Read Thado Chin Hebrai 8 Bible Online

Hebrai 8 - Thado Chin bible

Hebrai 8

¹ Chunga thu kisei chengse lah-a athupipen hiche ahi, Van'a Chungnung pen laltouna jet lama tou,

²Chule mihem tundoh hilouva, Pakai tundoh houbuh tahbeh le mun theng lhachale-a pang Thempu Chungnung ineijun ahi.

³Thempu chungnung jouse chu thilto le kithensona ganlha dinga kitung cheh ahiuve; chuti ahi jeh chun hiche Thempu Chungnung jong hin ikhat khat todoh anei tei ding thu ahi.

⁴Ama vannoi leiset chunga anaum hile, thempu hilouhel ding ahi; ijeh ham itile danthu dungjuija thilto tohdoh dinga chu aum naovin ahi.

⁵ Amaho lhachale-a apannau chu, Mosi'n houbuh sah dinga agot laija, Pathen'in ahilchah-a ajah-a, Chingtheijin, vetkah dinga mol chunga nakivetsah lim bang bang chun bol sohkeijin, tia asei banga chu van'a thil limdanle ale ahibouve.

⁶Tu vangin kitepna phajo cheh palaija apan dungjuija, kitepna chu thutep phajo chunga ahisah-a, lhacha mun phachung nung jo-a panga ahitai.

⁷Ajeh chu kitepna masah chu themona beihel hile, aninapa mun ding chu kingaito lou ding ahi;

⁸ ajeh iham itile amaho chu a-oimon, Veuvin, Pakaiyin hitin aseije keiman Israel phung mite leh Juda phung mite dinga, Kitepna thah kasemdoh ding nikho hung lhung ding ahitai,

⁹Aputeo apateu Egypt gama kona puidoh ding ni-a akhutnuva katuh-a, Amahotoh kitepna kasemdoh, hiche kitepna tobang chu ahitapoi, Ajeh chu amaho kakitep naovah aum jompouvin ahi; Chuti ahi jeh-a chu keiman jong amaho kadon lou ahitai, tin Pakaiyin aseije.

¹⁰Hiche nikhoho nunga Israelte toh kitepna kaphudoh ding chu Hiche hi ahi, tin Pakaiyin aseije; Alungthim uva kachondan thupeh pengting, Chule alung sunguva kasut ding ahi; Chule keima amaho Pathen hingting, amaho jong kamite hi ding ahiuve;

¹¹Chule amitakipmin aheng akom le asopite chengu, Pakai chu heuvin, tia ahil lou dingu ahitai; Ajeh chu aneopena pat alenpen geija eihetsohkei dingu ahitai.

¹²Asuhkhelnauva jong kahepi ding ahi, Achonsetnao le akhangitlou nau jong geldohta lou ding kahi, ati.

¹³Hiche kitepna hi aman athah ahi atia ahile, amasa chu aluisah ahitai. Chutichu ahin aluija le atehta-a chu, amang ding kon ahitai.