Read Thado Chin Thutanho 12 Bible Online

Thutanho 12 - Thado Chin bible

Thutanho 12

¹Chuin Ephraim miho chu akikhom khomun, sahlama acheuvin, Jephthah henga, Ipijeh-a Ammon chate kisatpi dinga nahung galkaija, chule ibola naki lhonpi dinga neikou lou uham? Na inpuma kahal khum dingu nahi, atiuve.

²Chuin Jephthah ahenguva, Keima le kamite Ammon chateto hatah in kakisat nun, kahinkou laijun akhut uva konin neihuh doh pouve.

³Chuin neihuhdoh louvu kahet phatnin, kahinkho kaki choithon, Ammon chate kisatpi din kagalkaijin, Pakaiyin amaho chu kakhutna eipehdohtan ahi. Achutile ibola tunia hi keima to kisat dinga nahung kon uham? ati.

⁴Chuin Jephthah'in Gilead mihojouse akhomin, Ephraim toh akisat tai. Chule Gilead mihon Ephraim miho chu athat taove; ajehchu amahon, Nangho Gilead mite hi Ephraim'a kona jammang, Ephraim mite le Manasseh mite lah-a kona jam mangho nahiuve, atijiu ahi.

⁵Chuin Gilead miho chun Ephraim miho lhun masanga Jordan galkainaho chu ana laovin: chule ahung hitin ahi Ephraim mite ahung jamdoh hochun, nei galkai sah-un ati tengule; Gilead miho chun ahenguva, Nangma Ephraim mi nahim? tin adong jiuvin; amahon, Kahipoi, ati-a ahile,

⁶Amahon ahenga, Chuti ahile Shibboleth gah ti-in ati jiuvin: chuteng aman Sibboleth ati jin ahi; ajehchu dihtah-a aseidoh thei jilou ahi. Chuteng amahon amapa chu aman jiuvin, Jordan vadung lampia chun athat jiuvin ahi. Hitichun hiche chunga chun Ephraim chu mi sangsomli le sangni athatnun ahi.

⁷Chule Jephthah'in Israelte chunga kumgup thu atanin ahi. Chujouvin Gilead mi Jephthah chu athitan, chule Gilead khopi ho sung khatna akivuitan ahi.

⁸Chuin ama nungin Bethlehem'a um Ibzan'in Israelte thu atanin ahi.

⁹Chule aman chapa somthum le chanu somthum aneijin, aman hiche achanute chu gamdanga asolin, chule achapate dingchu gamdangmi chanu somthum apuipeh-in ahi. Chule ama Israelte chunga kum sagi thutanin apangin ahi.

¹⁰Chujouvin Ibzan athitan, Bethlehem'a avuitaovin ahi.

¹¹Chuin amanungin Zebulun mi Elon'in Israel chate thu atanin; chule aman Israelte chunga kumsom thutanin apangin ahi.

¹²Chuin Zebulun mi Elon athitan, chule Zebulun gamsunga um Aijalon mun'a akivuitan ahi.

¹³Chule amanungin Pirathon mi Hillel chapa Abdon chu Israelte thutanin apangin ahi.

¹⁴Chule aman chapa somli leh tu somthum aneijin, sangan gol somsagi chunga atouvin ahi. Aman Israelte chunga kumget thu anatanin ahi.

¹⁵Chuin Pirathon mi Hillel chapa Abdon athitan, Ephraim gama Amalek mite molsanga um Pirathon munna akivuijin ahi.