Read Thado Chin 1 Peter 2 Bible Online

1 Peter 2 - Thado Chin bible

1 Peter 2

¹Hijeh chun gitlouna jouse, doha lheplhahna jouse, phatlhemna, thangset, chule kiseisetna jouse pailhauvin,

²Naosen sohthah bangin, thua kon bongnoi thengset chu ngaijin umun, hichea chu nakhan tou theina dingun;

³ Nanghon Pakai chu milungset them ahi chu natep khah-u ahitah-a ahivangle.

⁴Mihem paija um hijongle, Pathen dinga lhentum le manlutah ahin, Ama henga chu songpi henga hung banga nahungu ahi,

⁵Nangho jong songhing ho banga, Jesu Christa vanga Pathen san thei doltah-a lhagao ganlhaina tohdoh-ah thempu theng hidinga, lhagao in'a kisadoh nahitaove.

⁶ Hijeh chun Pathen lekhabua hitin akisune, Veuvin, Sion'ah inning song pipen, lhentum, man lutah chu kadoi; Ama tahsana chu iti nama jongle jachatna-a chu lou ding ahi, ati.

⁷ Hichu atahsana nangho dinga man lutah ahi; atahsan louho ding vanga hiti hi ahi, Insahon apaiju song chu Aninga apipena panga ahitai;

⁸ chule, kipalna songle suhkhelna songpi soh-a ahitai; amahon thu chu angai loujeh uva kipala ahiuve; hiche dinga chu amaho gotsa jong ahiuve.

⁹ Ahin muthima kona ama vah kidangtah sunga lut dinga nakoudohpao phatna chu naphondoh theina dinguva, nangho nam lhenchom, leng thempu, vaipi theng, chule ama-a tum hi dinga Pathen mite nahiu ahitai:

¹⁰ Masanga chu mite hilou nahiu ahin, tu vangin Pathen mite nahitaove; hepina changlou nahiu ahin, tu vangin hepina changa nahitaove.

¹¹Ngaitah teho, nangho mi gama cheng le kholjin tobang nahijeh uva naheng uva kahungtao ahi, tahsa ngaichat thil chengsea konin kikangseuvin; hitiho chu lhagaotoh kidou ahi.

¹²Chule chidang namdangho lah-a nanun nakhanu phatsah-un; chutile akhang gilou tia amahon nangho naseisetnao chu amittah-in nathilpha bolu chu muvintin, hiche thudol chu vettoh-a aum nile Pathen avahchoi dingu ahi.

¹³Pakai jal-in mihem phudoh chondan thun nungun: mijouse chunga vaipo ahito lhonin, Lengpa thu ahin;

¹⁴Ahiloule mikhang gilouho chunga phula dingle, mi thilpha bolho pachatna pedinga ama hinsol gamvaipoho thun nungun.

¹⁵Ajeh chu nanghon nathilpha boluva konin lungthim beiho ngolna chu thiphelin lhaleu chun, hichu Pathen lunglam ahi:

¹⁶Nangho chamlen chonin chonun, ahivangin hiche nacham len nao chu gitlou khunan nei hih-un; ahin Pathen sohte um doltah-in umjouvin.

¹⁷Mi jouse jabol sohkeijun. Sopi tapou chu ngailuvin. Pathen gingun. Lengpa chu jabolun.

¹⁸Sohteho, nangho gingkhen chan napakai te chengseu thunoija umun; apha le anunnemho heng jenga hilouvin, lunggilou puho thunoija jong umun.

¹⁹Mi khattou Pathen ahet jeh-in thohdol louhel thohgimhen, dihlou tah-a akibolna thohham hamle, Hichu pachat umtah ahi.

²⁰Nathemmona jeh-in min navo henlang, lungneng tah-in thohle chun, ipi pachatna nachan dingham? ahin thilpha nabola, hiche jeh-a chu nahesoh gentheija, lungneng tah-a nathoh-a ahile, hichu Pathen deilam ahi.

²¹Ajehchu hiche-a dinga chu kikou nahiuve: ijeh inem itile Christan jong eiho dinga hesoh genthei athoh ahin, nangho akhonung jui nahina dinguva, hichu vettoh-a jui ding akoija adalhah ahi.

²² Ama chu achonsepon, akam sunga jong doha lheplhahna kimulou ahi:

²³ Houset achanin ahouse thuhpon; athohgim pet jong chun koima agihsalpon; ahin chonpha tah-a thutanpa khutna akingaijon ahi.

²⁴ Eiho chonset lama ithiuva chonphat lama ihinna dingun, Aman eiho chonset jouse atahsa chunga apon, thingleh geijin apodohtan ahi: ama kijepna maha-a chu nangho kiboldama nahitaove.

²⁵ Ajeh chu nangho kelngoi hon banga lamvaija nahiu ahin, tu vanga hi nalhagao chingpao le nakaihoipao henga hung kile kit nahitaove.