Read Thado Chin 1 John 2 Bible Online

1 John 2 - Thado Chin bible

1 John 2

¹Kachateho, nachonset louna dinguva hicheng hi naheng uva kahinsut ahi. Chule khattou chonse jeng tajongle, Pa anga eihuva eisei champeh chonphatah Jesu Christa chu ineinaove.

²Ama chu eiho chonset thoidamna ahi; eihoa ding jengseh hilouva, vannoi chonset jouse-a ding jong ahi.

³Chule eiho ama thu nit ihiule, hichu ama ihetaove ti hetna ahi.

⁴Keiman ama chu kahetaila tia athupeh nit lou chu mijou ahin, asunga thutah umlou ahi.

⁵Ama thu nit vang chu Pathen ngailutna chu asunga tahbeh-a chamkima ahitan: hichea kon chun ama-a um kahi ti iheuve.

⁶Keima ama-a um kahi tia chu, ama chon bang banga ama jong chon ding dol ahi.

⁷ Sopiteho, keiman nangho henga thupeh thah kahinsut ahipoi, atil abula nanghon najahsao thupeh lui chu kahinsut joh ahibouve; atil abula kona najah-u chu hiche thupeh lui hi ahi.

⁸Chule thupeh thah jong kahinsune, hiche hi ama-a chule nangho-a jong thutah ahi; ajeh chu muthim abeikon ahitai; khovah dihtah chu hung vah pan ahitai.

⁹Keima khovah-a uma kahi tia asopi ho-a chu muthima umnalai ahi.

¹⁰Asopi ngailu-a chu khovah-a uma ahi, ama sunga chu kipal lhuhna imacha umlou ahi.

¹¹Asopi ho-a vang chu muthima uma ahin, muthima vahlea ahin, chule achena ding hoilam ahi ahepoi; ajeh chu muthim chun amitchohsah ahitai.

¹²Kachateho, ama min vanga chu nachonset nao ngaidama uma ahitai; hiche jeh-a chu naheng uva kahinsut ahi.

¹³Vo Pateho, nanghon atil abula patna anaumpa chu nahet jeh uva naheng uva kahinsut ahi. Khangdongho, nangho agilouva chu nanehjou jeh uva kahinsut ahi. Chapangho, nanghon Pa chu nahet tah jeh uva naheng uva kahinsut ahi.

¹⁴Pateho, nanghon atil abula patna anaumpa chu nahet jeh uva naheng uva kahinsut ahi. Khangdongho, nangho athahat nahiuvin, nasunguva Pathen thu chu chenga ahin, chule nanghon agilou chu nanehjou tah jeh uva naheng uva kahinsut ahi.

¹⁵Nanghon vannoi leiset le vannoi leiset lam dol thil chengse ngailu hihhelun. Koi hile vannoi leiset ngailu-a chu alung sunga Pa ngailutna cheng lou ahi.

¹⁶Ajeh chu vannoi'a umho jouse: tahsa lam ngaichat, mitvet deichat, hinkho kiletsah, hicheng hi Pa-a kona ahipoi, vannoi'a kona ahibouve.

¹⁷Vannoi leiset le athil ngaichat mangthah ding kon ahitai; ahin Pathen lung lama chonpa chu imatih chana umjing ding ahi.

¹⁸Chapangneoho, ni nunung lam ahitai; Christa dou [1] hung dingkon ahitai tia kisei najah bangu chun, tutah jeng jong hin Christa dou tamtah asohdohtai; hichea kon hin ni nunung ahitai ti iheuve.

¹⁹Amaho chu eiho lah-a konin apotdoh taove, ahin eihotoh ikimatnao aumpoi; eihotoh kimatna neija hileu eiho koma umding ahiuve: ahinla eihotoh kimatna anei louvu chu kiphon dohna dinga, amaho chu potdoh ahitaove.

²⁰Ahin nangho vang Athengpa thao nu chu nahiuvin, ijakai hesohkei nahiuve.

²¹Nanghon thutah chu nahepouve tia naheng uva kahinsut ahipoi; thutah nahet jeh uva, thujou chu thutah-a kon ahipoi tina-a kahinsut joh ahi.

²²Chule Jesu chu Christa ahi ti janom louva seilep kalvala jou seija koiham? Pa le Chapa janom louva chu Christa dou ahi.

²³Chapa jada-a chun Pa chu anei loulai ahi; Chapa janoma vang chun Pa jong chu anei ahitai.

²⁴Atil abula nanghon thu najahsa chengseu chu nalung sunguvah chenghen. Atil abula patna nathu jahsa chengseu chu nalung sunguva achena ahile, nangho jong Pa leh Chapa-a chu um jinga nahi dingu ahi.

²⁵Hichu amatah-in eiho eithu tepnao athutep tonsot hin kemlou chu ahi.

²⁶Nangho nalhem lhaji hou thudola keiman hicheng hi kahinsut ahi.

²⁷Nangho vang ama-a kona thao nu nachanu chu nasunguva achengin; min nahil dingu nangai pouve: ahin hiche thaonu mama chun imalam jouse thudol, thujou hilouva thutah nahil jeh-u chun, aman nahil dungjuijun, nangho ama-ah umdet jingun.

²⁸Chule tun, kachateho, ama ahung kilah teng kisonna ineijuva, chule ama ahung tengle amasanga ijachat louna dingun, ama-a um jingun.

²⁹Ama chonphatah ahi chu nahetnuva ahile, koi hile chonphatna lama chonpa chu ama-a kona pengdoh ahi ti naheuve.