhahsam louna dinga, thilpha bolna-a amakai theina dingun kisin uhen.

¹⁵Kaumpi chengsen abonchauvin nasalamui. Tahsan na-a eingailuho chengse salam'in. Nabon chaova chunga lungsetna umhen, Amen.