Read Thado Chin Hebrai 4 Bible Online

Hebrai 4 - Thado Chin bible

Hebrai 4

¹Hiche jeh chun eiho kichau hite, achuti loule ajole ama cholngahna-a lut theina ding thutepsa aum jeng vangin, nalah uva khattou chua lut dinga kona athona umle akilome.

²Ijeh-inem itile Kipana Thupha ijah uva akisei chu eihon ijah mong mongu ahitan, amaho jong chutobangma chu ahi; ahivangin athu jahotoh tahsana akigop lou jeh-u chun, athujah-u chu amahon phatchomnan anei tapouve.

³ Ajeh chu atahsan eiho chengse vanghi cholngahna-a chu ilut laiju ahi; Kalunghana kahahsel banga chu, Kacholngah na-a lut lou ding ahiuve, tia, asei bang chu ahi: vannoi leiset bul aphudoh tila aman anatoh ajosohsa ahitah vangin.

⁴ Mun khatna aman ni sagini thudol aseijin, Chuin ni sagi nin Pathen anatoh jouse-a konin akicholngah tan ahi, ati.

⁵ Chukitman hikoma chun ahiti sei kitleuve, Hiteho kacholngah na-a lut lou ding ahiuve,

⁶Chuti ahi jeh chun mi kimkhat cholngahna-a alut dingu aumnahlai jeh chun chule masanga Kipana Thupha kisei jasa hon ajoplou jeh uva alut lou jeh-u chun,

⁷ khonung sottah nungin, Tuni tin nikho khat atep kittan, David kama masanga kisei bangma chun, Tunia nanghon a-aw najah uva ahile, Nalung tahsah hih-un, ati kitnin ahi.

⁸ Joshua'n amaho chu acholngahsah hitahenlang hile, khonunga nikho chom thu chu asei lou ding ahi.

⁹Hiche jeh chun Pathen mite dingin cholngah ni-a kicholngahna aumnalai jinge.

¹⁰ Ajeh chu Pathen anatoh-a kona akicholngah banga chu acholngahna-a lut jong chu anatoh-a kona kicholngah ahitai.

¹¹Hijeh chun koiman chuche thua nunlou umchan chu athoa alhua aum louna dingin, cholngahna-a chu lutna dingin ponpanu hite.

¹²Ajeh chu Pathen thuhi hing jingle natonghat jing ahi, chule hemto chemjam jouse sanga jong hemjo ahi, hinna le lhagao gu kisuhtohna le lhin hichengse chu sukhen theihela sunthei ahi, chule lunggel le lungthim ngaito hetoh paijen jeng thei ahi.

¹³Chule thilsem ama mitmu-a langlou imacha aumpoi; ichon nao isuhtouva ilhutna dingpao mitmu-a chu imajouse asagohkeo le kihongsa ahi.

¹⁴Vanho chengse jotpaija chea Pathen Chapa Jesu thempulen chungnunga inei jeh-u chun, itahsan iphonu hi ha tuh det jinguhite.

¹⁵Ajeh chu ihatmonau eihetpia eithohpi phah lou thempu chungnung neija ihipouve, eibanga imalam jouse-a lhepnale patepna tohkha-a thohkha-a, ahi jenga jong chonsetna nei louheljoh ineiju ahi.

¹⁶Hiche jeh chun hepina ichan theina dingule, panpina ingaichat phat ule lungset nale panpina imu theina dingun, hakattah-in lungsetna laltouna chu neijuhite.