Read Thado Chin 1 Peter 3 Bible Online

1 Peter 3 - Thado Chin bible

1 Peter 3

¹ Hiche bang chun, inneipiho jouse na-inneipute cheh-u thunoija kipelut un; amaho abang khattou thua nunglou hijongleu, thua hilouva, a-inneipite chengu khanthem vanga akijo theina dingun;

²Nangho ging gehcha na-umu nanun nakhannu thengsel chu amit tah-a mu-u hen.

³ Sampheh hoi, sana khi-o, nihchen ponsil got chomchom tho-a polam jem-a kijem louvin,

⁴Lung sunga guhthim mi, nunnem le lungnem kem theilou jem chun kijem jouhen; hichu Pathen mitvetna man lutah ahi.

⁵Ajeh chu malaija numei theng Pathen'a kingaiho jong chu chutia chu kijema, a-inneipute chengu thunoija kipelutnu ahiuve:

⁶ Hitia chu Sara'in Abraham chu pakai asah-a athua ananun banga; nanghon kichase louhela thilpha nabol uva ahile, ama chanuteho nahiu ahi.

⁷ Chutobangma chun, inneipu teho, natao nao daltana aumlouna dingin, hinna lungsetna nachankhompiu ahiuto lhonin, numei chu belkehbai bangin jabolun lang, hetna dungjuijin amaho chu chenkhom piuvin.

⁸Achainan, nangho nabonchaovin lungkhat hiuvin, kilainatto cheh-un, sopi khat bangin kingailuvin, kilungsetto themun, nunnem tah hiuvin.

⁹Set phu lahnan set bolhih helun; chule houset phu lahnan house thuh hih-un: chusangin phatthei bohjouvin; ajeh chu phattheina chu lo dinga nangho kikouva nahiuve ti heuvin.

¹⁰Ajeh chu Mi koi hile hinkho ngailut ding noma, nikho phaho mu noma chun Gitlouna-a konin alei, chule milhep lhahna thu seija konin amuh tuhtanghen;

¹¹Ama chu gitlouna konin kileheihen, thilpha bolhen; Chamna hol henlang, hichu nungdel peh hen.

¹²Ajehchu Pakai mit chu michonpha ho chunga aumin, Ataonao ngaina-a ana asungin ahi; Ahin Pakai mai chun thil gilou bolho lam angat jingin ahi.

¹³Nangho apha chu juija nahi vangule, koiham nabol engse dinguva?

¹⁴ Ahinla chonphat jala hesoh genthei thoh nahi vangule, anunnom nahiuve: chule amahon nasuh kichatnao chu kicha loujenun, lung jong lungdong hih-un;

¹⁵Chusangin nalunggil uvah Pakai Pathen chu sutheng jouvin: khattou nasunguva um kinepna thudol chu adonga auma ahile, amaho chu lungnemle ging gehcha donbut dingin phasademin um jingun:

¹⁶Sele pha hetna pha neijun; chutile Christa-a nahinkho manu adihlou tah-a seisehon thilphalou bol banga nachung uva athuseiju chu jahchatna anei dingu ahi.

¹⁷Ajeh chu thilphalou nabol jeh uva genthei hesoh thoh sangin, Pathen lunggot lam ahile, thilpha nabol jeh uva nathoh gimu chu gamchenga phajo ahi.

¹⁸Ajeh chu Christa'n jong chonsetna chengse jeh-a, chonphatah chun chonpha louho dinga, eiho chengse hi Pathen kom eilhut theina dinguva, khatvei hesoh genthei athohgim ahi; ama chu tahsa-a kithat ahin, amavang lhagaova hinga ahi:

¹⁹Chujongle lhagaova chea kul-a kihen lhagaoho henga thu agasei ahi;

²⁰ Amaho chu phatkhat lai, Noah nikho laija kong kisem lai sungse-a, Pathen lungdehatna-in anga laija chu thua nunglou anahiuva ahin, hiche kong'a chu mi themcha khat, miget sehbou twija anasohcha-a ahi.

²¹Hichu Jesu Christa thokit vanga isochatnao baptize channa lima kibol (hichu tahsa nen pailhah hilouva, Pathen heng lama sele pha hetna pha donbutna ahi;)

²²Ama van'a akaltouvin Pathen jet lama aumtai; vantil chengsele, thuneina, chule thilboltheina thahat jouse ama thu noija uma ahitai.