Read Thado Chin Hebrai 6 Bible Online

Hebrai 6 - Thado Chin bible

Hebrai 6

¹Chuti ahi jeh chun Christa thuhil kipatna api lam donta louvin; chule natoh thisa-a kona lung heile, Pathen tahsan,

²Baptize chan gotchom chom, chule khut ngap, athisaho hindoh kit, chule tonsot thutan vaihom thudol lam thuhilna bulphut kit ta louvin, pilhina lam dela masotna dingin kihaboluhite.

³Chule Pathen'in eiphat sah uva ahile, hicheho chu ibol dingu ahi.

⁴Ajeh chu khatvei khovah changsaho chun van thilpeh chu atep khataovin, Lhagao Theng changa ahitaovin,

⁵chule Pathen thupha le khonunga hung soh ding thilboltheina chu tepkhasa ahitaovin;

⁶Amaho chu alhuhtah uva ahile, alung heina dinguva semphat thah theihoi ahipouve; ajeh chu amahon Pathen Chapa chu amaho tuma thingpel'a khenbeh kit ahiuvin, chule lhangphong tah-ah taipongin aumsah jiuve.

⁷Ajeh chu leisetnin, achunga ju jing go twi tintang anadona, adinga lei kigitpehho dinga nehdol anche louhing apensah ahin, hiche leiset chu Pathen'a konin phattheina achangin ahi.

⁸ Ahin ling phungle ham lingnei apendoh vangle, hichu pannabei ahin, chule sapset anaijin, akhonna chu meija govam ahi.

⁹Ahin, deitahteho, chutia kasei vangun, nangho umchan chu hiche sanga phajo leh huhhing-a umnatoh kithokhom thilho nabol dingu kagingcha lheh jengui.

¹⁰Ijeh ham itile nanghon mithengte nanajenleu ahitan; tun jong najenleuvin, hiche Pathen min lama natohgimnao le ngailutna kilanga nalhanao Pathen'in asuhmil ding chu, ama chutobanga chondihlou ahipoi.

¹¹Chule akhon ni geija kinepna chamkim kichentah chu mu dingin, nahapan ngai bangu chun hapan cheh-un,

¹²Thase louvin tahsan leh thohhat vanga thutep mun loho chu, amaho chonnung chu jui chehleu chun, kalungu ahi.

¹³Pathen'in Abraham athutep chun kihahselna ding ama sanga lenjo aum lou jeh-in, ama changin akihahselin,

¹⁴ Thon louva keiman nangma phatthei kaboh ding nahi, chule pun jong kapunsah ding nahi, ati.

¹⁵Hiti chun aman angahat, athohhat jeh-in thutep ga chu amutan ahi.

¹⁶Ijeh-inem itile mihon ama sanga chungnungjo chu kihahsel na-a aneijiu ahi, chule thu kichetna dinga akihahselu chu akinelnao jouse kichaina ahi.

¹⁷Chutobanga chu Pathen'in athutep gou lo dingho chu, alung ngaito long lou ahi chu nasacheh tah-a vetsah ding lung agotna, kihahselna chu asuhdet ahi.

¹⁸Pathen jou ahi louna kikhel lou thil ni vanga, eiho kihuh dohna dinga ima sang uva um kinepna kikoi chu tuh dinga lhaija eihon kitilkhou na nasatah ineina dinguva, abol ahi.

¹⁹ Hiche kinepna chu hinna thihhat-aija ineiju ahi; hichu kichentah, dettah ahin, chule pondal sung lam geija lut ahi;

²⁰ Hikom mun'a chu Jesu anamasa-a Melchizedec umchan dungjuija tonsot thempu chungnung hia, eiho dinga analut masa-a ahitai.