Read Thado Chin Thutanho 1 Bible Online

Thutanho 1 - Thado Chin bible

Thutanho 1

¹Tun Joshua thi nungin ahitin ahi, Israel miten Pakai henga, Keiho-a dinga Canaan mite douva kisatpi dinga koi che masapen dingham? tin adongun ahi.

²Chuin Pakaiyin, Judah chetou ding ahi; Ven, keiman gamsunghi akhutna kapehdoh ahitai ati.

³Chuin Judah'in asopipa Simeon hengah, Canaan mite eisat khompi dingin keima eikipe kagam lona-a hungtouvin; chule chutobangma chun nangma nakipe nagam lona-a jong kilhonpinge, ati. Hitichun Simeon'in akilhonpin ahi.

⁴Chuin Judah achetouvin, chule Pakaiyin Canaan mite le Perizz mite chu akhutna apehdoh tan: chule amahon Bezek'a chun mi sangsom athat uvin ahi.

⁵Chule amahon Adonibezek chu Bezek'a amuvin, ama chu akisat piuvin, chule Canaan mite le Perizz mite chu athatnun ahi.

⁶Ahivangin Adonibezek ajamin; chuin amahon anungdelun, amanun, chule akhutpi le akeng khopiho atanpeh-un ahi.

⁷Chule Adonibezek'in, Leng somsagi akhutpiu le akengpiu kitanlhaho chun kadokhang noija anmal akilokhomu ahin: keiman kana bol bang banga chu Pathen'in kachunga eilethuh ahitai ati. Chule amahon ama chu Jerusalem'a ahinpuijun, chua chun ama athitai.

⁸Tun Judah chatehon Jerusalem asatnun, alauvin, chemjamin asatnun, chule khopi chu meijin ahal lhaovin ahi.

⁹Chule hiche nungchun Judah chate chu molsanga cheng, lhanglama cheng, chule phaichama cheng Canaan mite toh kisat dingin achesuh-un ahi.

¹⁰Chuin Judah'in Hebron'a cheng Canaan miho akisatpin; (tun Hebron hi masangin Kirjath-arba ana kiti:) chuin amahon Sheshai, Ahiman, chule Talmai chu athatnun ahi.

¹¹Chuin chua konchun Debir'a chengho akisatpin ahi: masangin Debir min chu Kirjath-sepher anahi.

¹²Chule Caleb'in, Koihile Kirjath-sepher gasatna, gala-a aumleh, amachu ajidinga kachanu Achsah kapeh ding ahi, ati.

¹³Chuin Caleb naopa Kenaz chapa Othniel'in hichu agalatan; chuin aman achanu Achsah chu ajidin apetan ahi.

¹⁴Chuin ahitin ahi, amanu amapa henga ahung phatnin, amanun apa henga gam athumdin angehtai. Chuin amanu asangan'a konin akumlhan ahile, Caleb'in amanu henga, Ipi nadeijem? anati.

¹⁵Chuin amanun ahenga, Phatthei neiboh-in: Nangman lhanglam gam neipeh ahi ngaleh, twinahho jong neipen, ati. Chuin Caleb'in twinah sahnung le lhangnung chu apetai.

¹⁶Chuin Mosi nupapa Ken mipa chate chu tumthing kena khopi-a konchun Judah chate toh apotdoh-un, Arad lhanglama um Juda gamthipma alutnun; chule acheuvin miho lah-a chun agacheng taovin ahi.

¹⁷Chuin Judah chu asopipa Simeon toh achen, Zaphath'a cheng Canaan mite athat nun, asugam helun ahi. Chule akhopi minchu Hormah akitin ahi.

¹⁸Chule Judah'in Gaza chu agamsung pumpi toh, Askelon chu agamsung pumpi toh, Ekron chu agamsung pumpi toh alan ahi.

¹⁹Chule Pakaiyin Judah aumpin; aman molsanga chengho chu adelmangin; amavang phaichama chengho chun thih sakol kangtalai aneijeh-un adeldoh joupon ahi.

²⁰Chule Mosi'n anasei bangin Hebron chu Caleb apeuvin ahi. Chuin aman chukoma konchun Anak chate thumho chu adeldoh-in ahi.

²¹ Chule Jerusalem'a chenga Jebus mite chu Benjamin chaten adeldoh pouvin; amavang tunigeijin Jebus mite chu Benjamin chatetoh Jerusalem'a achengkhom nalaijun ahi.

²²Chule Joseph insung miho jong chu Bethel satnin akonun; chule Pakaiyin amaho aumpin ahi.

²³Chule Joseph insung miho chun Bethel gavelhi din mi asolun ahi. (Masangin hiche khopi minchu Luz anakisah-in ahi.)

²⁴Chuin gam velhihon khopi-a kona hungdoh mikhat amuvin, ahengah, Kataovu ahi, khopi lutna hoilang ham neihilun, chutile hepina kamusah dingu nahi, atiuve.

²⁵Chuin aman khopi lutna avetsah phatnin, amahon khopi chu chemjamin asumangun; mipa vang chu a-insung mite toh asoldoh taovin ahi.

²⁶Chuin mipa chu Hit miho gama achen, khopi khat agatungdoh-in, hichu Luz asah-in: tuni geijin hiche minchu apujing nalaijin ahi.

²⁷ Manasseh'in Bethshean'a chenghole akhopi, Taanach'a chengho le akhopiho, Dor'a chengho le akhopiho, Ibleam'a chengho le akhopiho, Megiddo'a chengho le akhopiho chu anodoh pon; amavang gamsunga chun Canaan miho acheng jouvin ahi.

²⁸Chuin ahitin ahi, Israelte ahunghat phatnun Canaan miho chu hunama natongin apansah-un, adeldoh sohkei pouvin ahi.

²⁹ Ephraim'in jong Gazer'a cheng Canaan miho chu adeldoh pon; amavang Canaan miho chu Gezer'a amaho lah-a achengun ahi.

³⁰Zebulun'in jong Kitron'a cheng miho ahin, chule Nahalol'a cheng miho ahin adeldoh pon; amavang Canaan miho chu alah uva achengun, hunam natongin apansah uvin ahi.

³¹Asher'in jong Accho'a cheng miho, Zidon'a cheng miho, Ahlab'a, Achzib'a, Helbah'a, Aphik'a, chule Rehob'a cheng miho chu adeldoh pon ahi.

³²Amavang agama cheng Canaan miho lah-a chun Asher mite chu achengun ahi. Ajehchu amaho adeldoh louvu ahi.

³³Naphtali'in jong Beth-shemesh'a chengho ahin, chule Beth-anath'a chengho chu adeldoh pon; amavang agama cheng Canaan miholah-a chun ama achengun ahi. Ahijeng vangin Beth-shemesh le Beth-anath'a chengho chun amaho henga kai apeuvin ahi.

³⁴Chule Amor mite chun Dan chate chu molsang lama adel touvun, phaichama hungjong ahungsah pouvin ahi.

³⁵Ahin Amor mite chu Aijalon'a um Heres molsang le Shaalbim'a achengun ahi. Ahivangin Joseph insung mite khutnin amaho chu ajouvin, hitichun amaho hunam natongin apangtaovin ahi.

³⁶Chule Amor miho gamgi chu Akrabbim lam chetou na-a pat, songpi-a pat achunglam ahi.