Read Thado Chin Hebrai 3 Bible Online

Hebrai 3 - Thado Chin bible

Hebrai 3

¹Hijeh chun, van kouna changkha sopi thengteho, itahsanu Solchah le Thempulen Chungnung Christa Jesu lam chu ha ngaitouvin.

² Pathen insung jouse lah-a Mosi tahsan umtah ahi bang chun ama jong apansahpa lama tahsan umtah ahi.

³Ajeh chu in sanga in sapa achoi-at joh bangtah-a chu, ama chu Mosi sanga gamchenga loupijo cheh dingdol ahi, tia kisima ahitai.

⁴In jouse chu mi khat sahdoh ahi cheh-in, ahin imajouse sadohpa chu Pathen ahi.

⁵Chuin khonunga thu hung kisei dingho hettohsahna dinga, Mosi chu Pathen insung jouse lah-a lhacha panga tahsan umtah ahi;

⁶Christa vang chu chapa ahin, ama insung chunga tahsan umtah ahi. Akhon ni geija iha kat naole kinepna ikisonao hi ituhdet pou ule, eiho hi a-insung mite ihiuve.

⁷ Chuti ahi jeh chun Lhagao Thengin asei bangin, Tunia nanghon a-awgin najah uva ahile,

⁸Lunghansah na-a bang chun nalungu tahsah hih-un, Gamthipma kipatep laija bang chu bol hih-un.

⁹Chukoma chun naputeu napateu vin patepnan eideh-un ahi, Chule kathilbolho kum somli amuvin ahi.

¹⁰Hiche jeh-a chu hiche phung mite chunga hi kalung lhai lou ahi, Amaho hi imatihchana lungchavai te mong ahiuve; Ahinla amahon kalampi ahepouve;

¹¹Chua kalung hanga kahahsel ahi, Hiteho kacholngah na-a lut lou ding ahiuve, kati ahitai.

¹²Vo sopiteho, chingtheijun, ajole ijemtin Pathen hinga kona pul lhahna dingin, nangho lah-a jong tahsanlou lung giloupo um khauvinate.

¹³Ahin chonset lheplhah-a khattou lungtah chehcheh nalah uva aum louna dingin, Tuni kiti phat chu aumlai sungin khatle khat niseh-in kitilkhoutouvin.

¹⁴Ijeh-inem itile eihon ikinepnao tahbeh kipana hi akhon ni geija ituhdet jinguva ihipouvule, Christa kikoppi ihiu ahitai.

¹⁵ Tunia a-awgin najah uva ahile, Lunghansahna-a bang chun nalungu tahsah hih-un, akitin ahi.

¹⁶ Hiche ati hi, athu ajah jouva lunghansah chu koi koiham? Egypt gama kona Mosi khutna ahinpuidohho chengse chu hilouham?

¹⁷Chule kum somli sunga alung himona koi chungham? Gamthip laija along lum, hiche chonseho chunga chu hilouham?

¹⁸Chule hiteho kacholngah na-a lut lou ding ahiuve, tia ahahselna chu koi chungchang thua aseiham? Thu ngailouho chungchang thua hilouham?

¹⁹Hichea hin amahon atahsan loujeh uva lut thei lou ahitaove, ti chu imuvin ahi.