Read Thado Chin 2 Peter 2 Bible Online

2 Peter 2 - Thado Chin bible

2 Peter 2

¹Ahin miho lah-a themgao lhem asodohtah banga chu, nangho lah-a jong mihil lhem hung sohdoh-a, guhthima misumang thei thuhil ki dang ahinpoh lut dingu, amaho achopau Pakai tah jeng jong chu ajahda uva, chule poh phunga achunguva manthah na akiloi khum dingu ahi.

²Chule mi tamtah-in amanthah nao lampi chu ahinjui dingu; amaho jeh-a chu thutah lampi hi seisetna hung umding ahi.

³Chule kilosetna-a jou thua ki sumkol veina-a nahinnei dingu ahi; ahinla malaija patna achunguva thu kitan chu khongai sot lou, chule amanthah nau jong chu lulhu lou ahi.

⁴Ajeh chu Pathen'in vantil chonseho jengbon chu khen louhela, damuna ale lut jenga, athu-u kitan ding ngah-a kokhuh thima akhum jenga;

⁵ Chule Pathen ngaisah lou vannoi chunga twisang aletsah-a chu vannoi lui chu khen louhela, adang sagitoh chonphat thu seile-a Noah chubou akhena;

⁶ Chule Sodom le Gomorrah khopi teni chu vutvai asosah-a, themmo chan na-a alekhupma, chule Pathen ngaisah louho chunga itobang ahung chuh ding vetsahna-a asema;

⁷ Chule mi engseho khan gitlouna-a kona thoh gentheija michonpha Lot chu ahuhhinga ahile:

⁸(Ajehchu hiche michonpha chu amaho lah-a chenga, achonsetnao chu amua ajah-a, achonset jeh uva chu ama chonphat lung sunga chu niseh-a lungphamo lhehji-a ahi);

⁹Pakaiyin Pathen ngaisahho chu lhepna-a kona huhdohje ahen, chonpha louho chu thupi kitan ni kahse-a dinga talen matsah-a koije ahei:

¹⁰Ahideh-a kisuhbohna lam ngaicha-a tahsa lama chonteho le, gamvaipo nahsahmoho. Amaho chu ngol hanle ama lungchama chon ahiuvin, amahon loupina changho jengsan jong houset ding atijapouve.

¹¹Vantil ho chu thahat le thilbol theija chungnungjo ahi jeng vangun, amaho dounan oimona thu Pakai anga alhut pouvin ahi.

¹²Ahin hiteho vanghi lungel neilou sahemho tobanga achonnau dungjuija kimana kisumang ding ahiuvin, ahet phah louhelu thu chu aseiseu vin ahi; chule amaho asetnaova chu mangthah ding ahiuvin;

¹³Chule amahon suna kivah nehnop hi nomsah na-a angaito jeh uva, chonphat louna tohman chu asan dingu ahi. Amaho chu boh beh le nol uma ahiuvin, nangho toh kivahna-a ankong aumkhom ji tengule adoha lungthim uva akisuboh jiuvin;

¹⁴Jon thanhoina dimset mit aneijun, chonsetna ngathei lou ahiuvin; mi lungdet louho ajol lhajiuve: alungu chu thangset bolna lama kichuh ahin, sapset chang chate ahiuve:

¹⁵ Amahon lamdih adalhaovin, lam hilouva avahmangun, chonphat louna thaman ngailu-a Beor chapa Baalam lampi chu ajuijun ahi;

¹⁶Ahin ama chu achonkhel jeh chun pho sal-in aumin; pao theilou sangan chu mihem paova apaodoh-in themgaopa ngolna chu akhamtangin ahi.

¹⁷Hitiho hi twi umlou twikul ahiuvin, khopi huijin asemmang meilhang ahiuve; muthim lhangkhal kiheh chu amaho dinga a-imatih chana dinga kikheh khol ahi.

¹⁸Ajeh chu amahon hamhoi thona thumanlou asei tengule, lamvaina-a umho lah-a kona hung jamdoh ho chu tahsa lam ngaichat huhna lama ajol lha jiuvin ahi.

¹⁹Amahon chamlen athutep jiuvin, ahinla amahotah kemmang soh ho ahiuve: ajeh chu mi jo-a aumna-a chun, soh-a akailut jiuvin ahi.

²⁰Pakai le huhhing-a Jesu Christa het vanga, vannoi leiset kisuhbohna tincheng ajamsan nunguva, chuche thenlouna-a akikhi oh kitnuva, jo-a aum kitnuva ahile, aumchan amasa sanga anunung chu sejocheh ahi.

²¹Ajeh chu ahet nunguva, amaho kipe-a thupeh thenga kona akiheimang sangun, chonphat lampi chu ahet louhelu hile, amaho dinga phajoa ahi.

²² Ui jin aloh lhahsa ajon kitjin, vohpi kisilngimsa jong bonlhoh lah-a kibolin akilejie, ti paochamtuh hi amaho chunga lhung ahitai.