Read Thado Chin Thutanho 13 Bible Online

Thutanho 13 - Thado Chin bible

Thutanho 13

¹Chuin Israel chaten Pakai mitmun thilse abolkit taovin ahile, Pakaiyin amaho chu Philistine te khutna kum somli apedohtan ahi.

²Hichelai chun Zorah kho-a Dan phunga kon Manoah kiti khat anaumin; chule ajinu chu aching ahin, chaneilou ahi.

³Chuin Pakai vantil chu numeinu henga chun ahung kilah-in, amanu henga, Tun vetemin, nangma achinga nahin, cha nahingpoi; ahinla nangman nao nahinvop ding, chule chapa khat naneiding ahi.

⁴Katao ahi, hichejeh chun chingtheijin, ju le khamnathei donhih-in, chule thilthenglou kiti poupou jong nehih-in.

⁵Ajehchu vetan, nangma gaijin natin, chapa khat nanei ding; aluchanga samchem kilam louding ahi. Ajehchu naosen chu naobu-a kon Pathen'a dinga Nazir hiding ahi. Chule ama chun Israelte chu Philistinte khutna kona ahuhdoh patding ahi, ati.

⁶Chujouvin numeinu chu ahungin ajipa henga, Pathen mi khat kahenga ahungin, amaiso chu Pathen vantil maisotoh abangin, Kichat aumlheh-e; ahinla keiman hoija hungkon nahim tinjong kadongpon, chule aman jong kahenga amin eiseipehpoi:

⁷Ahin aman kahenga, Ven, nangman nao navopding, chapa khat nanei ding ahi; chule nangman tun ju le khamna thei donhih-in, thilthenglou kiti poupou jong nehih-in: ajehchu chapang chu naobu-a kona athini geija Pathen'a dinga Nazir hiding ahi, tin aseije, ati.

⁸Chuin Manoah Pakai henga ataovin, hitin aseije, Vo ka pakai, nahinsol Pathen mipa chu kakom lhona hungkit henlang, ahung pengding chapang chunghi ipi katohlhon dingham eihung hil lhonhen, ati.

⁹Chuin Pathen'in Manoah aw chu angaipeh-in; amanu loujaova atouna-a Pathen vantil chu amanu henga ahung kitnin; ahinla ajipa Manoah chu amatoh anaumpon ahi.

¹⁰Chuin numeinu chu mangang tah in alhai jel-in, ajipa chu agahilin, ahenga, Ven, nikhat ni-a kahenga hung kilah mipa chu kahenga ahung kilah kitne, agati.

¹¹Chuin Manoah akipat doh-in, ajinu nung ajuijin, mipa koma chun ahungin, ahenga, Nangma hiche numei to kihouva chu nahim? ati. Chuin aman ahenga, Kahi, ati.

¹²Chuin Manoah'in, Tun nathuseiho chu hung guilhung hen. Chapang chu iti kakhou khah lhona, chule achunga ipi kabol lhon dingham? ati.

¹³Chuin Pakai vantil chun Manoah henga, Numeinu henga kasei jouse bangchun amanu kichih thei hen.

¹⁴Amanun lengpi guija kona kisem ipi thil hijongle nehda hen, chule ju le khamnathei jong dondahen, chule thilthenglou kiti poupou jong nehdahen: kathupeh jouse chu amanun juihen, ati.

¹⁵Chuin Manoah'in Pakai vantil henga, Nahenga katao ahi, keinin nang dinga kelnou khat kagagot lhon kahsen neiumpeh lhonin, ati.

¹⁶Chuin Pakai vantil chun Manoah henga, Nangman nei khongaisah jongle chun keiman nachanglhah neponge: chule nangman govam thilto nato dinga ahile, Pakai henga nato ding ahi, ati. Ajehchu Manoah'in amachu Pakai vantil ahilam ahetlou ahi.

¹⁷Chuin Manoah'in Pakai vantil henga, Nathusei aguilhun tengle nangma kajolbol theilhon na dingin, namin ipiham neisei peh-in, ati.

¹⁸ Chuin Pakai vantil'in ahenga, Akiselguh ahi munasa-a, ibola hitachu kamin neidoh ham? ati.

¹⁹Hitichun Manoah'in kelnou khat chu anneh thilto toh alan, songchung khatna Pakai henga atoh doh-in ahi. Chuin vantil chun kidang tah-in abolin, Manoah le ajinun hichu avelhonin ahi.

²⁰Ajehchu ahung hitin ahi, meikou chu maichama kona van lama alentou chun, Pakai vantil chu maicham meikou lah-a chun alengtou tan ahi. Chuin Manoah le ajinun hichu avelhonin, amailhon tolla asulut lhontan ahi.

²¹Ahivangin Pakai vantil chu Manoah le ajinu henga akilahkit tapoi. Hichun Manoah'in Pakai vantil ahichu ahedohtai.

²²Chuin Manoah'in ajinu henga, Eini thonlouva ithitei lhonding ahitai, ajehchu einin Pathen imulhontai, ati.

²³Ahinla ajinun amahenga, Pakaiyin eini eithanom lhona ahile, govam thilto le neh thilto chu eini khutna kona akisan louding, chule hicheho jouse jonghi eivetsah lhon louding, chujongle tuphat tah-a hi hitobang thilho jong hi eiseipeh lhon lou ding ahi, ati.

²⁴Chuin numeinu chun chapa khat ahingin, Samson asahtai. Chuin chapang chu ahung khangin, Pakaiyin phatthei aboh-in ahi.

²⁵Chuin Zorah le Eshtaol kikah-a Dan gebuh-a chun Pakai lhagaovin achunga na atong pantan ahi.