Read Thado Chin 2 Peter 1 Bible Online

2 Peter 1 - Thado Chin bible

2 Peter 1

¹Jesu Christa soh le solchah Simon Peter'in, Pathen le eihuh hinguva Jesu Christa chonphat vanga tahsan lutah kachan bang changho hengah:

²Pathen le I-Pakaiyu Jesu hetna-a konin nachung uva lungsetle lungmon hapunin punghen.

³Aloupina le aphatna-a eikoupau hetna vanga Pathen thahat chun hinna le Pathen ngaisahna lam thudolla thil jouse eipeh-u ahitai:

⁴Chule hicheng vanga chu thutep lentah le manlutah chu eipeh jengu ahitai; hitia chu ngaichatna jeh-a vannoi leisetna um suhbohna-a kona chu nahoidoh uva, Pathen nunle khan chankhompi nahina dingu ahi.

⁵Hiche jehtah chun nanghon potthona kimkei pandoh-un, natahsanu chun phatna, naphatnao chun hetna;

⁶Nahetna-u chun tibah timthem, natibah timthemu chun thohhat, chule thohhat chun Pathen ngaisahna;

⁷Pathen ngaisahna chun sopi hepina, chule sopi hepina chun ngailutna sodoh hen.

⁸Ajeh chu hichengse chu nangho-a auma, aum dimset jinga ahile, I-Pakaiyu Jesu Christa hetna thudolla nangho hatmo le ga beija naumsah lou dingu ahi.

⁹Ahin hicheng neilou chu amitchoa ahin, gamla mulou ahin, masanga achonset luiho chengse-a kona kisu ngim ahi chu asuhmil ahitai.

¹⁰Hijeh chun, sopiteho, nangho nakikou nao le naki lhennao chu kichetsahna dingin kihabolun; nanghon hichu nabol uva ahile, a-imatih chana nalhuh lou dingu ahi:

¹¹Chutia chu I-Pakaiyu le eihuh hingpao Jesu Christa tonsot lenggama chu lut theina thu letset tah-a nakipe dingu ahi.

¹²Hiche jeh chun nanghon hichenghi hejongleu chun, chule tu-a nangho-a uma thutah-a chun umdet jing jongleu chun, hicheng thudol hi nangho geldohsah jing ding ngaisah louva kaum louhel ding ahi.

¹³Chule hiche pon in'a hi kaum laichanse-a, nangho chu geldohsah jinga hah jinga umsah dinghi adihlam in kagele.

¹⁴Ajeh chu I-Pakaiyu Jesu Christan eihetsah banga, hiche pon in hi kadalhah vah ding ahi ti kahei.

¹⁵Chule kadalhah nung tengle hicheng thudol hi nageldoh jing theina dinguva jong kihabol kahi.

¹⁶Keiman Pakai Jesu Christa thuneina le ahung ding thu nangho kahetsah laija chu, lungthim thema suhto-a semthu thusim juija hilou kahipouve, Leng Chungnung loupitah ahije mittah-a mu-a hettohsahjoa kahibouve.

¹⁷ Ama hi ka-Chapa deitah ahi, achunga kalung alhai tangeije, tia Leng Chungnung loupina-a ahenga aw ahung lhuna chu, Pa Pathen'a kona choi-atle jabol changa ahi.

¹⁸Van'a kon hiche aw hung ging chu molsang theng chunga ama toh kaumuva kajah-u ahi.

¹⁹Chule themgaoho thu chu kichet chehna-a kahengu hung lhunga ahi; nangho chuche thua lunglut tah-a na-umu hi apha lheh jenge; jingkho ahung vah-a nalung sunguva jing niso ahung sodoh masangse-a, muthim lah salvah jing vah tobanga chingthei tah-a na-umu chu nabol hoi lheh jengun ahi.

²⁰Pathen lekhabua gaothu kisei jouse hi koiman ama chang tuma ahilchet ahipoi ti hemasao vin.

²¹Ajeh chu malaija gaothu kiseidoh hochu mihem lungchama kona sohdoh-a ahipoi: ahin Pathen mitheng hon Lhagao Thengin amanchah dung juijuva aseiju ahibouve.