Read Thado Chin Jacob 4 Bible Online

Jacob 4 - Thado Chin bible

Jacob 4

¹Nalah uva gal kisatle kinahna hi hoija konham? Natibah lah uva nomsah ngaichatnaho kisatto-a kon chu hilouham?

²Nanghon nangaichauvin ahinla naneiji pouve; tol nathat jiuvin, neiding nagojiuvin, nanei theiji pouve; nakinaovin nakisatto jiuvin, ahinla nathumji lou jeh-un naneipouve.

³Nathumun ahinla namu pouve; nangma nangma nomsah-a manchah nagotji jeh uva, nathumu nakhel jiu ahi.

⁴Vo numei le pasal jongho, vannoi toh kihouthei hi Pathen to kigalna ahi ti helou nahiuvem? Hijeh chun koihile vannoi toh kihouthei go-a chu Pathen melma ahi.

⁵Isunguva cheng Lhagao hin thangthipna angaichat ahi, tia Pathen lekhabua kisei khu kimohsei hija nangaitou ham?

⁶ Chuti sangin lungsetna eipehbe jobovui. Hijeh-a chu aman, Pathen'in mi kiletsahho chu alethuhjin, mi kineosah ho lungsetna apei, tia asei ahi.

⁷Chuti ahi jeh chun nangho Pathen henga kipelut un. Diabol vang chu lethuh-un, chutile nakom uva konin jammang tante.

⁸Pathen kom naijun, chutile Ama nangho kom hung nai ding ahi. Vo michonseho, nakhut suthengun; chule lungtho neihon, nalung sungu suthengun.

⁹Kisih-un, lunghemun, chule kapmun; nanuiju chu kana chule nakipao chu lungkhamna soh hen.

¹⁰Pakai mitmu-a kisunem mun, chutile aman nachoi sang dingu ahi.

¹¹Kasopite ho, kiseiseto hih-un. Koi hile asopi seise-a chule asopi thu khola oimo-a chu, dan thupeh seise-a, dan thupeh khola oimo-a ahi: ahin nangman danthu chu nakhola na-oimo vangle athu nit hilouva athu tanjoh nahi.

¹²Danthu pe-a khatsehbou aume, Ama chu huhhing thei jong sumang thei jong ahi. Ahin nangma koi nahi-a, midang thu natan ham?

¹³ Tun veuvin, nangho mi kimkhatsen, Tunin ahim, jing ahimle, hiche khopi-a khun cheohitin kum khat gathamu hitin, kiveiju hitin, kivei kanu hite, nati uve.

¹⁴Jinga ipi ahung so ding nanghon nahepouve. Nahinkhou chu ipiham? Twimei chomkhat kimu-a chujoule kimujita lou tobang khu nahiuve.

¹⁵Chusangin, Pakai lunglam ahile, hingjing ungting, hiche na hi, khuche na khu tonging kate, tijovin.

¹⁶Ahinla tun nanghon naham hoithonao chu naki thang-at piuve; hiche kithang-at naho chu phalou ahi.

¹⁷Hiche jeh chun mi koi hile thilpha bolje hena-a bol lou chu achonse ahi.