Read Thado Chin 2 Peter 3 Bible Online

2 Peter 3 - Thado Chin bible

2 Peter 3

¹Ngaitahteho, keiman nangho lekha kahinthot hiche hi anina ahi; anigela chu nangho geldohsah na-a kona nalung thengu chu kahinsuh thou ahi;

²Nanghon malaija themgao thengho thusei chengsele, Pakai le Huhhingpa solchah keiho thupeh najahsao chu nageldoh jingna dinguva kahinsut ahi.

³ Amasan nanghon hiche hi heuvin, ni nunungle jontaina manga jontai hatteho hung umdoh ding ahiuve, amaho chu ama tahsa ngaichat lama chonuntin,

⁴Ahung dinga thutepna chu hoibaham? Iputeu ipateu athiuva kipat tu gei hin, thilsem jouse hila semtila aum ngai bangbangin aumnan, atiuva nahin jontai dingu ahi.

⁵ Ajeh chu amaho hicheho-a hi kihetmo sah uva ahin, malaipeh-a patna Pathen thusah-a vanho chengse le twi chunga le twinoija um leiset hohi um ahi.

⁶ Chuche laija vannoi leiset chu twisanglen'in asuhmang ahitai:

⁷Hiche thuma ma-a chu tulai van le leiset hi Pathen ngaisah louho thu kitanle akisuhmang niu geija dinga meija dinga kikheh kholla ahi ti hi,

⁸ ahin, sopi ngaiteho, nanghon hiche thuhi sumil loujenun, Pakai dingin ni khat chu kum sangkhat tobang ahin, kum sangkhat chu ni khat tobang ahi.

⁹Mi khattouvin geisang asah chu Pakai athutep lam dola geisang ahipoi, koima amangthah um louva mi jousen lung aheiman nading angaitoa, eiho jala khongai sot ahibouve.

¹⁰Amavang Pakai nikho chu janna gucha banga hung ding ahi; hiche ni chule vanho chengse ha gina ginglul lula manghel ding ahi, chule thilbul chengse meijin akah jola kavam gamhel ding ahi; chule vannoi leisetle asunga thil um jouse aboncha kavam sohkei ding ahi.

¹¹Chu chengse chu chutia mang ding ahile, nunle khan then lamle Pathen ngaisahna lama itobang mi nahi ding dol uham!

¹²Pathen nikho hung lhung ding chu pontho tah-a kat jinga kinema umding dol ahi; hiche ni chu ahung lhun jeh-a vanho meija kong'a kavamhel ding, chule thilbul chengse meisa-a jolmang sohding ahi.

¹³Ahinla eihon vang ama thutep dungjuija vanthah hole leithah kinema ingau ahi; hichea chu chonphatna chenga ahi.

¹⁴Hijeh chun, sopi ngaiteho, hicheng chu kat jinga nangho ama anga boh beh louhel le nolna beihela lungmonga nakimudoh theina dingun kihabolun.

¹⁵Chule Pakai mi khongaisot hi huhhinga umna ahi ti gelun; isopiu deitah Paul'in jong ama kipe-a hetna dungjuija, chutobangma chu nangho henga ahinsutsa ahitai;

¹⁶Alekhathot chengsea chu hiche thu chu aseija, chutobangma chu asut ahi, hichenga chun het hahsatahtah thu aume; hichu mi lunglhomho le lungdet louhon Pathen lekhabua thu dang dang angai koiji bangun, angai koijiuvin amale ama akisumang jiuve.

¹⁷Hijeh chun, ngaiteho, hichengse chu nahet masatsao bangin, kihongphauvin, achuti loule nangho jengjong michonseho lamvaina lama puimangin umun natin, napandet phapet lhaso khauvin nate.

¹⁸Ahin I-Pakaiyu le Huhhing-a Jesu Christa milungset le hetna-a khangtou jingun. Ama-a chun tu le tonsot geijin loupina umhen. Amen.