Read Thado Chin Hebrai 9 Bible Online

Hebrai 9 - Thado Chin bible

Hebrai 9

¹Chule kitepna masa-a jong chu Pathen lhachale-a pandanle mun theng, hiche vannoi leisetna mun theng ana uma ahi.

²Ahoubuh semu chu adan masapena chu meivah tunna, dokhang, vetsahna changlhah to uma ahin, hichu Mun Theng atiu ahi.

³Chule pondal nina dan sunga chu houbuh Mun Theng Chungnung atiu chu uma ahin;

⁴ Hikoma chu gimnam twi halna sana maichamle, kitepna thingkhong sana kilonkhum chu uma ahin, kitepna thingkhong sunga chu manna umna sana bel leh, Aaron tenggol pahmum, chule kitepna songpheng ni chu uma ahi;

⁵ chule achung vuma chu hepi touna lekhu-a Cherub loupitah ni uma ahin; hitiho thu chu tun akip akoijin sei joupouhite.

⁶ Chuti chun thil hicheng chu akisemin, thempuho Pathen houna lhachale dingin houbuh masa sunga chun alut jingjiuvin ahi;

⁷ Adan nina sungnunga vang chun thempu chungnung changsehbou kum khat sungin khatvei alutjin ahi; ahivangin ama dingle miho-a ding, het louva achonsetnao thensona ding, thisan chu choi louvin alutjipoi.

⁸Houbuh masa chu aumlai chansea mun theng sunga lutna lam chu kilangsoh lou ahi, tin Lhagao Thengin aphonge.

⁹Chule hichu tu laija dinga tekahna ahibouve; hiche dungjuija chu thilto le kithensona jong alhajiu ahin, hitiho chun ase apha hetna lama ahouho chu achamkimsah thei lou ahi;

¹⁰Neh dan, don dan, kisil gotchom chomtoh tahsa polam thudan jeng ahin, semphat kah-a dinga anakingaitoa ahibouve.

¹¹Christa vang chu khonunga hung umding thilpha thempu chungnunga hung panga khutna sah lou, hiche thilsem lah-a hilou, alen chungnung jole gamchenga chamkimjo houbuh-a chu lut ahin,

¹²Kelchale bongnou thisana hilouva, ama thisana Mun Thenga khatveiseh lutna, eiho dinga tonsot geija lhatdohna kemlou eipeh-u ahitai.

¹³ Ijeh ham itile kelchale bongchal thisan chule bongla vutvam kithe khuminbon akisuboho atahsa polamu athensah-a ahile:

¹⁴Christa tonsot kemlou Lhagaova, nolna beihela, ama Pathen'a kipedoh jenga thisan chun Pathen hing lhachale-a pang dinga, thina natoh-a kona ase apha nahetnao chu gamchenga asuhtheng cheh ding ahi.

¹⁵Chule hiche jeh-a ama chu kitepna thah palai hija, kitepna masa noija suhkhel neija themoho lhatdoh na-a athitah jeh-a chu, akikouho chu tonsot kemlou gou lo ding ahitaove.

¹⁶Ajeh chu kitepna umna-a chu kitepna sempa chu athi lounaje umlou ahi.

¹⁷Ajeh chu thi nunglebou thulhun chu hatjia ahi: athuteppa hinlaise vangin ahatjipoi.

¹⁸Hiche jeh-a chu kitepna masa jong chu thisan beija kiphut det lou ahi.

¹⁹ Mosi'n danthu dungjuija thupeh miho jah-a aseichai phatnin, bongnoule kelcha thisan chu twitoh ponsan toh hyssop toh alan, lekhabule miho jouse chu athekhumin,

²⁰Hiche hi Pathen'in nangho napeh-u thupeh kitepna thisan chu ahi, ati.

²¹ Chucheng kalval jongin houbuh chule lhachaleho manchah chengse jong chu chutima chun thisan chu athekhumin ahi.

²² Danthu dungjuija chu imajouse aboncha thisana suhtheng soh himaija ahi, chule thisanso louva ngaidamna umlou ahi.

²³Hiche jeh chun hichenga chu van'a thil lima um chu hitia hi suhtheng dingdol mong ahi, van thil tahtah ho vang chu chucheng sanga longlhenna phajo cheh-a suhtheng dingdol thu ahi.

²⁴Atabbeh lima um khutna kisa mun thenga Christa alutpon ahi; ahin tun eiho jala Pathen anga ding dingin van'a alutjotan ahi.

²⁵Thempu chungnungin kumtina ama thisan hilou achoija, Mun Thenga alutji banga chu, ama thensona gan lha dinga lut matchet ahipoi;

²⁶Chuti chu hile vannoi kisemtila patna aman tamtahvei athohgim ding ahitai; ahivangin tun aman amatah longlhengin akitoh jengin chonset suhbeina dingin tu khang nunungpen hin khatveiseh ahung kilahtan ahi.

²⁷Chule mihemte dinga khatvei thia chujoule thutanna hung umding chu gotsa ahin;

²⁸ Hiche banga chu Christa jong mi tamtah chonset pomang dinga kitoh ahitan, aniveina-a chonsetna beihela ama ngah jingho huhhing dinga hung kilang ding ahi.