Read Thado Chin Hebrai 13 Bible Online

Hebrai 13 - Thado Chin bible

Hebrai 13

¹Sopi kingailutna hi umjompeh jinghen.

² Nanghon maljin phatbol ding chu sumil hih helun; ijeh-inem itile chuti bola konin mi kimkhatnin het louhelin vantil alhunsah-un ahi.

³Akihenteho chu nakihenpin gel unlang he jingun; nangho jong tahsa-a um nahiu heuvin lang hesoh genthei thohte chu he jingun.

⁴Mi jouse lah-a kichen hi ja umhen, chule ajalkhun jong suhboh-in umdahen; jonpanle miji toh jongho thu Pathen'in achung thu atan ding ahi.

⁵ Sum ngailut lung po hih helun; nanei sunuva chun lunglhaijun; ajeh chu amatah-in, Keiman nangma iti nama jongle lhaponge, changlha jong changlha pong-e, ati.

⁶ Hijeh chun eihon, hakat tah-a, Pakai chu eipanpi ahi, keima kichaponge, Mihemin keima i-eilo dingham? iti thei dingu ahi.

⁷Pathen thu nahiluva nachung uva navaipo teo chu geldoh jingun; chule amaho nunle khana kona sohdoh gelunlang, amaho tahsan umchan chu thovin.

⁸Jesu Christa chu janhi, tuni, chule atonsotnin abang ahi jingin ahi.

⁹Thuhil kidang got chomchom kilhoh mangsah loujenun; lung hi lungsetna-a phudet aphai; anneh-a phudet ding ahipoi, hiti anneh thua chonna lungkhamteho chun phatchomnan aneidehpouve.

¹⁰Houbuh sunga lhachalehon aneh thei lounao, maicham ineijun ahi.

¹¹ Thempu chungnungin chonset thensona-a Mun Theng sunga achoi lutji ganchaho long chu kulpi polama agouvam jiuvin ahi.

¹²Hiche jeh-a chu Jesu'n jong ama thisan mihemte suhthengna dinga khopi kotpi polama thina athoh ahitai.

¹³Hijeh chun hungun, ama ahousetnau chu pou hitin, kulpi polamah ama hengah cheohite.

¹⁴Ajeh iham itile hikoma hin khomundet ineipouve, khonunga khopijoh chu iholu ahibouve.

¹⁵Chuti ahi jeh chun ama vangin vahchoina kithoina chu Pathen henga pe jinguhite, hichu amin jala kipathu iphon dohnao ikamuva kona aga chu ahi.

¹⁶Ahin phatna bolle thilpeh phala kihomdela thilbol chu sumil loujenun; ijeh-inem itile chutobang kithoina chunga chun Pathen alunglhai behsehjin ahi.

¹⁷Nachung uva vaipoho thun nungun, anoijuvah lutnun; amaho chu umchan thu seitoh-a pang ding ahi jeh-u chun, hichu lung nommo-a bol louva lunglhaisela abol theina dinguva, nangho lhagao ahon jingu ahi; lungnom mon nachung uvah thu seileu, nangho dinga khoh ding ahi.

¹⁸Keiho neitao peh-un; ajeh chu keihon ase apha hetna thengtahle ijakaija kituptah-a chondih tup lung kaneijui, ti kakihet chenun ahi.

¹⁹Chule nangho heng lama eiki lhadoh vah chehna dinga eitaopeh dinga, nangho atumbeh-a kahin ha ngehdeh nahiuve.

²⁰Chamna Pathen tonsot geija umjing kitepna thisana kelngoi ching pipu I-Pakaiyu Jesu chu athi lah-a kona puidoh kit chun, ama lunggot lam bol dingin,

²¹nangho phatna lam jouse-a sucham kimun; ama mitvetna alunglhaina lam jouse-a Jesu Christa vang chun nangho-ah molsohen; loupina atonsot atonsot geijin umjing hen, Amen.

²²Sopite, naheng uva kahungtao ahi, kitilkhou na thuhi angai themun; ijeh-inem itile keiman nangho henga paltana kahinsut ahi.

²³Isopiu Timothy alhadoh taove, hichu anaheuvin; ama ahung vah-a ahile, keima amatoh hung lhoningting nangho mutange.

²⁴Nachung uva vaipoho le mithengho chengse chu kasalam anapeuvin. Italy gam mihon salam napeuve.

²⁵Nabon chaova chungah lungsetna umhen. Amen.