Read Thado Chin Hebrai 5 Bible Online

Hebrai 5 - Thado Chin bible

Hebrai 5

¹Ijeh ham itile thempu chungnung jouse chu chonset thensona-a thilto le gan kithat alhakop theina dinguva, mi lah-a kona kilachoma mihemte dinga Pathen lam thila chu kipansah ahiuve.

²Amaho chu ima helouho le sukhelteho chunga nemheocha lungde thei ahiuve; ajeh chu amahotah jeng jong hatmona-in aum kimvel chehjiu ahi;

³ chuti chu ahin miho dinga abol banga chu, amahotah dinga jong chonset thensona dinga kilhaina abol louthei ahipoi.

⁴ Chule hiche choi-atna chu Aaron banga Pathen'in akoulousen koiman ama chamin akilahpoi.

⁵ Hiche bang chun Christa jongin thempu chungnung hi dingin amale ama akichoi anpoi; ajah-a, Nangma ka-Chapa nahi, Tunia kahin nahi, tipajoh chun achoi-at ahibouve.

⁶ Chutima chun mun chom khatnah, Melchizedec umdan banga Tonsot thempu nahi, tin aseije.

⁷Ama chun tahsaphe-a aumlai ni chun thina-a kona ama huhdoh theipa hengah hapena pengle mitlhi lha-a taona le thumna atoh-in, chule a-Pathen gin jeh chun ngaipeh-in aumtan ahi;

⁸Chapatah ahi jeng vangin athohna chengsea chu thua nunje kisinna ahitai.

⁹Chuin ama chamkimsah sohkeijin aumin, athua nungho jouse dingin tonsot sochatna bulpi asohtan ahi.

¹⁰Chule Melchizedec umchan banga thempu chungnung ahi, tin Pathen'in asahtai.

¹¹Ama thudol chu thu tamtah sei ding kaneijun, nakolsehtah jeh-un ahilchet jong ahahsai.

¹² Hitih chanpia hi, nangho mihil thei nahi dingu thu ahitan chutitah sangin, khat touvin Pathen thubul kipatna jemho nahildiu nangai chaovin ahi; chule anham hilouva, bongnoi ngainalai mitoh nabangtaove.

¹³Bongnoi anna neija chun, naosen ahi jeh-in, chonphatna lam thu hetna imacha ineipoi.

¹⁴Anham vang chu mi kikhan lhitho dingbou ahi, chuteho chun ahet theinao chu aman jing jeh-un, ase apha hetkhenin athem lhehtauve.