Read Thado Chin Hebrai 7 Bible Online

Hebrai 7 - Thado Chin bible

Hebrai 7

¹ Hiche Melchizedec, Salem lengpa chu, Chungnung pen Pathen thempu ahin, chule Abraham'in lengho agatha jouva ahung kile kit chun lampia agalamton phatthei agaboh-in ahi.

²Ama chu Abraham'in thil jouse hopsom-a hopkhat apen ahi. Amin chu amasa chonphat Leng kitina ahin, chuin Salem Lengpa ahi, hichu chamna lungmonna Lengpa kitina ahi.

³Ama chu nu neilou, pa neilou, chilhah guilhah neilou, ahinkho kipatle ahinkho lhinna bei ahin, Pathen Chapa banga kisem ahin, hiche Melchizedec chu a-imatih chana thempu-a umjing ahi.

⁴Lung gelun ngaitouvin: ipului bulpiu Abraham'in athilchom aphalai chengse hopsom-a hopkhat apehpa chu itobanga len hitam!

⁵ Chule Levi chate lah-a thempu dinmun changho chun, danthu nungjuija miho lah-a kona, Abraham taiguija peng ahi jeng vangin asopitehoa kona, hopsom-a hopkhat lahna ding thu aneiju ahi;

⁶Amaho phung guija kona akhanggui thu kisimtha loupa vang chun Abraham'a konin hop soma hop khat akilah-in, thutep neipatah chu phatthei aboh tan ahi.

⁷Chule mineojon achunga mi-a kona bou phatthei boh amu chu kinelna bei ahi.

⁸Hiche hin hopsom-a hopkhat muho vang chu thina thu noija um ahiuve; khat joh hopsom-a hopkhat mupa vang chu hing jing jeng ahi, ti hettohna kineija ahitai.

⁹Chule hopsom-a hopkhat mupa Levi chun amatah-in Abraham'a konin hopsom-a hopkhat apei tilehen ti thei ahi;

¹⁰Ajeh iham itile Melchizedec chun apu agalamtoa chu Levi atai sunga umnalai ahi.

¹¹Chuti chu ahin, Levi ho themputna chu chamkim sohkei thei hile (ajeh chu chua kona chu mihon chonna danthu amu-u ahi), Aaron umdan banga kisei louva, Melchizedec umdan banga ding thempu got chom khat umdoh lou i-khohta dingham?

¹²Ajeh chu thempu akikhele danthu jong khel tei ding thu ahi.

¹³Aumchan thu kiseipa chu phung chom mi ahi; chuche phunga mi koimacha maicham mun'a natonga aumpoi.

¹⁴Ijeh ham itile I-Pakaiyu chu Juda phunga penga ahi chu kichentah-in akilange; ahin hiche phung thua chun Mosi'n thempuho thudol ima aseipoi.

¹⁵Chule tahsaphe thupeh danthu dungjuija hilouvin, mantih neilou hinna thahat dungjuijoh ahin,

¹⁶Melchizedec lim banga thempu chombeh khat hung uma ahile, kathu seiju hi kichen cheh ahi.

¹⁷ Ajeh iham itile hichu hettohsahna chun, Melchizedec umdan dungjuijin, Nangma tonsot thempu nahi, ati.

¹⁸Ajeh chu ahatmole phatchomna bei ahi jeh-in chonna dan thupeh amasa chu amangthah tai.

¹⁹Ajeh iham itile chonna dan thupeh chun imacha asucham kimpon ahi; ama mun'a chu kinepna pha chungnungjo kipolut ahitai; hiche chu eihon Pathen kom inailutnao ahi.

²⁰Chule achuti jeng vang chun ama chu hahsel louva thempu-a kipansah ahipoi,

²¹ (ijeh-inem itile amaho chu hahsel louva thempu-a kisema anahitauvin; hijongle ama vang ajah-a, Pakai chun akihahsele alung hei kit lou ding ahi, Melchizedec umdan bangin nangma tonsot thempu nahi).

²²Chuti chu ahi jeh-in Jesu chu kitepna chungnungjo-a panga ahitai.

²³Chule amaho chu thina-in asuhmo uva apan jing thei lou jeh-un, thempu chu ana tamlheh-un ahi;

²⁴Ama vang chu tonsot geija umjing ahi jeh chun khel louhel thempu mun changa ahitai.

²⁵Hijeh chun ama vanga Pathen kom nai lut teho chu, taopeh dinga ama hing jing jeng ahi jeh-a chu, amaho chu huhhing chamkimsoh thei ahi.

²⁶Ijeh ham itile chutobang thempu chungnung athena theng, lepthol neilou, boh behlou, chonsete lah-a kona kisepdoh, vanho sanga chungnung-jo-a kisema chu eiho dinga kilom mong ahi.

²⁷ Ama chun aniseh-a thempu chung nungho banga chu, amasa ama chonset thensona-a, gan kithat alha masah ding chu akin akhohpon ahi; ijeh ham itile aman hichu amatah akilha jeng jeh chun khat veijin aseibulhit sohkeitan ahi.

²⁸Ajeh chu danthun apansah thempu chung nungho chu hatmona nei mihem ahiuve; danthu nunga um hahselna thu chun tonsot geija dinga kisucham kimsoh Chapa chu apansah ahi.