Read Thado Chin Hebrai 11 Bible Online

Hebrai 11 - Thado Chin bible

Hebrai 11

¹Tahsan hi kinepna thilho hetchetna, mu lou thil aum monge ti photchena ahi.

²Ajeh chu hiche thua hi upahon hettohsahna ananeiju ahi.

³ Tahsan vangin vannoi leiset hi Pathen thua kisuto-a kisema ahi ti iheuve; chuti chu ahin, thil kimuho chengse hi thil kilanghoa kona kisem ahipoi.

⁴ Tahsan vangin Abel'in Cain sangin thensona longlhen phajo alhan, ama chu michonpha ahi ti hettohsahna ananeijin, athilpeh thudol Pathen'in ahettohsah-in: chule hiche vang chun ama athisa ahivangin thu aseije.

⁵ Tahsan vangin thina amu louna dingin Enoch chu lah mangin aumtan; Pathen'in alah mangtah jeh chun ama chu akimutapon ahi; lah manga aum masangin Pathen lungtoh mitah ahi ti hettohsahna ananeijin ahi.

⁶Ahin tahsan beija vang Pathen lung tohoi ahipoi; ajeh chu Pathen aume chule ama holte chu tohphat man apei ti chu ama kom naijan atahsan dingdol thu ahi.

⁷ Tahsan vangin Noah'in mu loulai thilsoh ding thuah hilchahna thu amun, Pathen ngaisahna neijin akichan, ama insung mi huhhingna dingin kong innei khat asan ahi; chule hiche vang chun vannoi themmo achansah-in ama tahsana chonphat chu achangtan ahi.

⁸ Tahsan vangin Abraham, akikou chun, alo dinga um mun'a chu lut dingin potdohna ding thun anungin ahi; chule hoilama ache ding jong helouvin akipatnin achedoh jengtan anahi.

⁹ Tahsan vangin gamtep gama chun mi gama pem bangin apem jengtan ahi; chuche gamtep chu alopi ding Isaac le Jacob toh pon in'ah acheng khomin anahi.

¹⁰Ajeh iham itile aman, abul nei khopi, asemtohle asadoh Pathen, hichu anga jing ahi.

¹¹ Tahsan vangin Sara'in jong ateh nungin, athuteppa chu tahsan umtah-a angaito jeh chun nao vop theina aneitan, chule chapang khat apengtan ahi.

¹² Hiche jeh chun athikon khatna konin van'a ahsi jatle twikhanglen kama neldi jatna tam, simsenlou apengdoh jengtan ahi.

¹³ Hiteho chengse chu tahsan neijin athigam taovin ahi, thutep thilteho chu achang lou ahitaove, ahivangin hiteho chu gamlatah-a pangin amuvin, akolchah-un, chule amaho chu leiset chunga kholjinle gamdang mi ahiu chu aseidoh uvin ahi.

¹⁴Ijeh ham itile chutobanga thusei ho chun amaho gamtum ding aholu ahi ti chu aphondoh-u ahi.

¹⁵Amahon ahung kondohnao gam chu lunga agel jingleu, akile kitna dingu phat gomkom anei dingu ahi.

¹⁶Ahin tun amahon chuche sanga phajo nomjo khat atupmu ahin, hichu vangam ahi. Hiche jeh-a chu amaho Pathen tia kisei ding chu Pathen kijapi lou ahi; ajeh iham itile amaho dinga chu khopi khat gotsa akoi ahi.

¹⁷ Abraham patepmin aumin ahile, tahsan vangin Isaac atoh jengtan ahi; chule kipahtah-a thutep changpa chun, ajah-a,

¹⁸ Isaac'a kona nachilhah kisei ding ahi, tia kisei achapa changkhatseh chu peh dingin ago jengin ahi;

¹⁹Ajeh chu Pathen'in athi lah-a kona jong akaithou thei ahi ti agel ahi; chule tekahnan ama chu achang kittan ahi.

²⁰ Tahsan vangin Isaac'in khonunga hung lhung ding thuah Jacob le Esau phatthei aboh-in ahi.

²¹ Tahsan vangin Jacob chun athi konin Joseph chapateni phatthei aboh gelin ahi; atenggol chunga akingamin Pathen alhaijin ahi.

²² Tahsan vangin Joseph'in khonunga Israel chate Egypt gama kona apotdoh dingu thu aseijin ama gu thudolah thu apen ahi.

²³ Mosi apenin, naosen chu hoi asa lhonin tahsan vangin anule apan lha thum asel lhonin; chule lengpa thupeh jong akicha lhonpon ahi.

²⁴ Chuin Mosi akikhanlhit phatnin, tahsan vangin Pharaoh chanu chapa tia kiminvo ding adan;

²⁵Aman chomkhat chonsetna nomsah sangin Pathen mite toh bol hesoh thoh khom ding chu alhengjotan ahi.

²⁶Egypt gama gou jouse sangin Christa ahousetnau chu chung nungjon agelin ahi; ajeh chu aman tohphat man asan ding lam jeng chu avet ahi.

²⁷Tahsan vangin aman lengpa lungsat ding chu kicha louvin Egypt gam adalhan ahi; ajeh iham itile aman mu theiloupa chu amu bangin athoh lhumkei jengin ahi.

²⁸ Chule asoh masa chengse that chun amaho asuhkhah louna dingin, tahsan vangin kalchuh kut asemin, chule thisan thekhum abolin ahi.

²⁹ Tahsan vangin amahon tolgo bangin twikhanglen San chu ajot gal kaijun, Egypt miten chutia bol ding chu agouvin ahile, twijin achuplih gamtaovin ahi.

³⁰ Tahsan vangin Jeriko khopi kul, ni sagi avelun ahile, akulpi chu achimtai.

³¹ Tahsan vangin Rahab notinun gam velhiho lungmong tah-in a-in'a alhunsah-in ahile, thua nunglouho toh amantha tapon ahi.

³² Akal ipi kasei dingham? Gideon, Barak, Samson, Jephthah, David, Samuel, chule themgaoho, hiteho thu umchan seisohkei leng phatnin ato lou ding ahi.

³³ Amaho chun tahsan vangin gamtin loinemin alauvin, chonphat abolun, thutep ga achangun, keipi bahkai kam ahuh uvin,

³⁴ Meihat achen daijun, chemhema konin asohchaovin, hatmoa konin ahat taovin, galsatnin hattah ahitaovin, apang khom agalteu anojam gamun ahi.

³⁵ Numei hon amithisa chengu hingdoh kit akimu kit taovin ahi; chule adangho chu thokitna phajo chungnung aneina dinguva, ahuhdoh dingu chu anom pouvin ahile, bol gentheijin aumtaovin ahi.

³⁶ Abang kimkhatman engbol le jep athoh-un, bulputle songkul'a khumin patepmin aumun ahi.

³⁷ Amaho chu songin asepjiuvin, thing atnin a-at tanun, patepmin aumun, chemjamin athatnun, kelngoi vunle kelvuna kivonin avahleuvin, lhasamle hesoh gentheijin bolsetnin anaumun

³⁸(vannoi leiset amaho umnahoi ahipon), gamthip laija, molle lhang-ah, songko ho-a, chule leiko homa avahleuvin ahi.

³⁹Hicheteho chun tahsan vanga hettohsahna anei vangun thutep ga achang tapouvin ahi:

⁴⁰Ajeh chu eiho beija amaho chu suhchamkima aum louna dinguva Pathen'in eiho dinga thilphajo khat gotsa akoi ahi.