Read Thado Chin Thutanho 11 Bible Online

Thutanho 11 - Thado Chin bible

Thutanho 11

¹Tun Gilead mi Jephthah chu mihat hangsantah ahin, amahi noti chapa ahin; chule Gilead'in Jephthah ahingin ahi.

²Chule Gilead jinu chun chapate ahingin; chule ajinu chapate chu ahungkhang lennun, amahon Jephthah chu anomangun, ahenga, Nangman kapao in nalo louding ahi; ajehchu nangma hetlou numei cha nahi, atiuve.

³Chujouvin asopiho-a konin Jephthah ajamangin, Tob gama agachengtai. Chuin pannabei miho Jephthah toh akiloijun, amatoh michomin ache jiuvin ahi.

⁴Chujou chomkhat jouvin ahung hitin ahi, Ammon chate chun Israel chunga gal ahin bolun ahi.

⁵Chuin ahitin ahi, Ammon chaten Israel chunga gal abol phatnun, Gilead upaho chu Tob gama kona Jephthah puidoh dingin achedoh taove.

⁶Chuin amahon Jephthah henga, Hungin, Ammon chate toh ikisat theina dingun, keiho gal lamkaijin hung pangin, atiuve.

⁷Chuin Jephthah'in Gilead upaho henga, Nanghon neihot uva, Kapa in'a kona neikai doh-u hilou ham? Chule ibola tu-a hi nagenthei phatnuva kahenga hunga nahiuvem? ati.

⁸Chuin Gilead upaho chun Jephthah henga, Hiche jeh-a chu Ammon chateho toh kisat dinga nangma keiho to nalhona, chule Gilead'a chengho jouse chunga kalamkai uva napana dinga, nahenga hung kihei kit kahiuve, atiuvin ahi.

⁹Chuin Jephthah'in Gilead upaho henga, Ammon chate satdinga in'a neipui kitnuva, chule Pakaiyin amaho chu ka angsunga eipehdoh-a ahile, keima nalamkai uva kapan mongding ham? ati.

¹⁰Chuin Gilead upahon Jephthah henga, Nathu sei banga kabol lou uleh, Pakai chu ikah uva ahetoh hihen, atiuve.

¹¹Chuin Jephthah Gilead upaho toh alhonin, chule miho chun amachu achunguva vaipo dingle alamkai diuvin asemun; chule Jephthah'in hicheng thu jousehi Mizpah mun'a Pakai angsunga asei ahi.

¹²Chuin Jephthah'in Ammon chate lengpa henga thupo ho asolin, ajah-a, Nangman keima ilo ding neiti-a, kagam sunga keima douva kisatpi dinga hunga nahim? atin ahi.

¹³Chuin Ammon chate lengpan Jephthah thupo ho chu adonbutnin, Israel ten Egypt gama ahungdoh laijuva kagam'u Arnon'a kona Jabbok, chule Jordan geija alo jeh-u ahi: hijeh chun tun hiche gamho chu kicham delin neilepeh kit taovin, atin ahi.

¹⁴Chuin Jephthah in Ammon chate lengpa henga thusep mi asol kitnin:

¹⁵Ahenga, Jephthah'in hitihin aseije, Israel'in Moab gam alahpeh pouvin, chule Ammon chate gam jong alahmang peh pouvin ahi.

¹⁶Ahin Israel Egypt'a kona ahungdoh-u chun, twipisan geijin gamthip gam ahin jotnun, chule Kadesh ahung lhungun ahi.

¹⁷ Chuin Israel'in Edom lengpa henga thusep asolin, Nahenga katao ahi, nagamsung neijot galkai sah-in, atin; ahinla Edom lengpan angaipeh pon ahi. Chuin hiche bangma chun Moab lengpa henga thusep asolkitnin; ahin aman jong anoppeh dehpoi. Hijeh chun Israel Kadesh'a aumdentai.

¹⁸ Chujouvin amahon gamthip lah ahin jotnun, Edom gam le Moab gam chu avelkolun, Moab gam solam sanga ahungun, Arnon gal lampanga gebuh asaovin, ahivangin Moab gam gamgi sunga ahunglut pouvin ahi. Ajehchu Arnon hi Moab gamgi ahi.

¹⁹ Chuin Israel'in Amor mite lengpa, Heshbon lengpa Sihon henga thusep asolin, chule Israel'in ahenga, Nahenga katao ahi, kagam kalut theina dingin, nagam chu neipal galkaisah-in, ati.

²⁰Ahin Sihon'in agamsung pal galkai ding chun Israel chu atahsan pon: ahivangin Silhon'in amiteho jouse akhom khomin, Jahaz'a gebuh asongun, chule Israel akisatpi tan ahi.

