Read Thado Chin 1 Peter 1 Bible Online

1 Peter 1 - Thado Chin bible

1 Peter 1

¹Jesu Christa solchah Peter'in; Pontus gam, Galatia gam, Cappadocia gam, Asia gam, chule Bithynia gama kithecheh khopemho,

²Thua nung dingle Jesu Christa thisan thekhuma umdinga, Pa Pathen lunggot masah dungjuija, Lhagao suhtheng na-a kilhengdohho hengah: nachung uva lungsetnale lungmonna punghen.

³I-Pakaiyu Jesu Christa Pa Pathen chu vahchoijin umhen; Jesu Christa athia kona athokit vanga amihepina chungnung dungjuija kinepna hing chang dinga eihinu ahin,

⁴Gou setheilou, thengsel, chule toi theilou nangho chan dinga van'a kikheh khola,

⁵Huhhing-a umdinga tahsan vanga Pathen thahat na-in achintup, phat nunung lamle hung kilangdoh dinga gotsa nahiuve.

⁶Tu chomcha khat dinga, akhoh dungjuija, lhepna tintang jeh-a nalunghem jeng vangun, hiche-a hin hatah-in nakipah-un ahi:

⁷Meija akipatep jeng vanga jong mang thei sana sanga manlujo, natahsan nao kipatepna chu, Jesu Christa hung kilah teng vahchoina, choi-atna, chule loupina-a akimu theina ding ahi.

⁸Ama chu mukha louhela ngailu-a nahiuve; tun jong ama chu namu louhel vangun natahsanun, kipana seitheilou le loupina-in nadimun ahi;

⁹Natahsan nao bulhina, nalhagaovu huhhingna ngeichu namu jeh-un.

¹⁰Nachung uva lungsetna hung chuding hiche huhhingna thudol hi, gaova anaseidoh themgaoho chun akholuva, chule gunchu tena anaholuva;

¹¹Christa thohgim dingje le nungle loupina-in ajom ding thudol Christa Lhagao amaho lung sunga uma chun aseipeh masah laijuva chu, itobang mi ahiloule itobang phat ahi ding anakholu ahitai.

¹²Hiche chu amaho henga kiphong doh-a ahin, amaho le amaho changa dinga hilouva, tu-a van'a kona hinkisol Lhagao Thenga kona Kipana Thupha hillhang lehon najah uva aseiju thil chengsea hi amaho eiho lhachale-a pangjo-a ahiuve; thil hitiho hi vantil ten jong vet atupmu ahi.

¹³Hijeh chun nalung kong kigah-unlang lung limgehchan umun, Jesu Christa ahung kilah tengle nachung uva lungsetna hung kilhut ding chunga chun nakinepnao ngaichamkimun.

¹⁴Malai nangol laijuva nalung ngaichat dungjuija nachonjiu banga chu chon louvin; sei ngaija thua nung chate chon doltah-in chonun;

¹⁵Ahin nakoupa athen bangin, nangho jong nunle khan jouse-a thengun;

¹⁶ Ajeh chu, Keima kathen jeh hin nangho thengun, tin akisune.

¹⁷Chule dat nei louhela mi jouse ama ama natoh dungjui cheh-a thutana chu Pa tia nakouvu ahile, hiche mun'a nakholjin lai sungseu hin ging khenchan hinkho mangun;

¹⁸Napute napateuva kona kilason chonna homkeova kona namu-u mangthei thil, sana le dangka-a kilhatdoh nahipouve;

¹⁹Amavang boh beh louhel le nolna beihel kelngoinou, Christa thisan lutah-a chu kilhatdoh jo-a nahi bouvui:

²⁰Ama chu leiset kiphudoh masanga gotmasah sa anahin, amavang hiche phat kichai kona hi nangho dinga hung kilah ahi,

²¹Ama vanga chu nangho athi lah-a kona ama kaithou le loupina pe-a Pathen tahsan mite nahiu ahi; hichu natahsanu le nakinepnao chu Pathen'a aum theina ding ahi.

²²Lhagao jala sopi ngailutna daithei lou dinga, thutah thua nanun uva kona nahinnao nasuhthengu ahitah jehchun; khohsahna neitah-in khatle khat lungtheng selin kingailuto cheh-un;

²³Ajeh chu nangho kem mang thei chia kon hilouva, kem mang theilou chi, tonsotna hingjing le umjing Pathen thua kona thah penkit nahiu ahi.

²⁴ Ajeh chu, Mihem jouse hampa tobang ahi, Aloupina jouseu jong hampapah tobang bep ahi. Hampa agopjin, apah jong apuljitai;

²⁵Pakai thu vang tonsot geija umjing jeng ahi. Najah uva kihil lhangle-a Kipana Thupha chu hiche hi ahi.