Read Thado Chin Thutanho 10 Bible Online

Thutanho 10 - Thado Chin bible

Thutanho 10

¹Chuin Abimelech nungin Issachar mi Dodo chapa, Pu-ah chaoa, Tolla chu Israel huhdohdin ahung kipatdoh-in; chule amachu Ephraim molsanga um Shamir kho-a cheng ahi.

²Chuin aman kum somni le kumthum Israelte thu atanin, chuin athin, Shamir'a akivuijin ahi.

³Chuin ama nungin Gilead mi Jair ahung kipatdoh-in, kum somni le kumni Israelte thu atanin ahi.

⁴Chule aman sanganchal chunga toucheh chapa somthum aneijin, chule amahon khopi somthum aneijun, tunichan geihin Havoth-jair akitin, hicheho chu Gilead gamsunga um ahi.

⁵Chuin Jair athin, chule Camon'a akivuitan ahi.

⁶Chuin Israel chate chun Pakai masanga thil gilou abolkit taovin, Baal le Ashtaroth, chule Syria pathenho, Zion pathenho, Moab pathenho, Ammon chate pathenho, chule Philistine te pathenho ajenun, Pakai chu adalhaovin, amachu jenjong ajen pouvin ahi.

⁷Chuin Pakai lunghana chu Israelte chunga asoudoh tan, chule aman Philistine te khut le Ammon chate khutna ajoh dohtan ahi.

⁸Chuin hiche kum-a patchun amahon Israel chate, Jordan gala um Amor mite gam Gilead'a um Israel chate jouse chu kum somle kumget sung asugentheijun, anoijuva akun sah-un ahi.

⁹Chukalvalin Ammon chate chu Judah douna le, Benjamin douna, chule Ephraim insungmi douna kisatpi dingin Jordan agalkaijun; hitichun Israel ahesoh lheh jengtan ahi.

¹⁰Chuin Israel chate chu Pakai henga apengun, Nangma dounan kachonse taove, ajehchu ka Pathen'u kadalhaovin, Baal jeng kahoutaovin ahi, atiuve.

¹¹Chuin Pakaiyin Israel chate henga, Keiman nangho Egypt mite-a kona, Amor mite-a kona, Ammon chate-a kon, chule Philistine te-a kona kahuhdoh nahilouvu ham?

¹²Zidon miten jong, Amalek mite, chule Maon miten nasuh gentheijuvin; chuin kahenga natao ule, amaho khutna konin kahuhdoh-un ahi.

¹³Ahijeng vangin nanghon keima neidalhaovin, pathen dangho najenun ahi; hijeh chun keiman nangho nahuhdoh kit tapouvinge.

¹⁴Cheovinlang nanghon nakilhenu pathenho henga chun gakap taovin; amaho chun nangho nahesoh genthei naova konin nahuhdoh-u hen, ati.

¹⁵Chuin Israel chate chun Pakai henga, Keiho kachonse taove. Nangman pha nasah dungjuijin kachunguva boljengin; kataovu ahi, tuni hin nei huhdoh pou pouvun, atiuve.

¹⁶Chuin amahon alah uva konin gamdang pathenho chu apaimangun, Pakai chu ajen taove. Chuin Israelte gim gentheina chu athohjou tapon ahi.

¹⁷Chujouchun Ammon chate akikhom khomun, Gilead'a gebuh asongtaove. Chule Israel chate jong akikhom khomun, Mizpeh'a gebuh asongtaovin ahi.

¹⁸Chuin Gilead leng chapatele miho chu khatle khat akihouvun, Ammon chate douna kisatpi dinga hung kipandoh ding chu itobang mi ham? Ama chu Gilead gama chengho jouse lamkaija pang ding ahi, atiuve.