Read Thado Chin Jacob 3 Bible Online

Jacob 3 - Thado Chin bible

Jacob 3

¹Kasopite ho, midangho sanga eiho gihsajoa mo ichan dingu chu heuvin lang, tamtah mihil-in pang hih-un.

²Ajeh chu eiho ibon chaovin thil tamtah-a ikipaljiuve. Thua kipalna neilou chu mipha chamkim ahi; ama chu ati apumpia jong tuhtanga athua hei thei ahi.

³Veuvin, sakol khu ithu nun theina dinga akama kamdal ivo-u ahi; chuteng apumpia igot gotna-a kihei thei ahi.

⁴Kong-innei jong khu veuvin, lentah ahia, hui hat nasatah-in atol ahivangin, hichengpi chu ahehna neocha-a chu aheh heipan agotna lam lama aheile ahi.

⁵Chutobanga chu lei jong hi tibah neocha khat ahi jeng vangin, hoithona thu nasatah aseijin ahi. Veuvin, mei themhal chan gam lentah iti akahsetji hitam!

⁶Lei hi mei ahi; tibah lah-a lei hi chonsetna dim vannoi leiset ahi; hichun ti pumpi hi asuhbohjia, penpi hinkho lampi chevelkolna hi akahsetjia, chule amatah damun meija kaji-a ahi.

⁷Sa namkim, alha leng vacha namkim, ganhing namkim, gul namkim, twija cheng ganhing namkim vahngoi thei ahi sohkeijun, mihem vahngoi jin aumun ahi:

⁸Ahin lei vanghi koiman avahngoi theipoi; ama hi umthim thei lou gitlouna le thina gu dimset ahi.

⁹ Hichea chun Pathen le Pa chu ivahchoi jiuvin; hiche mama chun Pathen lima kisema mihemho isamse jiuve.

¹⁰Kamsung khatseh-a kon chun pachatna le sapsetna asoh khomjin ahi. Kasopite ho, hichu chuti dingdol ahipoi.

¹¹Twinah kohom khatseh-a khu twi atwi le akha put khomji am?

¹²Kasopite ho, theichang phunga Olive ga theijam? lengpi guija theichang ga theijam? hitichun twinah khat na konin chitui le twitheng aput khom theipoi.

¹³Nalah uva michingle hetthem theina nei koiham? Ama chun umchan themin anatoh chu nunnem na le chihna-in vetsahhen.

¹⁴Ahinla nalung sunguva kithangset hat le kilungdou naneiju vangle, kithang-at loujenun, chule thutah douna jou seihih-un.

¹⁵Chutobang chihna chu chunga kona hung kumlha-a ahipoi; amavang leiset le tahsa-a chule Diabol'a kon ahibouve.

¹⁶Kithangset le kilungdou umna-a chu kinahna le gitlouna um tei ahi.

¹⁷Chunga kona hung kumlha-a chihna vang chu amasapena atheng ahin, chule abana kichamdel, lungnem, houlung dambai, hepina-a dim, chule ga pha, dat neilou le, phatlhemna umlou ahi.

¹⁸Chule chonphatna ga chu chambolteho chunga kichamdela kitu-a ahi.