Read Thado Chin 1 Peter 4 Bible Online

1 Peter 4 - Thado Chin bible

1 Peter 4

¹Chuti chu ahin, Christa'n tahsa-a eihodia athohgim jeh chun, nangho jong chutobang lungput chun kivonun; ajeh chu tahsa-a thohgima chun chonsetna adalhah ahin;

²Chutia chu aphat umnalai chengse chu mihem lung ngaichat lama tahsa-a hing talouva, Pathen lunggot lama ahin johna ding ahi.

³Ajehchu nomsahna lung ngaichat, huh, juneh hat, julhang neh, nehkhom, thet umtah milim houna-a i-um laijuva chu, chidang namdangho lunggot lam bolna dinga iphatnu tamtah inamanu ahitan;

⁴Nanghon setna lama amaho chu nachon khompitah loujeh uva kidang asah uva, nahouset jiu ahi.

⁵Ahingle athi thutan dinga kigopa anga chu amahon achonnau asuhtoa apeh cheh dingu ahi.

⁶Hiche jeh-a chu amaho mihem dola tahsa-a athu-u akitana, lhagaova Pathen lungdeija ahin nadinguva, athisaho jahdinga jong Kipana Thupha chu kiseija ahitai.

⁷Ahinla thil jouse hi abeina ding nikho anaitai; hiche jeh chun lunglim gehchan umun lang taojing dingin chingtheijun.

⁸ Imajouse chungvuma gunchu tah-in khatle khat kingailutto nalah uva habolun; ajeh chu ngailutna hin chonset tamtah akhujin ahi;

⁹Phunchel louhelin khatle khat kilhun sahton umun:

¹⁰Amitakip lungsetna thilpeh achan dungjui cheh-in, Pathen milungsetna gotchom chom tamtah gouching phaho bangin, khatle khat kijento jingin umun.

¹¹Thuseija aumle, ama chun Pathen kamsoh seijin seihen; chule mi jenlea aumle, Pathen'in apeh thahat dungjuijin jenlehen: chutia chu thil imajousea Jesu Christa vanga Pathen vahchoija aum theina dingin; Vahchoina le thuneina tonsot geija ama-a ahi. Amen.

¹²Ngaiteho, nangho patepna ding patepna meikong chu thil kidang nachung uva hung chua bangin kidang sahih-un;

¹³Nangho Christa hesoh genthei thohgim thoh khompi-a nahiu bangtah chun kipahjo uvin; chutia chu aloupina hung kilah tengle, kipana nasatah-a nakipa theina dingun.

¹⁴Nangho Christa min jala houset nachanuva ahile, anunnom nahiuve; ajeh chu loupina Lhagao chule Pathen Lhagao chu nachung uva aume: amaho jal-in Ama seiset nin aumin, nangho jallin Ama choiat nin aume.

¹⁵Nalah uva koiman toltha jeh ahim, guchat jeh ahim, khan gitlou jeh ahim, midang tohna chunga khut lha jeh ahimin, hesoh genthei thoh hihhen;

¹⁶Christian hi jeh-a hesoh genthei thohgima aum vangle, ama chun jachatnan nei hihhen; ahin hiche min jehchun Pathen choi-an johen.

¹⁷Ajeh chu Pathen insunga kona thutanna ahung kipat nading phat chu ahitai: chule hichu eihoa akipatna ahile, Pathen Kipana Thupha thua nunglouho kichaina chu iti tantem?

¹⁸ Michonpha bon huhhing-a aum ahahsatna ahile, Pathen ngaisah louho le michonse hon hoija amaiju alahdoh dingu hitam?

¹⁹Chuti ahi jeh chun Pathen lunglam dola hesoh genthei thohgimho chun thilpha bolin alhagaovu chu tahsan umtah asempa henga bangin ama henga pedoh-u hen.