Read Thado Chin 1 John 5 Bible Online

1 John 5 - Thado Chin bible

1 John 5

¹Koi hile Jesu chu Christa ahi tia tahsan chu Pathen'a kona penga ahi; chule koi hile ahinga ngailu-a chun ahin jong chu angailut ahi.

²Eihon Pathen ingailut uva, athupeh init tengule, hichea kona hi Pathen chate ingailutnu ihet dingu ahi.

³ Ijeh inem itile athupeh initnu chu Pathen ingailutnao ahi; chule athupeh chengse jong chu pohgihsa ahipoi.

⁴Ajeh chu koi hile Pathen'a kona penga chun vannoi hi ajo ahitai. Chule vannoi jouva chu itahsanu hi ahi.

⁵Jesu chu Pathen Chapa ahi tia tahsan kala vannoi jouva koiham?

⁶Twisih le thisana hunga chu Jesu Christa tahchu ahi; twi sehseh hilouva, twisih le thisana kon ahi. Chule Lhagao chu hettohsah ahi; ajeh iham itile Lhagao chu thutah ahi.

⁷Ajeh chu van'a ahettohsah thum aumin ahi, Pa, Thu, chule Lhagao Theng: chule hicheng thum chu pumkhat ahi.

⁸Chule leisetna ahettohsah thum aumin ahi, Lhagao, twisih, chule thisan: chule hicheng thum chu khatna akitoh-un ahi.

⁹Eihon mihemte thu hettohsah ilah uva ahile, Pathen hettohsah chu chusanga chungnungjo ahi; Aman Achapa thudol chu ahettohsah chu Pathen thu hettohsah ahi.

¹⁰Pathen Chapa tahsana chu alung sunga hiche hettohsahna chu chenga ahi: Pathen tahsan loupa chun ama chu ajousah ahitai; ajeh iham itile aman Pathen'in Achapa thudol ahettohsah chu atahsanpoi.

¹¹Chule hiche hettohsahna chu hiche ahi, Pathen'in eiho hin kemlou eipetaove, chule hiche hinna chu Achapa-a um ahi.

¹²Chapa neija chun hinna anei ahitai; chule Pathen Chapa nei lou chun hinna anei lou ahi.

¹³Nanghon hin kemlou naneiju nahet nadingule, Pathen chapa mina natahsan theina dinguva, thu hicheng hi Pathen Chapa mina tahsan nangho henga kahinsut ahi.

¹⁴Chule ama-a kisonna ineiju chu hiche hi ahi, ipi ipi hijongle ama lung deilam dola ithumuva ahile, aman eingaipeh jiuvin ahi.

¹⁵Chule eihon ithum chanu eingaipeh jiuve ti ihetnuva ahile, eihon ama henga ingaichatnu chu imu-u ahitai ti iheuve.

¹⁶Mi khattouvin asopi chonsea amua achonset chu thina khop chonset ahi louva ahile, ama chun thumhen, chutile aman thina khop hilouva chonseho chu hinna apeh ding ahi. Thina khop chonset aume; hiche chu thumhen tia kasei ahipoi.

¹⁷Chonphat louna jouse chu chonset ahi: chule thina khop hilou chonset aume.

¹⁸Koi hile Pathen'a kona penga chu achonseji poi ti iheuve; ahin Pathen'a kona penga chu ama akihongdohjin, chule agilou chun atongkhajipoi.

¹⁹Eiho Pathen'a kon ihiu le, vannoi pumpi hi gitlouna-a uma ahi ti iheuve.

²⁰Chule Pathen Chapa chu ahungin, hiche adihtah pa chu ihet theina dingun lungthim eihung petaovin, chule eiho adihtah pa, Achapa Jesu Christa-a chun i-umuve ti iheuve. Ama chu Pathen dihtah le tonsot hinna ahi.

²¹Kachateho, milimho lah-a konin kihong phaovin. Amen.