Read Thado Chin Jacob 1 Bible Online

Jacob 1 - Thado Chin bible

Jacob 1

¹ Pathen le Pakai Jesu Christa soh Jacob'in, akithe cheh-a phung somle phung ni henga, salam.

²Kasopiho, nangho patepna tintanga nachuh tengule, hichu kipanan gelun;

³Natahsanu kipatep chun thohhat asosah chu heuvin.

⁴Ahin nangho lhahsamna beihela nacham kimuva, napum lhin theina dingun, thohhatna chun anatoh tong chamkim molsohen.

⁵Nalah uva khattou chihna-a lhasama aumle, it louhel le house louhela peji-a Pathen henga thumhen; chuteng kipe ding ahi.

⁶Amavang ginchat lelna neilouhelin, tahsanna neitah-in thumhen; agingcha lela chu twikhanglen kinong hui mut lonle tobang ahi.

⁷Chutobang mi chun Pakaiya konin ima mu neijinge tin kinepda hen.

⁸Lungtho nei michu achonna lam jouse-a detna nei lou ahi.

⁹Dinmun nemcha neija sopi chun choisanga aum jehchun kipah hen;

¹⁰ Ahin mihao chun suhnema aum jehchun kipah hen: ajeh chu hampa pah banga ama chu mangthah ding ahi.

¹¹Ajehchu nisa satah-a ahung soteng, asat chun hampa louhing asanggojin, chule apah apul lhan, alimso hoi jong chu amangthah jitan ahi; chutobanga chu mihao jong alamlhah tinchenga molmang diu ahi.

¹²Lhepna thoh ham hama chu anunnom ahi; ajeh chu lhep patepna chu ajoa them achan jouva ahile Pakaiyin ama ngailuho peh dinga athutepsa hinna lallukhuh chu apeh ding ahi.

¹³Ahin lhepna-a nachuh tengule, Pathen'in eilhep ahi tin koiman seida hen: ajehchu Pathen chu ase lama kilhem patep theilou ahin, chule amanjong koimacha alhep patep lou ahi.

¹⁴Mi ama ama lung ngaichat thillin ajol lhah-a, aloi lutji-a, lhepna-a chujia ahibouvui.

¹⁵Chule alung ngaichat phalou chu naovop banga avopji teng chonset ahinji ahi; chule chonset chu apilhin tengle thina sohjia ahi.

¹⁶Kasopi ngaiteho dohan lhalou jenun.

¹⁷Thilpeh pha jousele phattheina chamkim chu chunga kon ahi, chule kikhelna le le-lim banga kihei jilou vahho Pa-a kona hung kumlhaji ahi.

¹⁸Athilsemho lah-a eiho hi aga masa loi khat ihi theina dinguva, aman ama lunggot doltah-a thutah-a chu eihinu ahi.

¹⁹Hijeh chun, kasopi ngaitahho, amitakip angaina lama gang cheh hen, thu sei lama ngaikham cheh hen, chule lungsatna lama jong ngaikham cheh hen;

²⁰Mihem lunghanin Pathen chonphatna asodoh sahpoi.

²¹Hiche jeh chun nanghon thenlouna jousele chon gitlouna long let chu puilhau vinlang, nalhagao huhhing theija thu kiphutsa chu lungnemin sangun.

²²Ahin nangho nangmale nangma kilhem lha-a thu chu angai mai jeng hilouvin, thu chu abolajoh hiuvin.

²³Ijeh ham itile thu angai mai mai hia abola hilou mi khattou aumle, ama chu phatvet maija apenpi alim vea mi tobang ahi:

²⁴Ajeh chu ama akiven achemangjin, chule ama chun alim itobang ahi apettah chule asumil jitan ahi.

²⁵Ahin chamkimkei chamlenna danthu chu vea, chua aum jom jinga, athu chu ngaija sumil mi hilouva, abola pang mi vang chu, hiche mipa chu athilbola chu nunnom ding ahi.

²⁶Nalah uva mi khattou ama hou ngaisah mi-a kingaito-a, alei tuhtang louva, ama lungthim kilheplhah-a aumle, hiche mipa chun ahou chu moh ahi.

²⁷Pa le Pathen anga houdan thengle kisuhboh lou chu: Nulou palouho le meithaiho agenthei ahesoh naova vila, chule vannoi leisetna kona boh beh louhela kithenso chu ahi.