²¹Ahivangin Pakai Israel Pathen'in Shihon le amite jouse chu Israel khutna apedoh tan, chuin amahon amaho chu athatnuvin ahi. Hitichun Israel'in chuche gama cheng Amor mite gam jouse chu alo taovin ahi.

²²Chuin amahon Arnon'a kon Jabbok geijin jong, chule gamthip gama kon Jordan geijin Amor mite gamsung chu alo taovin ahi.

²³Hitichun tun Israel Pakai Pathen'in Amor mite chu amite Israel masanga konchun anodoh ahitan; nangman hichu nalo dingham?

²⁴Nangman na-pathen Chemosh'in nalo dinga napeh chu nalo louding ham? Hijeh chun Pakai ka Pathen'un kamasanguva kona adeldoh hou gamsung chu kalo dingu ahi.

²⁵ Chule tu-a hi nangho Moab leng Zippor chapa Balak sanga phajo nahiuvem? Aman Israel douna kiphin kha-em? Ahiloule amaho akidoupi khah-em?

²⁶Israel chu Heshbon le akholenho, Arnon le akholenho, Aroer le akholenho, chule Arnon panga khopiho jouse-a kum jathum achen laija chu? Chuche phat sunga chu ibola ana kinunglah kitlou nahim?

²⁷Hijeh chun keima nangma dounan kachonsepoi, nangman keima neidouhi kachunga dihlou joh nahi. Thutan Pakai chun tunikho hin Israel chate le Ammon chate kikah-a thu tanhen, ati.

²⁸Ahivangin Ammon chate lengpan Jephthah'in ahin misol ahinsola thu asei chu ngaipeh-in aneipon ahi.

²⁹Chujouvin Pakai Lhagao chu Jephthah chunga achun, chule ama Gilead le Manasseh agalkaijin, Gilead gama Mizpeh agalkaijin, chule Mizpeh'a um Gilead gama Mizpeh'a konin Ammon chate umnalam ajonin ahi.

³⁰Chuin Jephthah'in Pakai henga kihahsel na-in akihahselin, chule hitin aseije, Nangman Ammon chate chu kakhutna thonlouva neipehdoh-a ahile,

³¹Hitiding ahi, Ammon chate-a kona lungmonga kahung kilekit tengle, eikimutopi dinga kakotna kona hungpotdoh masapen chu thonlouva Pakaiya hiding, chule keiman govam thilto-a katoding ahi, ati.

³²Hitichun Jephthah chu Ammon mite satdingin ahenglam uva achen; chule Pakaiyin amaho chu akhutna apedoh tan ahi.

³³Chuin aman amaho chu Aroer'a kipat in Minnith changeijin athatpeh-in, khopi somnijen, chule lengpilei phaicham geijin hathan athattan ahi. Hitichun Ammon chate chu Israel chate masanga suhnemin aumun ahi.

³⁴Chuin Jephthah Mizpeh kho-a a-in'a ahungin ahile, veuvin, achanu ama kimupi din khongcha beng pumle lam pumin ahungdoh-in ahi. Amahi chanu changkhat seh ahin; amanu tailou hi chapa le chanu dang aneilou ahi.

³⁵Chuin ahitin ahi, aman amanu amuphatnin, apon abotkeh-in, Kaden Kachanu! nangman keima neisunem lheh-in, chule nangma hi eisugimho lah-a khat nahitai. Ajehchu keima Pakai henga kana kamkatan, chule kih theilou ding kahitai, ati.

³⁶Chuin amanun ahenga, Hepa, nangman Pakai henga nakam nanakat ahitah-a ahile, nangman nakama nana phondoh bangbang chun kachunga boltan; ajehchu Pakaiyin nagalmite Ammon chate chunga phu nalahpeh ahitai, ati.

³⁷Chuin amanun apa henga, Hichehi keima dingin neibol peh-in, Molsang chung dunga kachesuh kachetouva, kagol hotoh nungah theng kahina pul kagadou nadiuvin, lhani neichang lhan, ati.

³⁸Chuin aman, Chen, ati. Hitichun aman amanu chu lhani sunga dinga asolmang tan ahi. Chuin amanu aloiho toh achen, molsang chungho-a chun nungah theng ahina pul chu agadou tan ahi.

³⁹Chuin lhani nungin ahitin ahi, amanu apa henga ahung kinunglen, aman akitepna bangin amanu chunga atongtan: chule amanu pasal to akitimat pon ahi. Chule hichehi Israelte chonna dan ahung hitan,

⁴⁰Hitichun Israel chanute chu Gilead mi Jephthah chanu lunghempi nan kumseh leh nili achedoh jiuvin ahi.