Read Thado Chin Hebrai 10 Bible Online

Hebrai 10 - Thado Chin bible

Hebrai 10

¹Danthu chu khonunga thilpha hung umding lima hi umbou ahin, alim tahbeh ahi lou jeh chun, akumtina longlhenna alhajiu chun ahin naiho chu achamkimsah joupouvin ahi.

²Chuti lou hile longlhenna alhajiu chu tangta lou dingham? Ahouho chu khatveija kisutheng hileu setna ahetnao chu umtalou ding ahi.

³Ahinla hicheng chun kumtin in achonsetnao ageldohsah jotaovin ahi.

⁴Ajeh iham itile bongchal le kelcha thisana chonset suhbeihoi hilou ahi.

⁵ Hijeh chun Christan vannoi leisetna ahung lut laijin, Nangman longlhenle thilto nanadeipon, Ahin keima dingin tahsa neigot pehtan ahi;

⁶Ganpumgo thilto le chonset thensona longlhenna chun nana lunglhai tapon ahi;

⁷Chuin keiman, Ven, keima kahungtai (Lekhabua keima thudola hitin akisune). Vo Pathen, keiman nangma lungdeilam bol dinga hung kahi kati, tin aseije.

⁸Aman hicheng chu aseijin, Nangman longlhenna le thilto chule ganpumgo thilto chule chonset thensona longlhen chu nanadeitapon, hichenga chun lung jong nana lunglhai pon ahi, (hichu danthu dungjuija kitoh ahi jeh-in):

⁹Chujouvin, o Pathen Ven, keima nangma lungdeilam bol dinga hung kahi, ati. Hiche anunungjo hi aphudohna dinga amasajo alahdoh ahitai.

¹⁰Hiche lungdei lama chu Jesu Christa tahsa akitoa a-imatih chana dinga khatveija akitodoh jeng vanga chu eiho suhthenga uma ihitaove.

¹¹ Chule thempuho chengse adingun niseh-in hou lhachalen apangun, imatih chana chonset sumang theilou longlhen chu avel avelin atohdoh jiuvin ahi.

¹² Ama vangin chonset thensona longlhen khatseh chu tonsot geija dingin atohdoh-in, Pathen khut jet lama atouvin,

¹³Hiche kalse chun amelmaho akeng chotpha akisem masang seuvin angah jingin ahi.

¹⁴Ijeh-inem itile suhthenga umho chu thilto khatseh-in tonsot geija dinga achamkimsah ahitai.

¹⁵Chule Lhagao Theng jongin eihet tohsah naove;

¹⁶ ajeh iham itile Chuteng chuche ninung le chun amahotoh kitepna Kaphudoh ding chu hiche ahi, tin Pakai chun aseije: Keiman alung sunguva kachondan thupeh pengting, Chule alunguva kasut ding ahi, tia aseijouvin, hiche aseijouma chun,

¹⁷ Chule achonsetnao le asuhkhelnau geldoh taponge, ati kitleuve.

¹⁸Chutia chu chonsetna chengse ngaidama um ahitan, chonset thensona thilto umtalou ahi.

¹⁹Hiche jeh chun, sopiteho, Jesu'n pondal ajotpaija atahsa puma hinna lam thah eisempeh uva chu,

²⁰Jesu thisan vanga Mun Thenga lut ngamna ineiju ahin,

²¹Pathen insung chunga kitung thempulen chungnung ineiju ahin,

²² Chule ase apha ihetnao ilung sunguva aphalou chengse atheh ngima, itahsao twi thenga kisilngima ahitah jeh chun, lung dihtah pun tahsan kichentah-in Pathen kom naiju hitin,

²³Itahsan, ikinepnao hi long louhelin tuh det jinguhite; (ajeh chu thutep pa chu tahsan umtah ahi.)

²⁴Chule ngailutna le thilpha bolna lama lungsoudohna dingin kingaitopeh chehjiu hite;

²⁵Abang khattou chonna bangin ikikhop hai louvin, nikho chu ahungnai tultulle ti ihet chanun, khatle khat kitilkhouto chehjiuhite.

²⁶Ajeh chu eihon thutah hetna inei nungun, ihenasale ijanasan chonset bol leuhen, chonset jala longlhenna akikheh umtalou ahin;

²⁷ Thutanna kichat umtah ngah jinga chule adouho kavam gam dingkon lungsatna meikong bou uma ahi.

²⁸ Koi hile Mosi danthu nahsahmo-a chu ahetoh mi ni le thum kam sung thua kona hepina beihela thia ahi.

²⁹ Chuti ahile Pathen Chapa akengtoa chotpha, chule akisuh thengna kitepna thisan chu atheng louva ngaito-a, chule lungsetna Lhagao nahsahmo-a bola chu nangho lunggela, hiche sanga chu ichana khoh chungchon talent man ding dola nakilomsah um?

³⁰ Ajeh iham itile, Phulah ding chu keija ahi; keimanbou phuba chu kasah ding ahi tin Pakaiyin aseije; chukitle, Pakai chun amite thu atan ding ahi, tia hicheng seija chu keihon kaheuve.

³¹Pathen hing khutna chuh chu kichat umtah ahi.

³²Ahi vangin nanghon masanga khovah namu nunguva hesoh genthei thoh hahsa nathoh laiju chu geldoh jingun.

³³Langkhatna housetle hesoh genthei thoh hahsa thoh laiju, chule alangkhatna hesoh genthei thoh lah-a nahung pannu chu geldoh jingun.

³⁴Ajeh chu nanghon kakihenna ho-a jong neina khotouvin, chule gamchenga phajole imatih chana umjing van'a gou naneiju chu naheuvin, naneiju kichom chu kipahtah-in nanatoh jengtaovin ahi.

³⁵Hiche jeh chun chonphatman lentah nei dinga nahakat nao chu pailha hihhelun.

³⁶Ajeh iham itile nanghon thutep chu nasan theina dinguva, Pathen lung deilam nabol uva pontho tah-a nathohhat dingu angaije.

³⁷ Ajeh iham itile chomcha khat joule Ahung dinga chu hung ding ahi, Hung geisang lou ding ahi.

³⁸Michonpha vang chu atahsan vanga hing ding ahi; Chule anungchon vangle achunga kalung lhai lou ding ahi, ati.

³⁹Ahin eiho vang manthah na lama nungchon ho lah-a mi ihipouvin, lhagao huhhing-a umna dinga tahsan ho lah-a joh ihibovui.