Read Thado Chin Hebrai 2 Bible Online

Hebrai 2 - Thado Chin bible

Hebrai 2

¹Hijeh-a chu ithu jah chengseu hi lunglut tah-a igut cheh dingu ahi; achuti loule ajole chucheng chu kitolmang sah khau hite.

²Ijeh-inem itile vantil ho kama asei thu chu dettah-a, chule suhkhelnale thua nunlouna jouse man adoltah cheh-a asanuva ahile,

³huhhingna loupi hi nahsahmo leuhen eiho iti isochat dinguham? Hiche huhhingna hi amasa Pakai kama asei, ajahon eiho dinga aphudet ahin,

⁴melchihna le thilmu kidang chule bolmo kidang got tamtah toh tho-a, alunggot doltah-a Lhagao Theng phathei kihoma chu Pathen'in jong ahettoh sahpiu ahi.

⁵Ijeh ham itile khonunga hung umding vannoi leiset thu iseiju chu aman vantil ho noijah akoipoi.

⁶ Ahinla khatnin mun khatnah ahettohsah-in, Mihem chu ipiham, nangman nalung viltenin? Chujongle Mihem Chapa chu ipiham, nangman navil jingin?

⁷Nangman ama chu vantil ho sangin themcha khatbou nanoinun sah-in ahi; Loupitah-in gunchena lal lukhuh-in najemin ahi; Nakhutsoh jouse chunga vaipon natungin,

⁸Chule imajouse abonchan akengphang noija nakoijin anoija na-umsahtai, tin aseijin ahi. Chutichun ijakai aboncha anoija akoi jeh chun, aman anoija akoi lou imacha aumtapoi. Ahivangin tu geijin eihon imajouse anoija alutsoh imu hih laijuve.

⁹Ahin vantil ho sanga themcha khat anoinunsah Jesu vang chu imutaove, Pathen lungset vanga mi jouse dinga thina atepkhah tei ding mong ahin, thina athoh jeh chun choi-at nale loupina lukhuh-in akijemtan ahi.

¹⁰Ijeh-inem itile ama dinga thil ijakai uma, ama vanga thil ijakai um, ama dinga chu chate tamtah loupina-a apuilut jouse-a chu, ahuhhingnau lamkaipa chun athohgima asuhchamkim ding thu ahi.

¹¹Ijeh-inem itile asuthengpale asuhthengho chu aboncha khatna konbou ahiuve. Hijeh chun aman amaho chu sopi sah ding jahcha louvin,

¹² Keiman kasopite henga namin seiphong lengting, Houbung ho lah-a navahchoi la sange, atin;

¹³ mun chom khatna, Kagin chatna ama jenga kangah ding ahi, atin; chukitman, Ven, keimale Pathen'in eipeh chapangte hi, ati.

¹⁴Chuti ahi jeh chun chapangteho chu thisanle tahsa chang khom ahi jeh-u chun, thina-a thina thu neipa, hichu diabol ahi, asuhpoi theina dingle,

¹⁵thi kichatmana hinlai sungse-a soh-a umteho jouse chu ahuhdoh theina dinga, amatah jong hichu changa ahitai.

¹⁶Atahbeh-in aman vantil ho umchan tho louvin Abraham chilhahte umchan athojotan ahi.

¹⁷Hiche jeh chun miho chonset thensona dinga, ama Pathen lama dinga thempu chungnung mi khototah le tahsan umtah ahina dinga chu, ijakaija asopite bangbanga ahung umding chu adoltah ahi.

¹⁸Ajeh chu aman lhepna atoa hesoh genthei athoh jeh chun, lhepna tohho phatna bola hu thei ahi.