Read Thado Chin 1 John 4 Bible Online

1 John 4 - Thado Chin bible

1 John 4

¹Ngaiteho, nanghon lhagao tapou tahsan hih-un; ahin amaho chu Pathen'a kon ahi ahilou hettohna dingin, lhagaoho chu kholtoh-in patep jiuvin; ajeh chu vannoi leiset chungah themgao lhem tamtah asohdoh tan ahi.

²Hichea hi nanghon Pathen Lhagao chu nahet dingu ahi; Jesu Christa chu tahsa-a hunga ahi ti janoma lhagao chu Pathen'a kon ahi:

³Chule Jesu chu tahsa-a hunga ahi ti janomlou jouse chu Pathen'a kon hilou ahi: hichu hungding ahi tia najahsao Christa dou lhagao ahi; chule tu-a jonghi vannoi'a uma ahitai.

⁴Kachateho, nangho Pathen'a kon nahiu ahin, chule hitiho chu nanehjouvu ahitai; ajeh chu nangho-a umpa chu vannoi'a umpa sanga chungnungjo ahi.

⁵Amaho chu vannoi'a kon ahiuve: hijeh-a chu vannoi thu aseiju ahin, chule vannoi'in amaho thu chu angaiju ahi.

⁶Eiho Pathen'a kon ihiuve: Pathen he-a chun eiho thu angai ahi; Pathen'a kon hilou chun eiho thu angailou ahi. Hichea konahi eihon lhagao dihle lhagao dihlou ihet khen theiju ahi.

⁷Ngaiteho, eiho khatle khat kingailutou hite: ijeh inem itile ngailut chu Pathen'a kon ahi; koi hile ngailutna neichan chu Pathen'a kona peng ahin, chule Pathen ahet ahi.

⁸Ngailutna neilou chun Pathen ahetlou ahi; ajeh iham itile Pathen chu ngailut ahi.

⁹Hichea konahi Pathen mingailut eihoa kiphonga ahi, ama vanga eiho ihin theina dinguva, Pathen'in Achapa changkhat chu vannoi'a ahinsol ahi.

¹⁰Hichea hi ngailut uma ahi, eihon Pathen chu ingailutnu ahipon, ama joh-in eingailut uva, chule Achapa chu eiho chonset thoidamna dinga ahinsol ahi.

¹¹Ngaiteho, Pathen'in chutia chu eingailut uva ahile, eiho jong khatle khat ikingailut ding dolu ahi.

¹² Pathen chu koiman imatih chanin amukhapoi. Eiho khatle khat ikingailut touva ahile, Pathen eihoa uma ahin, chule angailutna chu eihoa chamkima ahi.

¹³Hichea kona hi eihon eiho ama-a um ihiu, chule ama eihoa um ahi chu ihetnu ahi; Aman ama Lhagao eipeh tah jeh-u chun.

¹⁴Chule Pa chun Chapa chu vannoi huhhing-a ahinsol ahi ti keihon kamuva kahettoh sah-u ahi.

¹⁵Koi hijongle Jesu chu Pathen Chapa ahi ti phongdoh-a chu, Pathen ama-a chu uma, ama Pathen'a uma ahi.

¹⁶Pathen'in eiho-a ngailutna anei hi eihon ihetnuva chule itahsanu ahitai. Pathen chu ngailut ahi; chule ngailutna-a uma chu Pathen'a uma ahin, chule Pathen ama-a chu uma ahi.

¹⁷Thupi tan nile eiho ihakat theina dinguva, hichea kona hi ingailutnao kisuchamkim ahi: ajeh chu ama um banga, eiho hiche vannoi'a hi i-umu ahi.

¹⁸Ngailutna-a kichatna aumpoi; amavang ngailut chamkim chun kichat anodohjin ahi: ajehchu kichatna chun talen matding anei ahi. Akicha-a chu ngailutna-a chamkim lou ahi.

¹⁹Aman eingailut masah jeh uva eihon ama ingailutnu ahi.

²⁰Khattouvin, Keiman Pathen kangailui tihen asopi hotale, ama chu mijou ahi: ajeh chu amusa jing asopi bon ngailu lou chun, amukhah louhel Pathen chu iti angailut dingham?

²¹Chule hiche thupeh hi ama-a kona ineiju ahi, Pathen ngailu-a chun asopi jong ngailuhen.