Read Thado Chin Jacob 2 Bible Online

Jacob 2 - Thado Chin bible

Jacob 2

¹Kasopite ho, loupi Pakai, I-Pakaiyu Jesu Christa tahsanna chu mi dat neilou jennun.

²Ajehchu naki khopnao in'a mi khat sana khutjem kibua, ponhoi lul kisil hunghen lang; chule pon sedihdeh kisil mivaicha khat jong hunghen lang;

³Nanghon ponhoi lul silpa chu jabolun lang, Nangma hilaija hin nomtah-in touvin, tiuvinlang, mivaichapa jah-a chun, Nangma khukoma khun gadingin, ahiloule, kakeng todopma hin touvin, tileu chun:

⁴Nangho nanghole nangho lah-a mi dat nanei uva, lung gilou pu-a vai nahomu hilou dingham?

⁵Kasopi ngaiteho, ngai phaovin, vannoi leisetna mi vaichaho chu Pathen'in tahsan na-a hao dingle, ama ngailuho peh dinga atepsa gam chu lo dinga alhendoh hilouham?

⁶Ahinla nanghon mivaicha chu noise tah-in nabol uvin ahi. Mihaoho chun nabolset jiuva, thutan na-a nakai lutjiu hilou ham?

⁷Chule amaho chun nakikou nao min ja umtah chu ataitomu hilouham?

⁸ Pathen lekhabu dan thu dungjuija, Naheng nakoma chu nangma naki ngailut bangin ngailun, ti Leng dan chu subulhit nahiu vangle, nabolu apha lheh jenge;

⁹Ahin dat naneiju vangle achonsea nahiuvin, chule dan sukhel tia danthu dungjuija themmo changa nahiuve.

¹⁰Ahin mikhatnin dan thupeh chengse nitsoh hen, khatpenah kisumo taleh, aboncha chunga themmo changa ahitai.

¹¹ Ajehchu, Jon pan hih-in tia seipa chun, Tolthat hih-in, tia jong asei ahi. Hijeh chun tun nangman jon panhih-in lang, ahin tolthat lechun, nangma danthu suhkeh chu nahi ahitai.

¹²Chamlenna danthu-a athu kitan dingho thusei bangin thu seijun lang, chutima chun bolun.

¹³Mi chunga hepina neilou chu, hepina neilou hela athu kitan ahi; hepina chun thutanna chunga jona anei ahi.

¹⁴Kasopite ho, mi khattouvin katahsan aume tihen lang, anatohla um hihhen hile, hichu ipi-a phachom dingham? Hiche atahsan chun huhhing theijintem?

¹⁵Sopipa khat ahim, sopinu khat ahim pon beijin umhen, chule anikho anneh lhasamin umhen,

¹⁶Nangho khatnin amaho jah-a chun, Lung mongin chen, lum sanlang vaset tan, tiuvin; amaho chu tahsa ngaichat thil pe louvin umleu chun, hichu ipi-a phachom dingham?

¹⁷Hiche banga chu tahsan jong anatoh beija chu achanga athisa ahi.

¹⁸Ahin mi khattouvin, Nangma natahsan aumin, keima kanatoh aume tinte: nanatoh beijin natahsan chu neivetsah temin, chule keiman natoh-a konin katahsan vetsah inge.

¹⁹Nangman Pathen khatseh aumme ti natahsane; nabol hoije: thilhahon jong atahsanui, agina kihot hot ahiuve.

²⁰Ahin, vo mi gichanglou, nangman anatoh beija tahsan athisa ahi chu nahet nom em?

²¹ Ipuluiju Abraham'in achapa Isaac maicham chunga atodoh-a chu, hiche anatoh chu ama dinga chonphatna-a kisima hilou ham?

²²Itobanga tahsan chun anatoh chu ahua, chule natoh vanga tahsan chu kisu chamkima ahi ti namuvem?

²³ Hichea chu, Abraham'in Pathen atahsanin, chule ama dingin hichu chonphatnan akisimtan ahi, ti Pathen lekhabua thu chu guilhunga ahi; chule ama chu Pathen jol tia kikou ahi.

²⁴Tahsan jengseh vang hilouva, natoh vanga mi chonpha tia kisim ahi chu namuvin ahi.

²⁵ Chule chutobangma chu Rahab notinu jong chun thupole ho chu a-in'a alhunsah-a, chua lam chom danga asolmanga ahile, hiche anatoh vanga chu amanu chu achonpha-a kisima hilouham?

²⁶Lhagao beija tahsa athisa ahi banga, tahsan jong natoh beija athisa ahi.