Read Thado Chin Hebrai 1 Bible Online

Hebrai 1 - Thado Chin bible

Hebrai 1

¹Masang laijin Pathen'in abung abungin got chom got chomin themgaoho kamin iputeu ipateu hengah thu aseijin,

²tulai ni nununga hin Achapan eiho hengah thu aseitai; hiche Achapatah chu imajouse gouloa atun ahitai, chule thilsem jouse jong hi ama khutna asemsah ahi.

³Hiche Chapa chu aloupina vah le aumje kibahpi ama limtah ahin, athahatna thua ijakai tuh dinga ahin, amatah chun chonsetna asuthengin chungnunga Lal Chungnung pen jet lamah atoutai.

⁴Chule aman vantil ho sanga min phajo gou alo bangtah-in amaho sangin achungnung jotai.

⁵ Ijeh-inem itile vantil ho koipen jah-a itih pena, Nangma ka-Chapa nahi, Tunia keiman kahin nahitai? chujongle, Keima a-Pa kahi ding ahin, Ama ka-Chapa hi ding ahi tia aseikhah-em?

⁶ Ahin hiche apeng masapen chu vannoi leisetna ahinpui kit ding tenga ding chun, Pathen vantilte jousen ama chu chibai bohhen, ati.

⁷ Chule vantilte chungchang thua hitin aseije, Aman avantilho lhagao asosahjin, Alhachate chu meikong asosahjin ahi.

⁸ Chapa chungchang thua vang chun hiti hin aseije, Vo Pathen, nalaltouna chu tonsot tonsot geija umjing jeng ahi; Chule chondihna tengdop chu nagam tengdop ahi.

⁹Nangman chonphat nangailun, khan gitlou nahon ahi; Hijeh chun Pathen'in, na-Pathen'in, naloite chengse chungvumah kipana thao nanutan ahi.

¹⁰ Chule, Pakai, atil abula nangman vannoi leiset bul naphudoh ahi; Chule vanho jong nangma khutsoh ahi.

¹¹Hiteho chu mangthah ding ahi, nangma vang umjing jeng nahi; Hichengse chu ponsil banga lui ding ahi;

¹²Hiteho chu nangman ponlhe banga najel lom ding ahi; Hichengse chu ponsil banga kikhel ding ahi; Nangma vang nabang nahi jinge; Nakum jong bei lou ding ahi.

¹³ Ahivangin keiman, Namelmate nakeng chotpha kaneisah masangsen, Kajet lamah tou jingin, tia vantil ho koipen jah-a aseikhah-em?

¹⁴Amaho chengse chu lhachale lhagao, sochatna gouloding teho jenle ding hinkisoldoh hilouham?